އޯޕަން ސިގްނަލްގެ އެންމެ ފަހުގެ ރިޕޯޓްގައި ބެސްޓް މޯބައިލް އެކްސްޕީރިއަންސް އެވޯޑްސް އުރީދޫއިން ހާސިލުކޮށްފިއެވެ.

ކޮންޒިއުމަރ މޯބައިލް އެކްސްޕީރިއަންސް އެނަލައިޒްކޮށް ގިންތި ކުރާ އޯޕަން ސިގްނަލްގެ އެންމެ ފަހުގެ ރިޕޯޓުގައި ބެސްޓް މޯބައިލް އެކްސްޕީރިއަންސް އެވޯޑްސް އުރީދޫއިން ހޯދާފައިވަނީ 6 ދާއިރާއަކުންނެވެ.

މިދިޔަ އަހަރުގެ އޯގަސްޓް މަހުގެ އެއްވަނަ ދުވަހުން ފެށިގެން އޮކްޓޯބަރު 29 އާއި ހަމައަށް ޑާޓާ އެއްކުރުމަށްފަހު އެކުލަވާލާފައިވާ މިރިޕޯޓްގައި ޑިސެމްބަރ 2022 ގެ ރިޕޯޓްގައި ޖުމްލަ ހަތް ދާއިރާއަކަށް ބަހާލައި އެވޯޑް ދީފައިވެއެވެ. މީގެ ތެރެއިން ހަ ދާއިރާއިން ބެސްޓް އެވޯޑްސް އުރީދޫއިން ހާސިލުކޮށްފައިވާއިރު، ހަތްވަނަ ދާއިރާއިންވެސް  އުރީދޫއިން އިންވަނީ ދިރާގާއި އެއް ހަމަ ކޮށްފައެވެ.

އުރީދޫއިން ހޯދާފައިވާ 6 ދާއިރާގައި ހިމެނެނީ، ވީޑިއޯ އެކްސްޕީރިއަންސްއާއި، ގޭމްސް އެކްސްޕީރިއަންސްއާއި، ވޮއިސް އެޕް އެކްސްޕީރިއަންސްއާއިޑައުންލޯޑް ސްޕީޑް އެކްސްޕީރިއަންސްއާއި، އަޕްލޯޑް ސްޕީޑް އެކްސްޕީރިއަންސްގެ އިތުރުން 4ޖީ ކަވަރޭޖް އެކްސްޕީރިއަންސްއެވެ.

ދިރާގުން އުރީދޫއާއި އެއްވަރުކޮށްފައިވަނީ ކަވަރޭޖް އެވެއިލެބިލިޓީ ކެޓަގަރީގައެވެ.

އޯޕަން ނެޓްވޯކްގެ އެ ރިޕޯޓްގެ ކީ ފައިންޑިންގްސް އަށް ބަލާލާއިރު ރާއްޖޭގައި ބެސްޓް މޯބައިލް ގޭމިންގް އެކްސްޕީރިއަންސް ނެޓްވޯކަކީ އުރީދޫ ކަމުގައި ބުނެފައިވެއެވެ. އެގޮތުން ކުރިއަށްވުރެ 7.1 ޕޮއިންޓްގެ ކުރިއެރުމެއް ހޯދައިގެން އުރީދޫއިން މި ދާއިރާ ކާމިޔާބުކޮށްފައިއެވަނީ 66.7 ޕޮއިންޓުންނެވެ. މިދާއިރާގައި ދިރާގު އުޅެނީ އުރީދޫއަށް ވުރެ 8.3 ޕޮއިންޓް ފަހަތުގައެވެ.

ރިޕޯޓްގައި ވާގޮތުން މޯބައިލް އަޕްލޯޑް އަދި ޑައުންލޯޑް ސްޕީޑްސްގައިވެސް ކުރި ހޯދާފައިވަނީ އުރީދޫއިން ކަމަށާއި އެގޮތުން ދިރާގަށްވުރެ 15.2 އިންސައްތަ އުރީދޫގެ އަޕްލޯޑް ސްޕީޑް ރަނގަޅު ކަމަށާއި 26.1 އިންސައްތަ ޑައުންލޯޑް ސްޕީޑް ދިރާގަށްވުރެ އުރީދޫ ރަނގަޅުކަމަށް ބުނެފައިވެއެވެ.

ވީޑިއޯ އެކްސްޕީރިއަންސް އަށް ބަލާއިރު ވީޑިއޯ އެކްސްޕީރިއަންސްގައި ދިރާގަށްވުރެ 10 ޕޮއިންޓް އަދި އޯޑިއޯ އެކްސްޕީރިއަންސްގައި ދިރާގަށްވުރެ 2.8 ޕޮއިންޓް އުރީދޫ ކުރި ހޯދާފައިވާކަން ރިޕޯޓުގައި ވެއެވެ.