ރާއްޖޭގެ ދެކުނުގެ އިމުގެ މައްސަލާގައި އިންޓަރނޭޝަނަލް ޓްރައިބިއުނަލް ފޮރ ދަ ލޯ އިފް ދަ ސީ (އިޓްލޮސް) އިން ނިންމި ނިންމުމަކީ ދިވެހި ދައުލަތަށް ލިބުނު ކުރިއެރުމެއްކަމަށާ، ރާއްޖޭގެ އިމާއި ބޮޑަރުތައް ބެލެހެއްޓުމުގައި ދިވެހި ސިފައިން މިތިބީ ސާބިތުކަމާއެކުކަމަށް ޗީފް އޮފް ޑިފެންސް ފޯސް މޭޖަރ ޖެނަރަލް ޢަބްދުﷲ ޝަމާލް ވިދާޅުވެއްޖެއެވެ.
ޝަމާލް މިހެން ވިދާޅުވީ ދެކުނުގެ އިމުގެ މައްސަލާގައި އިޓްލޮސްއިން ނިންމި ނިންމުމާމެދު ދެކެވެމުންދާ ވާހަކަތަކާއި ގުޅޭގޮތުން ޤައުމީ ދިފާޢީ ބާރުން ދެކޭގޮތާއި މަސައްކަތްތައް ބައްޓަންކުރައްވާފައިވާ ގޮތާ ގުޅޭގޮތުން ދައުލަތުގެ މީޑިއާގެ ޚާއްސަ ޕްރޮގްރާމެއްގައި ވާހަކަފުޅުދައްކަވަމުންނެވެ.
ޝަމާލް ވިދާޅުވީ އިޓްލޮސްގެ ނިންމުން ނިންމި ދުވަހަކީ ރާއްޖެއަށް ވަރަށް ތާރީޚީ ދުވަހެއްކަމަށެވެ. ސަބަބަކީ އެއީ މިނިވަން މުސްތަޤިއްލު ޤައުމެއްގެ ގޮތުގައި ދިވެހި ދައުލަތް، އޮތުމަށް ބޭނުންވާ ހުރިހާ ސިފައެއް ފުރިހަމަވެގެން ދިޔަ ދުވަހެއްކަމަށެވެ. އަދި އެއީ މިޤައުމުގެ ސިލްމާއި ސަލާމަތްތެރިކަން އުފުލިގެން ދިޔަ ކަރާމާތްތެރި ދުވަހެއްކަމަށް ޝަމާލް ވިދާޅުވިއެވެ. މިކަމަށްޓަކައި ޤައުމީ ދިފާޢީބާރުން އުފާކޮށް ފަޚުރުވެރިވާކަމަށްވެސް ޝަމާލް ވިދާޅުވިއެވެ.
ޝަމާލް ވިދާޅުވީ އިމުގެ މައްސަލާގައި ކުރިން ރާއްޖެއާއި މޮރިޝަސްއާ ދެމެދު ފުށުއެރުންތަކެއް އޮތްއިރު، ރާއްޖޭގެ ކަނޑުގެ ސަރަޙައްދުގައި ޤާނޫނު ތަންފީޒުކުރުމަށް އެމްއެންޑީއެފަށް ދަތިތަކެއް އޮތްކަމަށެވެ. އެހެންނަމަވެސް އިޓްލޮސްއިން ނިންމި ނިންމުމާއެކު ރާއްޖޭގެ އިން މުޅިން ވަކިވެ ކަނޑައެޅިގެން ހިނގައްޖެކަމަށާ، އޑޭގެ ސަބަބުން ރާއްޖޭގެ ސަރަޙައްދު ބެލެހެއްޓުމާއި ކަނޑުގެ ސަރަޙައްދުގައި ޤާނޫނު ތަންފީޒުކުރުމަށް ވަރަށްބޮޑު ލުއިފަސޭއެއް ލިބިގެން ހިނގައްޖެކަމަށެވެ. އެހެންކަމުން މިއީ ރައްކާތެރިކަމާއި ސިޔާދަތީ ބާރު ކަށަވަރުވެގެން ދިޔަކަމެއްގެގޮތުގައި ޝަމާލް ފާހަގަކުރެއްވިއެވެ.
ޝަމާލްވިދާޅުވީ އިން ވަކިވެ އެނގުމާއެކު ދެކުނުގެ ސަރަޙައްދު ބަލަހައްޓަން އެމްއެންޑީއެފްގެ ކޯސްޓްގާޑުން ވަރަށް ވަރުގަދަކަމާއި ސާބިތުކަމާއެކު ދެކުނުގެ ކަނޑުގެ ސަރަޙައްދުގައު މީގެފަހުން ޙަރަކާތްތެރިވާނެކަމަށެވެ.
