ސައުދީ އަރަބިއާގެ އެމްބަސީ އަލުން އިރާނުގައި ހުޅުވުމާބެހޭ މަޝްވަރާތަކަށް، ސައުދީގެ ޓީމެއް އިރާނަށް ހިގައްޖެއެވެ. އަދި މީގެ އިތުރުން އިރާނުގެ މަޝްހާދުގައި ކޮންސިއުލޭޓެއް ގާއިމްކުރުމާއިގުޅޭ މަޝްވަރާތައްވެސް މި ޓީމުން އިރާނުގެ އޮފިޝަލުންނާއެކީ ކުރިޔަށް ގެންދާއެވެ.
ސައުދީގެ ޓީމެއް އިރާނަށް ދަތުރު ކޮށްފައިމިވަނީ، ޗައިނާ މެދުވެރިވެގެން، ސައުދީ އަރަބިއާއި އިރާނާއި ދެމެދު ސުލްހަ ގާއިމްކޮށް، އަލުން ސިޔާސީ ގުޅުން ގާއިމްކުރުމަށް ވެވުނު އެއްބަސްވުމުގެ ދަށުންނެވެ. އަދި ސައުދީ ޓީެމއް މަޝްވަރާތަކަށް އިރާނަށް ދަތުރު ކޮށްފައިވާކަމުގައި ސައުދީގެ ފޮރިންގ މިނިސްޓްރީން ބުނެފައި ވެއެވެ.
އެތައް އަހަރެއްވަންދެން ސައުދީ އަރަބިއާއާއި އިރާނާދެމެދު އޮތް ހަތުރުވެރިކަން ނިމުމަކަށް ގެނެސް، އަލުން ގުޅުންތައް ގާއިމް ކުރުމަށް ދެގައުމުން އެއްބަސްވެ، ދެގައުމުގައި އެމްބަސީތައްވެސް ހުޅުވުމަށް އެއްބަސްވެފައިވަނީ ފާއިތުވި މާރޗްމަހުއެވެ.
އިރާނާއި ސައުދީއާދެމެދު އަލުން ގުޅުންތައް ގާއިމް ކުރުމަށް އެހީތެރިވެދީފައިވަނީ ޗައިނާގެ ރައީސް ޝީ ޕިންގގެ އެހެއެވެ. މިގޮތުން، ދެގައުމުގެ ދެމެދުގައި ކުރެވުނު މަޝްވަރާތަކަށްފަހުއެވެ. އަދި މިއީ އެމެރިކާ ބާކީކޮށް، ޗައިނާއިން ސީދާގޮތެއްގައި މެދުވެރިއެއްގެ ދައުރު އަދާކޮށްގެން ގާއިމް ކޮށްފައިވާ ސުލްހައަކަށް ވާތީ، މި ސުލްގައިގެ އެއްބަސްވުން ވެގެން ދިޔައީ ގިނަބަޔަކަށް ލިބިގެންދިޔަ ކުއްލި ހައިރާންކަމަކަށްވެސް މެއެވެ.
ސައުދީ އަރަބިއާއިން އިރާނާއެކީ އޮތް ސިޔާސީ ގުޅުން ކަނޑާލާފައިވަނީ 2016 ވަނަ އަހަރު، އިރާނުގައި ހުންނަ އެގައުމުގެ އެމްބަސީއަށް ހަމަލާދީ ރޯކޮށްލުމާއި ގުޅިގެންނެވެ.
