ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކުގެ ކުލި ކުޑަކުރުމާއި ގުޅޭގޮތުން ސަރުކާރުން މަޝްވަރާކުރަން ފަށައިފިއެވެ.
މި މަޝްވަރާތައް ކުރާކަން ސަރުކާރުން ހާމަކޮށްފައި ވަނީ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙު "ހިޔާ ރައްޔިތުންގެ ގުޅުން" ޖަމިއްޔާއާއެކު ބޭއްވެވި ބައްދަލުވުމުގައެވެ.
އެ ބައްދަލުވުމުގައި ކުރުނު މަޝްވަރާތަކާއި ގުޅޭގޮތުން ވާހަކަދައްކަވަމުން އެ ޖަމިއްޔާގެ ސުޕާ އެޑްމިން އަލީ ރިފާއު ބުނީ، މި ބައްދަލު ކުރެއްވުމުގައި ބޮޑަށް މަޝްވަރާ ކުރެވިގެން ގޮސްފައި ވަނީ ހިޔާ ފްލެޓްތަކުގެ ކުލި ކުޑަ ކުރުމާއި ގުޅޭގޮތުން ކަމަށެވެ.
ހިޔާ ފްލެޓުތަކުގެ ކުލި ކުޑަކުރަން ރައީސްގެ ފަރާތުން ތިން ގޮތެއް ހުށާހަޅުއްވި ކަމަށް އޭނާ ބުންޏެވެ. އެގޮތުން ހިޔާ ފްލެޓްގެ ފިނިޝިންގ މަސައްކަތަށް ފްލެޓްގެ ވެރިން ނަގާފައިވާ ލޯނުތައް ހަލާސް ކުރެވެން ދެން އެ މުއްދަތަށް ކުލި ކުޑަކޮށްދިނުމާއި، މިހާރު ކުރިއަށްގެންދާ ސާވޭއަކަށް ފަހު ކޮންމެހެން ކުލި ކުޑަކޮށްދޭން ޖެހޭ މީހުންނަށް އެކަން ކޮށްދިނުމަށާއި، ފްލެޓުތަކުގެ ކުލި ހަމަހަމަކަމާއެކު ކުޑަކޮށްދިނުމެވެ.
ހަމަހަމަކަމާއެކު ފްލެޓްތަކުގެ ކުލި ކުޑަ ކުރުމަށް ރައީސް ހުށަހެޅުއްވި ހުށަހެޅުމުގައި ވަނީ އެ މަޝްރޫއަށް ނެގި ލޯނު 30 އަހަރަށް ދަންމާލުމަށް ފަހު ކުރިއަށް ގެންދިއުމަށެވެ. މީގެ ތެރެއިން މި ޖަމިއްޔާއިން އެދުނީ ހުރިހާ އެންމެންނަށް ހަމަހަމަކަމާއެކު މިކަން ކޮށްދެވޭނެ ގޮތެއް ހަމަޖައްސާ ދިނުމަށެވެ. މިއާއެކު ރައީސް ވަނީ އިކޮނޮމިކް ކައުންސިލް އާ މަޝްވަރާ ކުރެއްވުމަށްފަހު، މި ޖަމިއްޔާއާވެސް މަޝްވަރާ ކުރައްވާނެ ކަމަށް ވިދާޅުވެފައެވެ.
މީގެ އިތުރުން ވިނަރެސް ފްލެޓްތަކުގެ ޑައުންޕޭމެންޓް މަހުން މަހަށް ބަހާލައިގެން ދެއްކޭ ގޮތަށް ހެދުމަށް މި ޖަމިއްޔާއިން ރައީސްއަށް ހުށަހެޅިއެވެ. ހިޔާ މަޝްރޫޢުގައި މުޅިންވެސް ހިމެނެނީ 2 ކޮޓަރީގެ އެޕަޓްރަމަންޓްތަކެވެ. މެއިންޓަނަންސް ފީ ހިމެނޭހެން ކޮންމެ މަހަކު، ކުލީގެ ގޮތުގައި 8500 ރުފިޔާ ދައްކަންޖެހެއެވެ.
ޔުނިއަންއިން ބުނެފައިވަނީ ސަރުކާރުން މީގެކުރިން ސޯޝަލް ހައުސިންއަށް ދޫކޮށްފައިވާ 3 ކޮޓަރީގެ އެޕަރޓްމަންޓްތަކުގެ ކުލިވެސް މިއަށްވުރެ ހެޔޮކަމަށެވެ. އެހެންކަމުން މި ބައްދަލުވުމުގެ އެންމެ ބޮޑު ބޭނުމަކީވެސް އެ ޙައްގު، ހިޔާގެ ރައްޔިތުންނަށްވެސް ހޯދައިދިނުންކަމަށް އެ ޖަމުއިއްޔާއިން ބުނެއެވެ.
ސަރުކާރުން މީގެކުރިން ހާމަކޮށްފައިވާ މައުލޫމާތުތަކަށް ބަލާއިރު ހިޔާގައި އުޅޭ %40އަށްވުރެ ގިނަ ޔުނިޓަށް ގަވާއިދުން ކުއްޔެއް ނުދައްކައެވެ. "ހިޔާ ރައްޔިތުންގެ ގުޅުން" ޖަމުއިއްޔާއިން ބުނީ ކުލި ކުޑަކުރެވުމާއެކު ކުލި ދައްކާ މީހުންގެ އަދަދުވެސް އިތުރުވާނެކަމަށެވެ. އަދި އެކަމަށް ޖަމިއްޔާއިންވެސް ބާރުއަޅާ މަސައްކަތް ކުރާނެކަމަށެވެ.
ރައީސްއާއެކު ބޭއްވި ބައްދަލުވުމުގައި ހިޔާގެ ފެން ބިލްތަކަށް ސަބްސިޑީ ހޯދުމަށްވެސް މަޝްވަރާކުރިއެެވެ. ފްލެޓްތަކުގައި ފާހަނާ ފްލަޝްކުރުމަށްވެސް ބޭނުންކުރަމުން ދަނީ އެމްޑަބްލިއުއީއޭގެ ސަޕްލައި ފެންކަމުން، ބިލްތަކަށް ދައްކަން ޖެހޭ އަދަދު އެތައް ގުނައެއް ބޮޑުކަން ޖަމުއިއްޔާއިން ވަނީ ފާހަގަކޮށްފައެވެ.
ހުޅުމާލޭ ދެވަނަ ފިޔަވަހީގެ އާބާދީ އިތުރުވަމުން އައުމާއެކު، ބަހުގެ ޚިދުމަތަށް އޮތް ޑިމާންޑު ބޮޑެވެފައިވާތީ އެކަމަށް ލުއިފަސޭހަ ގޮތްތަކެއް ހޯދުމާއި ގުޅޭގޮތުންވެސް މި ބައްދަލުވުމުގައި ވަނީ މަޝްވަރާކޮށްފައެވެ.
