މެންޗެސްޓާ ސިޓީން ޗެމްޕިއަންސް ލީގުގެ ސެމީ ފައިނަލް ފުރަތަމަ ލެގުގައި އެންމެ ފަހުގެ ޗެމްޕިއަން ރެއާލް މެޑްރިޑާ 1-1 އިން އެއްވަރުވެއްޖެއެވެ.
މިހެންވެ ނަތީޖާ ނެރޭނީ އަންނަ ހަފުތާގައި ސިޓީގެ އިއްތިހާދު ސްޓޭޑިއަމުގައި ކުޅޭ މެޗުންނެވެ. ޖުމުލަ 14 ފަހަރު މުބާރާތް ކާމިޔާބުކޮށްފައިވާ އަދި އެންމެ ފަހުގެ ޗެމްޕިއަން ރެއާލް އަށް މެޗުގެ ފުރަތަމަ ގޯލު ޖަހައިދިނީ ބްރެޒިލްގެ ވިނީޝިއަސް ޖޫނިއާ އެވެ. އޭރިއާގެ ބޭރުން އޭނާ ފޮނުވާލި ބާރު ބޯޅަ ގޯލަށް ވަނީ ކީޕަރަށް ކުޑަވެސް ފުރުސަތެއްނުދީއެވެ. ސިޓީން ނަތީޖާ ހަމަހަމަކުރީ ފަހު ހާފުގައި ކެވިން ޑްބްރޫނޭ ދުރުން ފޮނުވާލި ބޯޅައަކުންނެވެ. މި ބޯޅަ ގޮސް ރެއާލްގެ ގޯލް ދާގަނޑުގައި ޖެހުނުއިރު ކީޕަރު ތިބައޫ ކޯޓުއާ އަށް ވެސް ހުރެވުނީ ބަލަހައްޓައިގެންނެވެ.
ރެއާލްއާ ހިލާފަށް ސިޓީ އަކީ މިތަށި މުޅިން އަލަށް ކާމިޔާބުކުރުމަށް މަސައްކަތް ކުރަމުންދާ ޓީމެކެވެ. ނަމަވެސް އެ ޓީމުގެ ކޯޗު ޕެޕް ގާޑިއޯލާ ވަނީ ބާސެލޯނާގައި މިތަށި ދެ ފަހަރު ކާމިޔާބުކޮށްފައެވެ. މި މެޗުގައި ދެ ޓީމުން ވެސް ކުޅެފައިވަނީ ދާދި ހަމަހަމަ ކުޅުމެކެވެ. ހާއްސަކޮށް ރެއާލްގެ ކީޕަރު ކޯޓުއާ އާއި ސިޓީގެ ކީޕަރު އެޑަސަން ވެސް ރަނގަޅު ސޭވްތަކެއް ކުރިކަން މެޗުގެ ކޮމެންޓޭޓަރު ވެސް ފާހަގަކުރަމުންދިޔައެވެ.
މި މުބާރާޓުގެ ފައިނަލަށް ދިއުމަށް ސެމީގެ ދެ ވަނަ މެޗުގައި މިރޭ ކުޅޭނީ އިޓަލީގެ މިލާނުގެ ގަދަ ދެބާރު ކަމަށްވާ އޭސީ މިލާނާއި އިންޓަމިލާނެވެ.
ސިޓީ މި މެޗުން ވެސް ބަލިނުވެ، ނިންމާލިއިރު، ތިން ތަށްޓާ އެކު ސީޒަން ނިންމާލަން ކުރާ މަސައްކަތަށް ވަނީ ހިތްވަރު ލިބިފައެވެ. އެންމެ ފަހުން ކުޅުނު 21 މެޗުން ވެސް ސިޓީ ބަލިވެފައިނުވާއިރު، އިނގިރޭސި ޕްރިމިއާ ލީގުގެ އެއް ވަނައިގައި ލީޑެއް ވެސް ވަނީ ލިބިފައެވެ. އަދި އެފްއޭ ކަޕް ފައިނަލުގައި ސިޓީން ނުކުންނާނީ ވާދަވެރި ކްލަބް، މެންޗެސްޓާ ޔުނައިޓެޑާ ދެކޮޅަށެވެ.
