ރައްޔިތުންގެ މަޖިލީހުގެ މިއަދުގެ ޖަލްސާވެސް އަޑުގަދަ ކުރުމާއި، އަވަގުރާނަ ގޮވައި، ޖަލްސާ ކުރިއށް ގެންދެވޭނެ ހާލަތެއް ނެތުމުން މަޖިލިސް މެދު ކަނޑާލައިފިއެވެ.
މަޖިލީހުގެ ރައީސާއި، މަޖިލީހުގެ ނައިބު ރައީސްގެ އިތުބާރު ނެތްކަމުގެ މައްސަލަ މަޖިލީހަށް ހުށަހަޅާފައިވާ މިދަނޑިވަޅުގައި މަޖިލީހުގެ ރިޔާސަތު ބަލަހައްޓަވަމުން ގެންދަވަނީ ވިލިފުށީ ދާއިރާގެ މެމްބަރު ހަސަން އަފީފެވެ. މަޖިލީހުގައި މިއަދު ފުރަތަމަ މަސައްކަތަކަށް އޮތީ އިދިކޮޅު ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ކުއްލި މައްސަލައެއް ހުށަހެޅުއްވުމެވެ.
އެ މައްސަލަ ހުށަހަޅަން އާދަމް ޝަރީފްއަށް ފުރުސަތު ދެއްވި ނަމަވެސް އެ މައްސަލަ އެއްކޮށް ހުށަހެޅޭ ގޮތެއް އޭނާއަށް ނުވިއެވެ. އެއީ މަޖިލީހުގެ އެކި މެމްބަރުން ނިޒާމީ ނުކުތާ ތަކުރާރުކޮށް ނަންގަވަމުން ދިއުމެވެ.
މެދު ހެންވޭރު ދާއިރާގެ މެމްބަރު އަލީ އާޒިމް ނިޒާމީ ނުކުތާ ނެންގެވީ ކޮމިޓީތައް ބެހުމަށް އެމްޑީޕީން ކަނޑައަޅާފައި ގޮތަކީ ޒިންމާދާރު ގޮތެއް ނޫން ކަމަށް ވިދާޅުވެއެވެ. އެ މައްސަލައިގައި ރިޔާސަތު ބެލެހެއްޓެވި އަފީފް ވިދާޅުވީ ކޮމިޓީތަކާ ގުލޭ ނިޒާމާ ނުކުތާ ނަންގަވަން ޖެހޭނީ އެ މައްސަލަ ހުށަހެޅުމުން ކަމަށާއި މިއަދުގެ އެޖެންޑާގައި ވެސް އެ މައްސަލަ އެބަ އޮތް ކަމަށެވެ.
އެ ވާހަކަ ވިދާޅުވާން އާޒިމް ނިޒާމީ މައްސަލައެއް ނެންގެވި ނަމަވެސް މަޖިލީހުގައި އިދިކޮޅު ޕީޕީއެމް/ޕީއެންސީގެ މެންބަރުން ވެސް ދިޔައީ ކުރީގެ ރައީސް ޔާމީންގެ ޝަރީއަތް ކުރިޔަށް ގެންދާ ގޮތާ މެދު ހިތްހަމަނުޖެހުން ފާޅުކުރައްވައި މަޖިލީހުގައި އަޑުގަދަ ކުރައްވަމުންނެވެ.
އެހެންވެ، ނިޒާމީ މައްސަލަ ހުށަނޭޅި އެތައް އިރެއް ވީއިރު ވެސް މަޖިލީހުގެ ރިޔާސަތުގައި އިންނެވި ވިލުފުށީ ދާއިރާގެ މެންބަރު އަފީފް ގެންދެވީ އެހެން މެންބަރުންގެ ނިޒާމީ މައްސަލަ މަޑުޖައްސާލައި އާޒިމްގެ މައްސަލަ ރަނގަޅަށް ހުށަހަޅަން ފުރުސަތު ދެއްވަމުންނެވެ.
އެ މައްސަލާގައި މަޖިލީހަށް ހާޒިރުވެ ތިއްބެވި ސަރުކާރަށް ތާއީދު ކުރައްވާ އެމްޑީޕީގެ މެންބަރުން ވެސް އަޑުގަދަ ކުރަން ފެއްޓެވިއެވެ. އެ ޒުވާބުގެ ތެރޭގައި ސަރުކާރުގެ ފަޅީގެ މެންބަރަކު ހުތުރު ބަސްތަކެއް ވިދާޅުވި އަޑު އިވުނެވެ. ރިޔާސަތުގެ މައިކް ޖައްސާފައި ހުރުމުން އެ މެމްބަރުގެ އެ އަވަގުރާނައިގެ އަޑު ބްރޯޑްކާސްޓް ވެސް ވިއެވެ. އެއާ އެކު، އާޒިމް ހެއްދެވި ގޮތަކީ އޭނާގެ މައިކް ޖެއްސި ވަގުތު، އެ މެމްބަރު ގޮވި އަވަގުރާނަ މަޖިލިހުގެ ރެކޯޑްގައި ވިދާޅުވީއެވެ. އެ އަޑު ވެސް ބްރޯޑްކާސްޓްވިއެވެ. އާޒިމް ތަކުރާރު ކުރެއްވި އެ އަވަގުރާނަ ފުރަތަަމަ ގޮވީ ކޮން މެމްބަރެއްކަން ސާފެއް ނޫނެވެ.
"އަޅުގަނޑު މިހާރު ފުރުސަތު މިއަރުވަނީ މިތާ ތިއްބެވި ސިޔާސީ ޕާޓީތަކުގެ ބޭފުޅުންނާއި ވާހަކަ ދެއްކޭނެ ޖާގަ ހަމަޖައްސާފަ މިއަދުގެ ޖަލްސާ ކުރިއަށް ގެންދެވޭނެ ގޮތެއް، އެމަޝްވަރާގެ ތެރެއިން ނިންމަވާލަ ދެއްވާ. އޭގެ ފަހުން އަޅުގަނޑު ޖަލްސާ ކުރިއަށް ގެންދާނީ." މަޖިލީހުގެ ރިޔަސާތު ބެލެހެއްޓެވި މެމްބަރު އަފީފް ވިދާޅުވިއެވެ.
