މިހާތަށް ދުނިޔޭގެ ސްކައުޓް ޖަމްބޮރީގައި ރާއްޖެއިން ބައިވެރިވާ އެންމެބޮޑު ވަފުދުގެ ހުރިހާ ބައިވެރިން، މިއަހަރުގެ ދުނިޔޭގެ ސްކައުޓް ޖަމްބޮރީ ބާއްވާ ދެކުނު ކޮރެއާއަށް ހިނގައްޖެއެވެ.
ދެކުނު ކޮރެއާގައި ބާއްވާ 25 ވަނަ ދުނިޔޭގެ ސްކައުޓް ޖަމްބޮރީގައި ރާއްޖެއިން ޖުމްލަ 426 ބައިވެރިން ބައިވެރިވެއެވެ. އޭގެތެރޭގައި ހިމެނެނީ ޖަމްބޮރީ ޕްލޭނިން ޓީމްގައި ހިމެނޭ އެއް ބޭފުޅަކާއި ކޮންޓިންޖެންޓް މެނޭޖްމެންޓްގައި ހިމެނޭ 23 ބޭފުޅަކާއި އިންޓަރނޭޝަނަލް ސާވިސް ޓީމްގައި ހިމެނޭ 23 ބޭފުޅަކާއި 38 ސްކައުޓް ލީޑަރުންނާއި 193 ސްކައުޓުންގެ އިތުރުން 149 ގާލް ގައިޑުންނެވެ. މިއީ މިހާތަނަށް ދުނިޔޭގެ ސްކައުޓް ޖަމްބޮރީއެއްގައި ރާއްޖެއިން އެންމެ ގިނަ މީހުން ބައިވެރިވާ ފަހަރެވެ.
މިދިޔަ ހޮނިހިރު ދުވަހުން ފެށިގެން ޖަމްބޮރީގެ ބައިވެރިން ކޮރެއާއަށް ދަތުރުކުރީ ވަކިވަކި ގުރޫޕްތަކަށެވެ. އެގޮތުން އެންމެ ފަހު ގުރޫޕު ދަތުރުކޮށްފައި ވަނީ ރޭގައެވެ.
ދުނިޔޭގެ ސްކައުޓް ޖަމްބޮރީއަކީ ކޮންމެ ހަތަރު އަހަރަކުން އެއް އަހަރު ބާއްވާ ކޭންޕެކެވެ. ސަޤާފަތާއި އާދަކާދަތައް ޙިއްސާކޮށް، އެކުވެރިކަން ބަދަހި ކުރުމަށްޓަކައި ދުނިޔޭގެ 170 އަށްވުރެ ގިނަ ޤައުމުން މިފަހަރުގެ މި ޖަމްބޮރީގައި ބައިވެރިވެއެވެ.
ދެކުނުކޮރެއާގެ ސައެމަންގެއުމްގައި ބާއްވާ މިއަހަރުގެ ދުނިޔޭގެ ސްކައުޓް ޖަމްބޮރީގެ ޝިއާރަކީ " ޑްރޯ ޔުއަރ ޑްރީމް" އެވެ.
