އިލެކްޝަންސް ކޮމިޝަނުން ކުރިޔަށް އޮތް ރިޔާސީ އިންތިޚާބަށް ކުރިމަތި ލުމަށް ހުޅުވާލުމަށްފަހު 2 ދުވަސް ފާއިތުވެ، އިދިކޮޅު ޕީޕީއެމްއިން އަދިވެސް އިލެކްޝަންސް ކޮމިޝަނަށް ރައީސް ޔާމިންގެ އެޕްލިކޭޝަން ފޯމު ލާފައި ނުވާއިރު، ރައީސް ޔާމިންއަށް އެންމެ ވަފާތެރިކަމަށް ބެލެވޭ އިސް ބައެއް ފަރާތްތަކުން ގާސިމްއަށް ތާއީދުކުރާކަން ހާމަކޮށް ޓުވީޓު ކުރަން ފަށައިފިއެވެ.
މިގޮތުން، ޕީޕީއެމްގެ "މަޑިސީލަ ޓީމު"ގެ ގޮތުގައި މަޝްހޫރު ވެފައިވާ، އެ ޓީމުގެ އިސްބޭފުޅެއް ކަމުގައިވާ، މާލޭ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވަނީ، ރައީސް ސާލިހު ނޫން އެހެންގޮތެއް ހޯދުމުގެ ގޮތުން ގާސިމް އިބުރާހިމަށް ތާއިދުކުރަން ތައްޔާރަށް ހުންނެވިކަމަށް ކަމަށް މޭރުންކޮށް ޓުވީޓު ކޮށްފައެވެ.
ނަރީޝް ކޮށްފައިވާ ޓުވީޓިގައި ވަނީ ގާސިމްއާއި ރައީސް ސާލިހު ސަލާމް ކުރައްވައިގެން ހުންނެވި ފޮޓޯއެއް ޓުވީޓު ކޮށްފައެވެ. އަދި އެ ފޮޓޯގެ އެއް އަރިމަތީގައި ގާސިމް އިބުރާހިމްގެ ކެމްޕޭން ޝިއާރުކަމަށްވާ "ހާސްކަނޑާލާ! ހަމަޖެހޭނެ!" މި ޝިއާރުވެސް ލިޔެފައި ވެއެވެ.
Iboo Noon Gotheh! pic.twitter.com/Zxt6Y1ym6e
— Ahmed Narysh (@ahmed_narysh) July 23, 2023
ރައީސް ޔާމިނަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭ ހާލަތުގައި، މާލޭ ސިޓީގެ ޑެޕިއުޓީ މޭޔަރު ނަރީޝް ގާސިމް އިބުރާހިމަށް ތާއިދު އޮތްކަމަށް މޭރުންކޮށް ޓުވީޓު ކޮށްފައިވާއިރު، ބެލެވޭ ގޮތުގައި ޕީޕީއެމްގެ "މަޑިސީލަ ޓީމު"އަށް ނިސްބަތްވާ ނަރީޝްގެ އިތުރުން މާލޭ ސިޓީ ކައުންސިލްގެ މެމްބަރު އަހުމަދު އައިފާންއާއި، ޕީޕީއެމްގެ އިސް އެކްޓިވިސްޓެއް ކަމުގައިވާ ޝުއާއުގެ އިތުރުން ޕީޕީއެމްގެ އިސް އެކްޓިވިސްޓް ސްޕައިކުގެ ތާއީދުވެސް ގާސިމް އިބުރާހިމްއަށް ކަށަވަރު ކުރެވިގެން ދާނެއެވެ.
ޕީޕީއެމްގެ "މަޑިސީލަ ޓީމު"ގައި ހިމެނޭ ފަރާތްތަކަކީ ރައީސް ޔާމިނަށް އިޚްލާސްތެރި އަދި ރައީސް ޔާމިންގެ އަނބިކަބަލުން މެޑަމް ފާތުންއާއިވެސް ގާތް ގުޅުމެއް އޮންނަ ފަރާތްތަކެއްކަން ފާހަަގ ކޮށްލެވެއެވެ.
ކުރިޔަށް އޮތް ރިޔާސީ އިންތިޚާބުގައި ރައީސް ޔާމިނަށް ވާދަ ނުކުރެއްވޭނަމަ، ދެން އެޕާޓީގެ އިސް ގިނަ ބޭފުޅުންގެ ތާއީދު އޮންނާނީ ޖުމުހޫރީ ޕާޓީގެ ލީޑަރު ގާސިމް އިބުރާހީމަށްކަމަށް ދަނީ ބެލެވެމުންނެވެ. އަދި ޕީޕީއެމްގެ އިސް ފަރާތްތަކުން ދަނީ އެކަން ބައެއް ފަރާތްތަކާއި ހިއްސާވެސް ކުރަމުންނެވެ.
ގާނޫނީ ގިނަ ބޭފުޅުން ވިދާޅުވާ ގޮތުގައި، ހައިކޯޓުގައި ކުރިޔަށްދިޔަ ރައީސް ޔާމިންގެ ޝަރީއަތް ނިމުމަކަށް ނައުމާއި، ރައީސް ޔާމިނަށް ކުރިމަތިވެފައިވާ ގާނޫނީ މައްސަލަތައް ހައްލުވެ ކުރިޔަށް އޮތް 10 ވަރަކަށް ދުވަހުގެ ތެރޭގައި ރިޔާސީ އިންތިޚާބުގައި ވާދަކުރުމުގެ ފުރުސަތު ދެން ރައީސް ޔާމިނަށް ފަހިވެގެން ދިއުމަކީ ވުމަށްވުރެ ނުވުން ކައިރި ކަމެކެވެ.
ކޮމެންޓު ފޮނުވާ