ޕާކިސްތާންގެ ކުރީގެ ބޮޑުވަޒީރު އަދި ކުރީގެ މަޝްހޫރު ކުރިކެޓް ކުޅުންތެރިޔާ އިމްރާންޚާން ހައްޔަރު ކުރުމަށް އެގައުމުގެ ފުލުހުން ހިންގަމުންދިޔަ އޮޕަރޭޝަން މެދުކަނޑާލުމަށް ޕާކިސްތާނުގެ ކޯޓަކުން ބުދަ ދުވަހު އޯޑަރު ކުރުމާއި ގުޅިގެން، ފުލުހުންގެ އޮޕަރޭޝަން މެދުކަނޑާލައިފިއެވެ.
އިމްރާން ޚާން ހައްޔަރު ކުރުމަށް ފުލުހުން ހިންގަމުންދިޔަ އޮޕަރޭޝަން މެދުކަނޑާލުމާއި ގުޅިގެން، ފުލުހުންނާއި އިމްރާން ޚާންގެ ސަޕޯޓަރުންނާ ދެމެދު ހިނގަމުންދިޔަ ހަމަނުޖެހުންތަކަށް މިހާރު ވަނީ ހުއްޓުމެއް އައިސްފައެވެ. ފުލުހުންވަނީ ފާއިތުވި ދުވަސްތަކުގައި އިމްރާން ޚާންގެ ސަޕޯޓަރުންނާއި ދެކޮޅަށް ކަރުނަގޭހާއި ފެން ބޭނުން ކޮށްފައެވެ.
ކޯޓު އަމުރާއި ގުޅިގެން ފުލުހުން މިހާރުވަނީ ޕާކިސްތާނުގެ އިރުމަތީ ސިޓީއެއް ކަމަށްވާ ލާހޫރުގައި ހުންނަ އިމްރާން ޚާންްގެ ގެ ހުންނަ ސަރަހައްދު ދޫކޮށް ގޮސްފައެވެ.
ޕާކިސްތާންގެ ޕްރޮވިންޝަލް އިންފޮމޭޝަން މިނިސްޓަރު އާމިރު މިރު ރޮއިޓާސްއަށް މައުލޫމާތު ދީފައިވާގޮތުގައި، އިމްރާން ޚާން ހައްޔަރު ކުރުމަށް ފުލުހުން ހިންގަމުން އައި ހުއްޓާލުމަށް އަމުރު ކޮށްފައިވަނީ މިހަފްތާގެ ބުރާސްފަތި ދުވަހާއި ހަމައށް ކަމުގައެވެ.
ޕާކިސްތާން ފުލުހުންގެ އިސް އޮފިޝަލަކު ކުރިން ހާމަކޮށްފައިވާ ގޮތުގައި، ސަލާމަތީ ބާރުތަކުން ސަރަހައްދު ދޫކޮށް ގޮސްފައިވަނީ، އެ ސަހަރައްދާއި ވަރަށް ކައިރީގައިވާ ސްޓޭޑިއަމެއްގައި ކުރިޔަށް، ކުރިކެޓްގެ ޕާކިސްތާން ސުޕަރ ލީގު ކުރިޔަށް ގެންދިއުމަށް ފުރުސަތު ދިނުމުގެ ގޮތުން ކަމުގައެވެ.
އިމރާން ޚާން ހައްޔަރު ކުރުމަށް ޕާކިސްތާންގެ ވެރިތަށް އިސްލާމްއާބާދުގެ ދަށު ކޯޓަކުން އަމުރު ކޮށްފައިވަނީ އޭނާގެ މައްޗަށް ކޮށްފައިވާ ދައުވާއަށް ޖަވާބުދާރީވުމަށް ކޯޓަށް ހާޒިރުވެފައި ނުވާތީކަމަށް ބުނެއެވެ.
އިމްރާން ޚާންގެ މައްޗަށް ތުހުމަތު ކޮށްފައިވަނީ، 2018 އިން 2022 އަށް އޭނާ ބޮޑުވަޒީރުކަމުގެ މަގާމްގައި ހުންނަވަނިކޮށް ބޭރުގެ އިއްޒަތްތެރިން ދީފައިވާ ބައެއް ހަދިޔާތަށް ގަވާއިދާ ޚިލާފަށް ވިއްކާފައިވާ ކަމުގެ ތުހުމަތުގައެވެ.
އިމްރާން ޚާން ކޮށްފައިވާ ޓުވީޓެއްގައި ވިދާޅުވެފައިވަނީ، މާރޗް 18ގެ ކުރިން ކޯޓަށް ހާޒިރުވާނެ ކަމުގެ ޔަގީންކަންދީ އޭނާ އެއްބަސްވުމެއްގައި ސޮއި ކޮށްފައިވާ ކަމުގައެވެ.
އިމްރާން ޚާންގެ އަރިސް މުޝީރެއް ކަމުގައިވާ ފަވަދު ޗައުދަރީ ވިދާޅުވެފައިވަނީ، އިމްރާން ޚާންގެ ޕާޓީ ކަމުގައި ޕާކިސްތާން ތެޚުރީކް އޭ އިންސާފް ޕާޓީގެ ފަރާތުން، ފުލުހުންގެ އަމަލުތައް ހުއްޓުވައިދިނުމަށް ކޯޓުގައި އެދިފައިވާ ކަމުގައެވެ.
ޕާކިސްތާންގެ އިންފޮމޭޝަން މިނިސްޓަރު މަރިޔަމް އައުރަންގޒެބް ފާއިތުވެދިޔަ އަަހަރު އާންމު ކޮށްފައިވާ ލިސްޓެއްގައި ވާގޮތުން އިމްރާން ޚާންއަށް ބޭރުގެ އިއްޒަތްތެރިންގެ ފަރާތުން ލިބިފައިވާ ހަދިޔާތަކުގެ ތެރޭގައި، 7 އަތުކުރީ ގަޑި ހިމެނެއެވެ. އޭގެ ތެރޭގައި 300،000 އެމެރިކާ ޑޮލަރުގެ އަގުހުރި ގަޑިއެއްވެސް ހިމެނެއެވެ.
އަދި މިލިސްޓުގައި އަގުބޮޑު ސެންޓާއި، ޑައިމަންޑް ޖަހާފައިވާ ގަހަނާ ސެޓްތައްވެސް ހިމެނެއެވެ.
