ރާއްޖޭގެ ގިނަ ބަޔަކު ދިރިއުޅެމުންދާ މާލެ ސިޓީ، މިފަހަރުގެ އަޟުޙާ ޢީދަށް ޒީނަތްތެރި ކުރުމަށް މާލެ ސިޓީ ކައުންސިލުން ކުރެއްވި ބުރަ މަސައްކަތަށް ދީނީ އިލްމުވެރިޔާ ޝައިޚު ޢަލި ޒައިދު ތަޢުރީފް ކުރައްވައިފިއެވެ.
މާލެ ސިޓީ ކައުންސިލުން ވަނީ މާލޭގެ ގިނަ މަގުތަކެއްގައި އިސްލާމީ މަތިވެރި އުސޫލުތަކާއިއެކު ވަރަށް ފުރިހަމައަށް ޒީނަތްތެރި ކޮށްފައެވެ. ޝައިޚު ޒައިދު ވިދާޅުވީ މިހާ ފުރިހަމައަށް މިކަން ކުރިކަމީ މާލޭގައި ދިރިއުޅޭ އެތައް ބަޔަކަށް މިކަމުން ހިތްހަމަ ޖެހުން ގެނުވާނެ އުފާވެރި މަންޒަރެއް ކަަމަށެވެ.
މާލެ ސިޓީ ކައުންސިލުން އީދު ފާހަގަ ކުރުމުގައި، އިސްލާމީ އުސޫލުތައް ކުރިޔަށް ނެރުއްވީތީ ސިޓީ ކައުންސިލް އެންމެހާ ބޭފުޅުންނަށް ހައްގު ޝުކުރު އިޚުލާސްތެރި ކަމާއިއެކު ދަންނަވަން.
– ޒައިދު ވިދާޅުވިއެވެ.
Male city council in Eid faahaga kurumugai, Islamy usool thah kuriyah neruhveethy City Council enmehaa beyfulhunnah haggu shukuru ikhlaastheri kamaa eku dhannavan! 👏👏👏 pic.twitter.com/0U1cvS881e
— Ali Zaid (@alizaid1000) June 28, 2023
މި އަހަރުގެ އަޟްހާ އީދަށް މާލޭގެ އެކި ހިސާބުތަކުގައި ސްމާޓް ސްޓްރީޓް ލައިޓްތައް ދިއްލާލައި އެ ލައިޓްތަކުން ތަކުބީރުގެ އަޑު އިވޭ ގޮތް ހެދުމަށް މާލެ ސިޓީ ކައުންސިލުން ވަރަށް ކުރީއްސުރެ، ދިޔައީ މަސައްކަތް ކުރަމުންނެވެ. މި ޑިޒައިންތަކަކީ މާލެ ސިޓީ ކައުންސިލުން އަމިއްލަ އަށް ތައްޔާރު ކުރި ޑިޒައިންތަކެކެވެ. ކައުންސިލްގެ އަމާޒަކަށްވީ، ބަޖެޓު ލިބިފައި ހުރި ގޮތަށް ބަލާފައި މި އަހަރު އައި ދެ އީދުގެ ތެރެއިން ކޮންމެވެސް އެއް އީދެއްގައި މާލެ އެކިއެކި ކުލަތަކުން ދިއްލާލުމަށެވެ.
މިފަހަރު އީދު ފާހަގަ ކުރަން ރަށްރަށަށް ނުގޮސް މާލޭގައި "ފޫހިވެފައި" ތިބި މީހުންގެ މޫނުތަކުގެ ކުލަ "އަލިކޮށްދީ" އުފާވެރިކަން ގެނުވައި ދިނީ މިދިޔަ ހޯމަ ދުވަހުގެރޭ ދިއްލާލި ބޮކިތަކުންނެވެ. އަދި ތަކުބީރުގެ އަޑުން މާލޭގެ މަގުމަތި "ގުގުމާލީ" ހައްޖު ދުވަހުގެ މެންދުރުފަހު އިއްވި ހައްޖު ހުތުބާއަށް ފަހުގައެވެ.
މާލެ ތެރެ ޒީނަތްތެރިކުރުމުގެ ގޮތުން ލައިޓްތައް އެންމެ ގިނަ އިން ހަރުކޮށްފައި ހުރީ މާލޭގެ ރިންގް ރޯޑް މަގުގައި ނުވަތަ ބޮޑުތަކުރުފާނު މަގުގައެވެ. ރިންގްރޯޑްގެ އިތުރުން މަޖީދީ މަގާއި ޖުމްހޫރީ މައިދާން ފަދަ ތަންތަނުގައި ލައިޓް ހަރުކޮށްފައިވެއެވެ. މި ލައިޓްތަކުގެ އިތުރުން މަގު ހުރަސްކޮށް، "ގިޑިގެ" ގޮތަށް ލައިޓްތަކެއް ވެސް ހަރުކޮށްފައިވެއެވެ.
މާލެ ސިޓީ ކައުންސިލްގެ މިމަސައްކަތަށް ގިނަ ބައެއްގެ ތަޢުރީފް ވަނީ ލިބިފައެވެ.
