އިންޑިއާގެ ބޮޑުވަޒީރު ނަރެންދުރަ މޯޑީގެ އަބުރާއި ބެހިގެން، އެގައުމުގެ އިދިކޮޅު ލީޑަރު ރާހޫލް ގާނދީ 2 އަހަރަށް ޖަލަށް ލާން އިންޑިއާގެ ކޯޓަކުން ހުކުމް ކޮށްފިއެވެ.

އިންޑިއާގެ ގުޖުރާތު ސްޓޭޓްގެ ކޯޓަކުން ރާހޫލް ގާނދީގެ މައްޗަށް 2 އަހަރުގެ ޖަލު ހުކުމެއް އިއްވާފައިވަނީ، 2019ވަނަ އަހަރު އޮތް ކެމްޕޭން އެއްވުމެއްގައި، ނަރެންދުރަ މޯޑީގެ އާއިލީ ނަން ކަމުގައި "މޯޑީ" މި ނަމުގެ ބޭނުންކޮށް، ރާހޫލް ގާނދީ މޯޑީގެ އަބުރާއި ބެހުނުކަން ކޯޓަށް ސާބިތުވެގެންނެވެ.

2019ވަނަ އަހަރު އަހަރު އޮތް ކެމްޕޭން އެއްވުމެއްގައި ވާހަކަ ދައްކަވަމުން ރާހޫލް ގާނދީ ވިދާޅުވެފައިވަނީ "ނިރުވާ މޯޑީ، ލަލިތު މޯޑީ، ނަރެންދުރަ މޯޑީ، މި ހުރިހާ ވަގުންގެ އާއީލީ ނަމަކަށް "މޯޑީ" މި ކިޔަނީ ކީއްވެގެންތޯ؟" ކަމުގައެވެ.

ނިރުވާނާ މޯޑީއަކީ ޑައިމަންޑުގެ ވިޔަފާރިކުރާ، ކޮރަޕްޝަންގެ ތުހުމަތުގައި ހައްޔަރުކުރުމަށް އިންޑިއާ ސަރުކާރުން އިއުލާން ކޮށްފައިވާ މީހެކެވެ. ލަލިތު މޯޑީއަކީ، އިންޑިއާގެ ކުރިކެޓް ބޯޑުން އުމުރަށް ސަސްޕެންޑް ކޮށްފައިވާ، އެގައުމުގެ އިންޑިއަން ޕްރިމިއަރ ލީގުގެ ކުރީގެ ވެރިޔާއެވެ.

ރާހޫލް ގާދީ ފަހުން ވިދާޅުވެފައިވަނީ، ކެމްޕޭން އެއްވުމެއްގައި ދެއްކެވި މިވާހަކަ ދައްކާފައިވަނީ އިންޑިއާގެ އޮތް ކޮރަޕްޝަންގެ ސަގާފަތަށް ނިސްބަތްކޮށް ކަމަށާއި، އެއީ އެއްވެސް ދަރިފަސްކޮޅަކަށް ނިސްބަތްކޮށް ދެއްކި ވާހަކައެއް ނޫންކަމަށެވެ.

ރާހޫލް ގާނދީއާއި ދެކޮޅަށް މައްސަލަ ފައިލް ކޮށްފައިވަނީ، އިންޑިއާގެ ވެރިކަންކުރާ ބަހަރަތިޔާ ޖަނަތާ ޕާޓީގެ ގާނޫނީ ވަކީލްއެވެ. އޭނާ ވިދާޅުވެފައިވަނީ، ރާހޫލް ގާނދީގެ މިވާހައިގެ ސަބަބުން މުޅި މޯޑީ އާއިލާގެ އަބުރު ގެއްލިފައިވާ ކަމުގައެވެ.

މި ހުކުމް އިއްވާފައިވަނީ ރާހޫލް ގާނދީ ޝަރީއަތުގެ މަޖިލީހުގައި ހާޒިރުވެ ހުންނަވައިގެންނެވެ. ހުކުމަށްފަހު، ކަފާލާތުގެ ދަށުން 30 ދުވަހަށް ޖަލަށް ވަޑައިނުގެން ރާހޫލް ގާނދީއަށް ހުންނެވޭނެއެވެ. އަދި އެމުއްދަތުގައި އޭނާ މި ހުކުމް އިސްތިއުނާފް ކުރައްވާނެކަމަށް އިންޑިއާގެ މީޑިއާތަކު ރިޕޯޓު ކޮށްފައި ވެއެވެ.

ރާހޫލް ގާނދީ ޖަލަށްލާން އިންޑިއާގެ ކޯޓަކުން އިއްވި ހުކުމަށްފަހު، ރާހޫލްގެ ޕާޓީ، ކޮންގްރެސް ޕާޓީގެ ތަރުޖަމާނު ވިދާޅުވެފައިވަނީ، މިއީ "ގާނޫނީގޮތުން ދެކޮޅުޖެހޭ ހުކުމެއް ނޫން" ކަމުގައެވެ. އަދި އޭނާ ވިދާޅުވެފައިވަނީ، މިފަދަ ހުކުމަކުން އެ ޕާޓީގެ ސިޔާސީ ފަރާތްތަކުގެ އަނގަ ބަންދު ނުކުރެވޭނެ ކަމުގައެވެ.

އަބުރާއި ބެހުން އޮންނަނީ އިންޑިއާގައި ޖިނާއީ ކުށެއްގެ ގޮތުގައެވެ. އަދި މި ކުށުގެ އަދަބެއްގެ ގޮތުން ދެ އަހަރުގެ ޖަލުހުކުމެއް ތަންފީޒު ކުރަން ޖެހިއްޖެނަމަ 2024 ވަނަ އަހަރު އޮންނަ އާންމު އިންތިޚާބުގައި ރާހޫލް ގާނދީއަށް ވާދައެއް ނުކުރެއްވޭނެއެވެ.