ރާއްޖޭގައި ދެން ފަށާ ފަތުރުވެރިކަމުގެ އެންމެ ބޮޑު މަޝްރޫއު ފަށާނީ ވ. އަތޮޅުގައި ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު މިއަދު އިއުލާނުކުރައްވައިފިއެވެ.
ރިޔާސީ އިންތިހާބުގެ ކެމްޕެއިނަށް މި އަތޮޅަށް ފައްޓަވާފައިވާ ދަތުރުފުޅުގައި، ކެޔޮދޫ ބަނދަރުގައި ބޭއްވި ޖަލްސާގައި ރައީސް ވިދާޅުވީ ވ. އަތޮޅުގެ އާބާދީ ކުޑަވިޔަސް އިގުތިސޯދީ ހަރަކާތްތަކެއް ހިންގަން ރާވާފައިވާ ކަމަށެވެ.
އެ ކަމުގެ އިތުރު ތަފްސީލް ފަހުން ހިއްސާކުރައްވާނެ ކަމަށް ވިދާޅުވެ، ރައީސް ވިދާޅުވީ ޓޫރިޒަމްގެ އެންމެ ބޮޑު އެއް މަޝްރޫއު، 2،000 އެއްހާ މީހުން ދިރިއުޅޭ މި އަތޮޅުގައި ފަށާނެ ކަމަށެވެ. އެ މަޝްރޫއު ފެށިގެންދާއިރު، ވައިގެ މަގުން މި އަތޮޅު ގުޅިގެންދާނެ ކަމަށް ވެސް ވިދާޅުވިއެވެ.
ޓޫރިޒަމްގެ އެންމެ ބޮޑު މަޝްރޫއު ވ. އަތޮޅުގައި ފައްޓަވާނެ ކަމަށް ރައީސް ސޯލިހު ވިދާޅުވިއިރު މިހާރު ރާއްޖޭގައި ގެސްޓްހައުސްގެ ވިޔަފާރި އެންމެ ބޮޑަށް ފުޅާވަމުންދާ އަތޮޅެވެ. ކުރީގެ ސަރުކާރުތަކުން ވަނީ ވ. އަތޮޅު ބޮޑުމޮހޮރާގައި ފަތުރުވެރިކަމުގެ ބޮޑު މަޝްރޫއެއް ހިންގަން އިއުލާނުކުރިއެވެ. ނަމަވެސް އަމަލީ އެއްވެސް މަސައްކަތެއް ކޮށްފައިނުވެއެވެ.
އެ މަނިކުފާނު ވިދާޅުވީ އޭގެ އެއްބަސްވުމުގައި ސޮއިކޮށް، ދެން އޮތް ކަންތައްތައް އިކްނޮމިކް ކައުންސިލުން މާދަމާ ބާއްވާ ބައްދަލުވުމުގައި އޮންނާނެ ކަމަށެވެ.
އެ ހުރިހާ ކަމެއް ނިމިގެންދާނެ މި އަތޮޅު ރައްޔިތުން ބޭނުންވި ކަމެއް ޕިކްނިކް އައިލެންޑް. އެކަން ވެސް ލިބިގެންދާނެ ކަމަށް.
– ރައީސް ވިދާޅުވިއެވެ.
ލޯކަލް ޓޫރިޒަމް ވެސް ފުޅާ ދާއިރާއެއްގައި ކުރަމުން އަންނަ އެއް އަތޮޅަކީ މިއެވެ. އެކަމަކު، މި ރަށުގެ ކައުންސިލްތަކުގެ ޝަކުވާ އަކީ އެ ރަށްރަށަށް ސަރުކާރުން އަޅާނުލުމެވެ.
