54 މެމްބަރުން އިތުބާރު ނެތްކަމަށް ވިދާޅުވުމުން މަޖިލީހުގެ ރައީސްކަމުން، ރައީސް މުޙައްމަދު ނަޝީދު އިސްތިއުފާދެއްވަން ޖެހިވަޑައިގަންނަވާނެކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ.
ރޮޒައިނާ މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މަރުތަޅު އަޅުވާފައި އޮތް މައްސަލައާއި ގުޅިގެން ނުރުހުން ފާޅުކުރައްވާ ކުރެއްވި ޓްވީޓެއްގަ އެވެ.
އޭނާ ވިދާޅުވީ ރައްޔިތުންގެ މަޖިލީހުގެ މަސައްކަތްތައް ކުރިއަށް ނުގެންދެވިގެން އުޅެނީ ރައީސް މުޙައްމަދު ނަޝީދުގެ ސަބަބުން ކަމަށެވެ.
މަޖިލީހުގެ މަސައްކަތްތައް ހުއްޓިފައި އޮންނަ އޮތުމާއި ގުޅޭގޮތުން މަޖިލީހުގެ ރައީސް މުޙައްމަދު ނަޝީދު ދެއްކެވި ބައެއް ވާހަކަތަކަށް ވެސް ރޮޒައިނާގެ ޓްވީޓުގައި ވަނީ ރައްދުދެއްވާފަ އެވެ.
"މި އުޅެނީ މުރައިދޫގެއިން ނުކުމެވަޑައިނުގަންނަވައިގެނެއް ނޫން. ތިތާ އިންނަވާ، އެކަމަކު ފަންސާސް ހަތަރު މެމްބަރުން އިތުބާރު ނެތޭ ބުނީމަ މަޖިލީހުގެ ރައީސްކަމުން އިސްތިއުފާ ދެއްވާ. މަނިކުފާނާ ހެދި މަޖިލިސް ހުއްޓިގެން މި އުޅެނީ." ރޮޒައިނާގެ ޓްވީޓްގައި ވިދާޅުވެފައިވެއެވެ.
ރޮޒައިނާ ވިދާޅުވީ އިތުބާރު ނެތް މައްސަލާގައި ނަޝީދު އަމިއްލަ އަށް އިސްތިއުފާ ނުދެއްވާ ނަމަ، ހުށަހަޅާފައި އޮތް މައްސަލައަ އަށް ވޯޓް ނަގަން ފުރުސަތު ދެއްވަން ޖެހޭނެ ކަމަށެވެ.
ނަމަވެސް ނަޝީދު އިއްޔެ ވިދާޅުވީ އިސްތިއުފާ ނުދެއްވާނެ ކަަމަށާއި މައްސަލަ ހުށަހެޅި އެމްޑީޕީ އަށް އޮތް ގޮތަކީ މައްސަލަ އަނބުރާ ގެންދިއުން ކަމަށެވެ. އެގޮތުން ނަޝީދުގެ މައްޗަށް ހުށަހެޅި އިތުބާރުގެ މައްސަލަ ނުވަތަ މަޖިލީހުގެ ނައިބު ރައީސް އީވާ އަބްދުﷲ ގެ މައްޗަށް ހުށަހަޅާފައި އޮތް އިތުބާރުގެ މައްސަލައިން ކުރެ ކޮންމެވެސް އެއް މައްސަލައެއް އަނބުރާ ނަގަން ޖެހޭނެ ކަމަށް ވިދާޅުވި އެވެ.
ނަމަވެސް އެމްޑީޕީން ބުނީ ދެ މައްސަލަ ވެސް ނުނަގާނެ ކަމަށާއި އެ ބޭފުޅުން މަގާމުން ވަކިކުރާނެ ކަމަށެވެ.
މަޖިލީހުގެ ރިޔާސަތު ބަލަހައްޓަވަން އުޒުރުވެރިވާއިރު، މަޖިލީހުގެ ރައީސަށް ދައުލަތުން ލިބިލައްވާ އިނާޔަތްތައް ނެންގެވުމާއި ދޭތެރޭ ދެކިވަޑައިގަންނަވާ ގޮތާއި ގުޅިގެން ނޫސްވެރިއަކު ކުރި ސުވާލަށް ޖަވާބުދެއްވަމުން ނަޝީދު ވިދާޅުވީ އޭނާއަށް އިތުބާރު ނެތްކަމުގެ މައްސަލައާއި ގުޅިގެން ލިބިފައިވާ ނޯޓިސްގެ މުއްދަތު ހަމަވުމާއެކު އެމަނިކުފާނު މިހާރު ހުންނަވާ މުރައިދޫ ގެކޮޅުން ނިކުމެވަޑައިގަންނަވާނެ ކަމަށެވެ.
އެކަމަށް އިޝާރާތް ކުރައްވާ ރޮޒައިވާ ވިދާޅުވީ މި އުޅެނީ ފަހަރެއްގައި ނަޝީދު މުރައިދޫ ގެކޮޅުން ނުނެރެވިގެން ނޫން ކަމަށެވެ. އެމަނިކުފާނު ބޭނުންފުޅުވާނަމަ އެ ގެކޮޅުގައި ހުންނެވުމަކުން އެއްވެސް މައްސަލައެއް ނެތް ކަމަށެވެ.
ރޮޒައިނާ އިތުރަށް ވިދާޅުވީ މަޖިލީހުގެ މަސައްކަތްތައް ނަޝީދު ހުއްޓުވާލީ، އޭނާ އާއި، އޭނާގެ ދެބެންގެ ދެދަރި މަޖިލީހުގެ ނައިބު ރައީސް އީވާ އަބްދުالله ގެ އިތުބާރު ނެތްކަމުގެ މައްސަލަ ހުށައަޅާފައި އޮތުމުން އެކަން ވިޔަ ނުދިނުމަށްޓަކައެވެ.
އަދި މަޖިލީސް ހުއްޓިފައި އޮތުމުގެ ފުރިހަމަ ޒިންމާ ނަޝީދު ނަންގަވަން ޖެހޭނެކަމަށް ރޮޒައިނާ ވަނީ ވިދާޅުވެފަ އެވެ.
