ދަ ޑިމޮކްރެޓްސް އަށް ރޭ ސޮއި ކުރެއްވި އެމްޑީޕީގެ ކުރީގެ ރައީސް މުހައްމަދު ނަޝީދަށް އެޕާޓީގެ ރިޔާސީ ޓިކެޓް ނުލިބިއްޖެނަމަ އަނެއްކާވެސް އާޕާޓީއެއް އުފައްދާނީތޯ ޑރ.އިޔާޒު ސުވާލު ކުރައްވައިފިއެވެ.
ވެރިކަންކުރާ މައި ޕާޓީ އެމްޑީޕީން ވަކިވެ އެ ޕާޓީގެ އިސް ބޭފުޅުންތަކެއް އުފެއްދެވި "ދަ ޑިމޮކްރެޓްސް" އަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ރޭ ވަނީ ސޮއި ކުރައްވާފައެވެ. ނަޝީދު އެމްޑީޕީން ވަކިވެ ވަޑައިގެންނެވީ ރިޔާސީ ޕްރައިމަރީގައި ރައީސް ޞާލިހާއި ވާދަކޮށް ބޮޑު ތަފާތަކުން ބަލިވުމާއި ގުޅިގެން އުފެދުނު ޚިޔާލް ތަފާތުވުންތަކުގެ ތެރެއިންނެވެ.
ޑރ.އިޔާޒު ވިދާޅުވީ ރައީސް ނަޝީދަށް އަލަށް އުފެއްދި ޑިމޮކްރެޓްސްގެ ރިޔާސީ ޓިކެޓް ނުލިބިއްޖެނަމަ ހައްލަކީ އަނެއްކާވެސް އާ ސިޔާސީ ޕާޓީއެއް އުފެއްދުންތޯ ސުވާލު ކުރައްވާފައެވެ.
ތިޔަ ޕާޓީގެ ރިޔާސީ ޓިކެޓު ލިބިވަޑައިނުގެންފިނަމަ އަނެއްކާވެސް ޕާޓީ އެއް އުފައްދަވާނީތޯ؟
– ޑރ.އިޔާޒު ވިދާޅުވިއެވެ.
ޑިމޮކްރެޓްސް އުފެއްދުމުގެ ޖަލްސާގައި ވާހަކަ ދައްކަވަމުން ނަޝީދު ވިދާޅުވީ ގައުމަށް މިވަގުތު އެންމެ ރަނގަޅު ގޮތަކީ އެމަނިކުފާނާއެކު އިދިކޮޅު ލީޑަރު އަދި ކުރީގެ ރައީސް ޔާމީން ވެސް މި އިންތިހާބުގައި ވާދަނުކުރެއްވުން ކަމަށެވެ. ނަމަވެސް ޑިމޮކްރެޓްސްއިން ނިންމާފައިވަނީ ރިޔާސީ ރޭހުގައި ކެނޑިޑޭޓަކު ނެރުމަށެވެ. އަދި މިހާތަނަށް ނެރޭނެ ބޭފުޅަކު ކަނޑައަޅާފައި ނުވެއެވެ.
