ރައްޔިތުންގެ މަޖިލިހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ރައްޔިތުންގެ މަޖިލިހަށް އިންތިޚާބު ކުރުމަކީ ކުރެވުނު "ވިޔާ ނުދާ" ކަމެއްކަމުގައި "ދަ ޑިމޮކްރެޓްސް" ޕާޓީގެ ފައުންޑަރ، އަދި އެމްޑީޕީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

"ދަ ޑިމޮކްރެޓްސް" ޕާޓީގެ ރިޔާސީ ކެނޑިޑޭޓް އިލްޔާސް ލަބީބުއާއެކު އަޑޫ ސިޓީއަށް މިހާރު ކުރައްވަމުން ގެންދަވާ ދަތުރުފުޅުގައި މެމްބަރު ރޮޒައިން އާދަމްގެ ދާއިރާގައި ވާހަކަ ދައްކަވަމުން ނަޝީދު ވިދާޅުވީ އަހަންމައިދީ އަރިހުގައި އަމަނިކުފާނު ނަންގަނެގެން ހޮވައިދިން އައްޑޫ މީދޫ ދާއިރާގެ މެމްބަރު ރޮޒައިނާ އާދަމްގެ ގާތް ބޭފުޅުން ފުރަތަމަ ބައިބައި ކުރެއްވީ ރައީސް މައުމޫން އޭރު އުފެއްދެވި ޑީއާރުޕީ ކަމުގައެވެ. އަދި އެއަށްފަހު، ރައީސް ވާހީދުގެ އަރިހަށް ވަޑައިގެން ރައީސް ވަހީދަށް ޖެހިގެން އައި އިންތިޚާބުގައި ލިބިވަޑައިގެންނެވީ އެންމެ %5 ވޯޓު ކަމުގައި ނަޝީދު ވިދާޅުވިއެވެ.

ހަމަ އަހަންމައިދީ އަރިހުގައި އަޅުގަޑު ނަންގަނެގެން މި ހޮވައިދިން ތިބޭފުޅުންގެ ދާއިރާގެ އިއްޒަތްތެރި މެމްބަރު ރޮޒޭނާ އާދަމް، އެއީ އަޅުގަޑުމެން ދެމީހުން ކުރި ވިދާނުދާ ކަމެއް. ދެން އެބޭފުޅާއާއި އެބޭފުޅާ.. އޭރުގަވެސް، އޭގެ ކުރީގަވެސް މި ބޭފުޅުން.. ޚާއްސަކޮށް ޑީއާރުޕީގެ އުޅުއްވި ބޭފުޅުން ފުރަތަމަ ރައީސް މައުމޫނާ ދުރަށް ޖެހިވަޑައިގެންފަ، އެޕާޓީ ބައިބައި ކޮށްފާ، ދެން ވަޑައިގެންނެވީ ބައާވާތަށް ފަހުގަ ރައީސް ވަހީދޭ ޒައީމޭ ކިޔުއްވަމުން. ފެނިވަޑައިގަންނަވާނެ މި ބޭފުޅުން ރައީސް ވަހީދުގެ ދެފަރާތުގައި ތިއްބަވާ، ރައީސް ވަހީދޭ ޒައީމަކީ ތިޔައީ، ތީއޭ ހުރިހާވެސް އެއްޗަކީ އެމަގަށް ފައިސަލާ ކިޔަމުން ދިޔައީ.. ޒިންދާބާދު ކިޔަމުން ދިޔައީ.. ރައީސް ވަހީދަށް ލިބިވަޑައިގެންނެވީ %5 ވޯޓު.

ނަޝީދު ވިދާޅުވިއެވެ.

ނަޝީދު ވިދާޅުވީ ރައީސް ސާލިހުގެ ވަށައިގެން މިހާރުވެސް ތިއްބެވީ އެބޭފުޅުން ކަމަށާއި، އެބޭފުޅުން ތިއްބެވީ ރައީސް ސާލިހު ވަށާލާފައި ކަމަށާއި، ރައީސުލްޖުމުހޫރިއްޔާއެއް ނެތް ކަމުގައެވެ.

ނަޝީދު މިހާރު އައްޑޫއަށް ކުރައްވަމުން ގެންދަވާ ދަތުރުފުޅަކީ "ދަ ޑިމޮކްރެޓްސް" ޕާޓީގެ ރިޔާސީ ކެނޑިޑޭޓްއަށް ތާއީދު ހޯއްދެވުމަށް އައްޑޫ ސިޓީއަށް ކުރައްވަމުން ގެންދަވާ ދަތުރުފުޅެކެވެ.