ރައީސް އިބްރާހިމް މުހައްމަދު ޞާލިހާއި، ރައީސް ޔާމީންގެ ތަފާތު ވަރަށް ކައިރިން ފެނިއްޖެ ކަމަށާއި، ރައީސް ޞާލިހަކީ މާބޮޑަށްވެސް އޯގާތެރި ރައީސެއް ކަމުގައި އެމްޑީއޭގެ ނައިބް ރައީސް ޢަލީ މައުރޫފް ވިދާޅުވިއެވެ.
ރައީސް ޞާލިހުގެ ވ.އަތޮޅުގެ ރަށްތަކަށް ކުރެއްވި ކެމްޕެއިން ދަތުރުތައް ނިންމަވާލެއްވުމަށް ވ.އަތޮޅު ފުލިދޫގައި ބޭއްވި ޖަލްސާގައި ވާހަކަ ދައްކަވަމުން މަޢުރޫފް ވިދާޅުވީ ނިމިދިޔަ ފަސް އަހަރުގެ ތެރޭގައި ރައީސް ޔާމީނާއިއެކު ކޯލިޝަނެއްގެ ތެރެއިން މަސައްކަތް ކުރެވުނު ކަމަށެވެ. އަދި ރައީސް ޔާމީނާއިއެކު މިގޮތަށް ކެމްޕޭނަށް ރަށްރަށަށް ދަތުރު ކުރެވުނު ކަމަށެވެ.
ރައީސް ޞާލިހާއި، ރައީސް ޔާމީނާއިއެކު ކުރެވުނު ދަތުރުތަކާއި، ކޯލިޝަންގައި މިހޭދަކުރެވުނު ދުވަސްތަކުން ލިބުނު ތަޖުރިބާގެ އަލީގައި ދެބޭފުޅުންގެ ތެރެއިން ރައީސް ޞާލިހުގެ ކެތްތެރިކަމާއި، އޯގާތެރިކަން މާބޮޑަށްވެސް ފެނި ހާމަވެފައިވާކަމަށް މައުރޫފް ވިދާޅުވިއެވެ.
ރައީސް ޞާލިހަކީ ކޮންމެ ރައްޔިތަކާއިމެދުވެސް ހަމަހަމަކޮށް ކަންތައް ކުރައްވާ ރައީސެއް. ސެލްފީ ނެންގެވުމުގައިވެސް ގެންގުޅުއްވަނީ ހަމަހަމަކަން. ތަރައްޤީ ގެނެސް ދިނުމުގައިވެސް ގެންގުޅުއްވަނީ ހަމަހަމަ ކަން.
– މައުރޫފް ވިދާޅުވިއެވެ.
މައުރޫފް ވިދާޅުވީ ރައީސް ޞަލިހު ރާއްޖޭގެ ބަޖެޓް ދެގުނަ ކުރައްވާ ވާހަކަ ދެންނެވުމުން އެކަން އިދިކޮޅު ފަރާތްތަކުން ޖޯކަކަށް ހެއްދެވި ނަމަވެސް އެކަން ކުރެވޭނެ ކަމުގެ ހެކި ރައީސް ދައްކަވަމުން ދާކަމަށެވެ. އެގޮތުން ވ.އަތޮޅުގައި ފައްޓަވާ ޓުވަރިޒަމްގެ ބޮޑު މަޝްރޫޢާއި، ބްރިޖާއި، އުމްރާނީ ގިނަ މަޝްރޫއުތައް މިކަމާއި ގުޅުން އޮތްކަމަށް އޭނާ ވިދާޅުވިއެވެ.
