ރާއްޖެއަށް މިއަހަރު މިހާތަނަށް ދަތުރު ކޮށްފައިވާ ފަތުރުވެރިންގެ އަދަދު ބައި މިލިއަނާއި ގާތް ކޮށްފިއެވެ.
ފަތުރުވެރިކަމާބެހޭ ވުޒާރާއިން އާންމު ކޮށްފައިވާ ހިސާބުތަކަށް ބަލާއިރު، މި މަހުގެ 23 ވަނަ ދުވަހުގެ ނިޔަލަށް 483,624 ފަތުރުވެރިން ވަނީ ރާއްޖެއަށް ޒިޔާރަތް ކޮށްފައެވެ.
މިއީ ފާއިތުވި އަހަރުގެ މިހާތަނަށް ޒިޔާރަތް ކޮށްފައިވާ ފަތުރުވެރިންނަށްވުރެ 89،420 އިތުރު އަދަދެކެވެ. ފާއިތުވި އަހަރުގެ މި މުއްދަތުގައި ރާއްޖެ 394,204 ފަތުރުވެރިން ޒިޔާރަތް ކޮށްފައި ވެއެވެ.
ޓުއަރިޒަމް މިނިސްޓްރީގެ ހިސާބުތަކުން ދައްކާ ގޮތުގައި މިމަހު އެވްރެޖްކޮށް ރާއްޖެއަށް ޒިޔާރަތް ކޮށްފައިވާ ފަތުރުވެރިންގެ އަދަދަކީ އެވްރެޖްކޮށް ދުވާލަކަށް 5,898 ފަތުރުވެރިންނެވެ.
މިއަހަރު މިހާތަނަށް އެންމެ ގިނައިން ރާއްޖެއަށް ފަތުރުވެރިން ޒިޔާރަތް ކޮށްގައިވަނީ ރަޝިއާއިންނެވެ. އެގައުމުން މިހާތަނަށް 59,987 ފަތުރުވެރިން ރާއްޖެއަށް ޒިޔާރަތް ކޮށްފައިވެއެވެ. ދެވަނަ އަށް އެންމެ ގިނަ ފަތުރުވެރިން ރާއްޖެއަށް ޒިޔާރަތް ކޮށްފައިވާ އިންޑިއާއިން މިހާތަނަށް ޒިޔާރަތް ކޮށްފައިވާ ފަތުރުވެރިންގެ އަދަދަކީ 52,276 ފަތުރުވެރިންނެވެ.
މިއަހަރު މިހާތަނަށް އެންމެ ގިނައިން ރާއްޖެއަށް ފަތުރުވެރިން ޒިޔާރަތް ކޮށްފައިވާ ގައުމުތަކުގެ ލިސްޓުގެ 3 ވަނާގައި އޮތީ އިނގިރޭސިވިލާތެވެ. އެގައުމުން ޒިޔާރަތް ކޮށްފައިވާ ފަތުރުވެރިންގެ އަދަދަކީ 44,839 އެވެ.
ސަރުކާރުން ހާމަ ކޮށްފައިވާ ގޮތުގައި، މިއަހަރުގެ އަމާޒަކީ 1.8 މިލިއަން ފަތުރުވެރިން ރާއްޖެ ގެނައުމެވެ. ފާއިތުވެދިޔަ އަހަރު ނިމިގެން ދިޔައިރު، އެއަހަރަށް ކަނޑައެޅި 1.6 މިލިއަން ފަތުރުވެރިން ލަނޑިދަނޑިއާއި ހަމައަށް ވާސިލް ވެވިފައި ވެއެވެ.
