ކުރީގެ ރައީސް ޔާމިންގެ ސަރުކާރުގައި، ޕީޕީއެމްއާއެކީ އެއް ކޯލިޝަނެއްގައި ދެމި ތިބެންޖެހުނީ ޕާޓީގެ ވެރިން ހުރަގެއަށް ލާފާނެތީ ކަމުގައި، ރިޔާސީ އިންތިޚާބުގައި އެމްޑީޕީއާއެކީ ކޯލިޝަން ހަދާފައިވާ އެމްޑިއޭގެ ނާއިބު ރައީސް އަލީ މައުރޫފު ވިދާޅުވެއްޖެއެވެ.
ރައީސް ސާލިހުގެ ރިޔާސީ ކެމްޕޭންގައި މިއަދު ކ. ގުރައިދޫއަށް ވަޑައިގެން އެރަށުގައި އޮތް ޖަލްސާގައި ވާހަކަ ދައްކަވަމުން، އަލީ މައުރޫފް ވިދާޅުވީ ރައީސް ޔާމިންގެ ވެރިކަމުގައި ޕީޕީއެމްއާއެކީ ކޯލިޝަންގައި ދެމިބީ ދެ ސަބަބަކަށްޓަކާ ކަމަށެވެ.
އޭގެ އެއްސަބަބެއްގެ ގޮތުގައި އޭނާ ވިދާޅުވީ އޭރުއޮތް ވެރިކަން ވެއްޓިގެން ހިގައްޖެނަމަ ރައްޔިތުންނަށް ލިބިގެން ހިގައިދާނެ ގެއްލުމެއްގެ ސަބަބުން ކަމަށާއި، އަނެއް ސަބަބަކީ ރައީސް ޔާމިން އެމްޑީއޭގެ އިސްވެރިން ހުރަގެއަށް ލާފާނެތީ ކަމުގައެވެ.
އަޅުގަނޑުމެން ކޯލިޝަންގައި ދެމިތިބީ ދެ މަގްސަދަކަށްޓަކައި، އެއް މަގްސަދަކީ ވެރިކަން ވެއްޓިގެން ގޮސްފިނަމަ ރާއްޖޭގެ ރައްޔިތުންނަށް ލިބިދާނެ ގެއްލުމަށްޓަކައި، އަނެއް މަގްސަދަކީ އަޅުގަނޑުމެންގެ ޕާޓީގެ އިސްވެރިން ހުރަގެއަށް ލާފާނެތީ.
މިއަދު ކ. ގުރައިދޫގަ އޮރް ރައީސް ސާލިހުގެ ކެމްޕޭން ޖަލްސާގައި ވާހަކަ ދައްކަވަމުން އަލީ މައުރޫފު ވިދާޅުވިއެެވެ.
މި ޖަލްސާގައި އިތުރަށް ވާހަކަ ދައްކަވަމުން އިދިކޮޅު ޕީޕީއެމް އޭނާ ސިފަ ކުރެއްވީ ޡާޢޫން ބަލި ޖެހިފައިވާ ޕާޓީއެއްގެ ގޮތުގައެވެ. މިގޮތުން އޭނާ ވިދާޅުވީ ޕީޕީއެމްއަކީ ކަރަންޓީން ކުރަންޖެހިފައިވާ ޕާޓީއެއް ކަމަށާއި، އެޕާޓީއާއި އެއްވެސް ބަޔަކު މިހާރު ކައިރި ނުވާނެ ކަމުގައެވެ.
އެއީ ކުރިން ޒަމާނުގައިވެސް ތޯއޫނު ބަލި އުފެދިއްޖެއްޔާ ކައިރި ނުވާނެ، މިއަދު ސިޔާސީ ގޮތުން އެއްވެސް ބަޔަކު ޕީޕީއެމްއަކާއި ކައިރިއެއް ނުވާނެ.
އިދިކޮޅު ޕީޕީއެމްގެ މިހާރުގެ ހާލަތަށް އިޝާރާތް ކުރައްވަމުން އަލީ މައުރޫފް ވިދާޅުވިއެވެ.
އިތުރަށް ވާހަކަ ދައްކަވަމުން އަލީ މައުރޫފު ވިދާޅުވީ ކުރިޔަށް އޮތް ރިޔާސީ އިންތިޚާބަށް ޕީޕީއެމްއާއެކުވެސް ކޯލިޝަން ހެދުމަށް އެމްޑީއޭއިން ވާހަކަ ދެއްކި ކަމުގައެވެ. އެހެންނަމަވެސް ޕީޕީއެމްއާއި ދެ ސުވާލެއް ކުރިމަތި ކުރުވި ކަމަށާއި، އެއީ އެޕާޓީން ރިޔާސީ ކެނޑިޑޭޓަކު ދެއްކުމާއި އޭގެ އިތުރުން އެޕާޓީން ކުރިޔަށް ގެންދާ އިންޑިއާ އައުޓު ކެމްޕޭން ހުއްޓާލުން ކަމަށެވެ.
އެހެންނަމަވެސް އެޕާޓީން ދެއްކި ރިޔާސީ ކެނޑިޑޭޓް ހުންނެވީ ޖަލުގައިކަން ފާހަގަ ކުރައްވަމުން އަލީ މައުރޫފް ވިދާޅުވީ އިންޑިއާ އައުޓު ގޮވުމަކީ ދުވަހަކުވެސް އެޕާޓީން ކުރާނެ ކަމެއް ނޫންކަމުގައެވެ.
ދުވަހަކުވެސް ނުކުރާނެ ކަމެއް އެއީ. އަޅުގަނޑުމެންނަށް ފެނުނީ އެ މަންޒަރު، އަޅުގަނޑުމެންނަށް ފެނުނު ޗަގޯސްވެ ބޮޑު ޖަލްސާ، ކިހިނެއްތޯވީ، ޗޮކުން ދިޔައީ. އަޅުގަނޑަށް ސިފަވީ ފެޝަން ޝޯވއެއްގެ ގޮތުގައި. އަޅުގަނޑުމެންނަށް ފެނުނީ ފަހަތުން އިންޑިއާ އައުޓް.
އިދިކޮޅު ޕީޕީއެމްއިން ކުރިޔަށް ގެންދާ އިންޑިއާއައުޓު ހަރަކާތަކީ އެޕާޓީން އިދިކޮޅު ޕީޕީއެމްއާއި ކޯލިޝަން ހަދަން ބޭނުން ނުވި އެއްސަބަބުކަން ފާހަގަ ކުރައްވަމުން އަލީ މައުރޫފު ވިދާޅުވިއެވެ.
އަލީ މައުރޫފު ވިދާޅުވީ، އަދާލަތު ޕާޓީއާއި އެމްޑީއޭ އަދި އެމްޑީޕީ ގުޅިގެން ރައީސް ސާލިހަށް ދެވަނަ ދައުރެއް ކަށަވަރު ކޮށްދެއްވާނެ ކަމުގައެވެ.
