އިނގިރޭސި ޕްރިމިއަރ ލީގުގެ ޗެލްސީއަށް ކުޅެމުން އައި އިންގްލަންޑުގެ ފޯވާޑް މޭސަން މައުންޓް ހޯދުމަށް މެންޗެސްޓާ ޔުނައިޓެޑުން ކުރަމުން އަންނަ މަސައްކަތުގައި ދެ ކުލަބުން އެއްބަސްވުމަކަށް އަތުވެއްޖެއެވެ.
ޗެލްސީން ވަނީ މީގެކުރިން ޔުނައިޓެޑުން މައުންޓް ހޯދުމަށް ހުށަހެޅި ތިން ހުށަހެޅުންވެސް އަނބުރާ ފޮނުވާލާފައެވެ. މިކަމުގެ ސަބަބުން މިކަމަށް ހައްލެއް ހޯދުމަށް ދެކްލަބްގެ މެދުގައި ބޭއްވި މަޝްވަރާތަކަށްފަހު މިހާރުވަނީ އެއްބަސްވުމަކަށް އާދެވިފައެވެ. މިގޮތުން މިއެއްބަސްވުމުގެ ދަށުން ޔުނައިޓެޑުން މައުންޓް އެކްލަބަށް ގެންދިއުމަށްޓަކައި ޗެލްސީއަށް 55 މިލިއަން ޕައުންޑްގެ އަގެއް ދިނުމަށްވަނީ އެއްބަސްވެވިފައެވެ. އަދި އެހެން ކަންތައްތަކާއި ގުޅުވައިގެން އިތުރު ފަސް މިލިއަން އިތުރު ވާގޮތަށްވެސް އެއްބަސްވުމުގައި އެއްބަސްވެވިފައިވެއެވެ.
މައުލޫމާތުލިބޭގޮތުގައި މައުންޓް ޔުނަައިޓެޑާއި ގުޅުމަށް ހަމަޖެހިފައިވަނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. މިއާއެކު އާ ސީޒަނަށް ޔުނައިޓެޑުގެ ކޯޗް އެރިކް ޓެން ހާގް ހޯދާ ފުރަތަމަ ކުޅުންތެރިއަކަށް މައުންޓް ވެގެންދާނެއެވެ.
މައުންޓް ޗެލްސީ އާއި ގުޅިފައިވަނީ އުމުރުން 6 އަހަރުގެ ކުޑަކުއްޖެއްގެ ގޮތުގައެވެ. އަދި 2019 ވަނަ އަހަރު ސީނިއަރ ޓީމަށް ކުޅެން ފެށިފަހުން އޭނާވަނީ 195 މެޗް މިހާތަނަށް ކުޅެދީ 33 ލަނޑު ޖަހާދީފައެވެ. ނަމަވެސް މިދިޔަ ސީޒަންގެ ފަހު ބައިގާ އޭނާއަށްއަނިޔާގެ ސަބަބުން ކުޅެވޭގޮތެއް ނުވިއެވެ.
ޗެލްސީން މައުންޓް އެކްލަބްގައި ބައްޓަން ބޭނުންވި ނަމަވެސް އާ އެއްބަސްވުމަކަށް އައުމަށް މައުންޓާއެކު ކުރި މަސައްކަތް ޗެލްސީއަށްވަނީ ކާމިޔާބުވާގޮތް ނުވެފައެވެ. އެހެން ކަމުން މައުންޓް ވިއްކާލުމަކީ އެކްލަބަށް މިވަގުތަށް އެންމެ ފައިދާހުރިގޮތް ކަމުގައި ޗެލްސީއިން ގަބޫލުކުރެއެވެ.
