އިނޑިއާއި ރާއްޖެއާއި އޮތްގުޅުން، މި ވޭތުވެދިޔަ 4 އަހަރުގެ ތެރޭގައި މިއިން ދުވަހަކު ނުދާހާ ކުރިއަށް ހިނގައްޖެ ކަމުގައި ފޮރިން މިނިސްޓަރ ޝާހިދު ވިދާޅުވެއްޖެއެވެ.
އިންޑިއާގައި ކުރިޔަށްދާ ޖީ20ގެެ ފޮރިން މިނިސްޓަރުންގެ ބައްދަލުވުމަށް ވަޑައިގެން އިންޑިއާގެ ނޫހެއް ކަމަށްވާ އޭޝިއަން ނިއުސް އިންޓަނޭޝަނަލްއަށް ދެއްވި އިންޓަރވިއުއެއްގައި މިނިސްޓަރ ޝާހިދު ވަނީ އިންޑިއާއަށާއި ބޮޑު ވަޒީރު ނަރެންދުރަ މޯދީއަށް ތައުރީފް ކުރައްވާފައެވެ.
މިނިސްޓަރ ޝާހިދު ވިދާޅުވީ، އިނޑިއާއި ރާއްޖެއާއި އޮތްގުޅުން، މި ވޭތުވެދިޔަ 4 އަހަރުގެ ތެރޭގައި މިއިން ދުވަހަކު ނުދާހާ ކުރިއަށް ހިނގައްޖެކަމަށެވެ. އަދި މިކަން ހާމަވަނީ ދެ ޤައުމުގެ ސަރުކާރުގެ ލީޑަރޝިޕް ލެވެލްގެ ގުޅުން ރަނގަޅުވެފައިވާތީކަމަށެވެ. އެގޮތުން ރާއްޖެއާއި އިންޑިއާގެ ގުޅުން ދަމަހައްޓާ، ރާއްޖޭގެ ކުރިއެރުމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއަށް، އިންޑިއާގެ ބޮޑުވަޒީރު ނަރެންދްރަ މޯދީގެ ފަރާތްޕުޅުން ލިބެމުންދާ އެހީތެރިކަން މިނިސްޓަރ ފާހަގަކުރެއްވިއެވެ.
މިނިސްޓަރ ވަނީ ރާއްޖޭގެ ތަރައްޤީގެ މަޝްރޫޢުތަކަށް އިންޑިއާއިން ދެމުންދާ އެހީތައް ފާހަގަކުރައްވާފައެވެ. އެގޮތުން ތިލަމާލެ ބްރިޖާއި، ހަނިމާދޫ އިންޓަރނޭޝަނަލް އެއަރޕޯޓާއި، އައްޑޫސިޓީ ގަން އިންޓަރނޭޝަނަލް އެއަރޕޯޓް ތަރައްޤީކުރުމުގައި ލިބެމުންދާ އެހީތައް ފާހަގަކުރެއްވިއެވެ. އަދި ރައްޔިތުންނާ ސީދާ ގުޅުންހުރި މަޝްރޫޢުތައްކަމަށްވާ ކެންސަރ ހޮސްޕިޓަލް، ފެނާއި ނަރުދަމާ އަދި ކޮމިއުނިޓީ ސެންޓަރތައް ރަށްރަށުގައި ހެދުންފަދަ މަސައްކަތްތަކުގައި އިންޑިއާގެ އެހީތެރިކަން ލިބެމުންދާކަން ފާހަގަކުރެއްވިއެވެ.
މި އިންޓަވިއުގައި މިނިސްޓަރ ވަނީ އިންޑިއާ ކަނޑު ސަރަޙައްދުގެ ރައްކާތެރިކަން ކަށަވަރުކުރުމަށް، އިންޑިއާ ކަނޑުގެ ޤައުމުތައް ގުޅިގެން ކުރަމުންދާ މަސައްކަތް ފާހަގަކޮށްފައެވެ. ރާއްޖެއަކީ %99 ކަނޑު އޮންނަ ޤާއުމަކަށްވާއިރު، މި ދާއިރާއިން ރާއްޖެއާއި ޤައުމުތަކާއި އޮންނަ ގުޅުން ބަދަހިވުމަކީ ރާއްޖެއަށް ވަރަށް ބޭނުންތެރި ކަމެއްގެ ގޮތުގައި މިނިސްޓަރ ފާހަގަކުރެއްވިއެވެ.
ޝާހިދު ވިދާޅުވީ އިންޑިއާއަކީ އާބާދީ އެންމެ ބޮޑު އަދި އެންމެ ހަލުވިކަމާއެކު ކުރިއަރަމުން އަންނަ އިގްތިސާދު ކަމަށާއި ޖީ-20ގެ ޗެއާގެ މަޤާމު އިންޑިއާއިން އަދާކުރަމުންދަނީ އެކަން ދެނެހުރެ ވަރަށް ފުރިހަމައަށް ކަމަށެވެ. އަދި ބައިނަލްއަގްވާމީ ފެންވަރުގައި އިންޑިޔާގެ ލީޑަޝިޕް ފާހަގަކޮށްލެވޭ ކަމަށާއި މިއަދު އެންމެން ވެސް އިންޑިއާ ބަލައިގަންނަ ކަމަށް ޝާހިދު ވިދާޅުވިއެވެ. މިގޮތުން ޖީ20ގެ ސަމިޓަށް އަވައްޓެރި ޤައުމުތަކުގެ ވަޒީރުންނަށް ދައުވަތު އެރުވުމުން އިންޑިއާއިން އަވައްޓެރި ޤައުމުތަކާއެކު އޮންނަ ގުޅުން ފެނިގެންދާ ކަމަށް ވެސް ވިދާޅުވިއެވެ.
ޝާހިދު ވިދާޅުވީ، ރާއްޖޭގެ ތަރައްޤީގެ މަޝްރޫޢުތަކަށް އިންޑިއާއިން ނަގާފައިވާ ލޯނުތަކާއި، އަދި އިންޑިއާއިން އެކި މަޝްރޫޢުތަކަށް ހިލޭ އެހީގެ ގޮތުގައި ފޯރުކޮށްދޭ ޢަދަދުތަކުގެ ތަފްސީލްތައް ފުރިހަމައަށް ބަލަހައްޓަމުންދާކަމަށެވެ. އަދި އެ މަޢުލޫމާތަކީ ކޮންމެ މީހަކަށްވެސް ފަސޭހައިން ބެލޭގޮތަށް، ފިނޭންސް މިނިސްޓްރީއިންވެސް ޝާއިޢުކުރަމުންދާ މަޢުލޫމާތުކަމަށެވެ. މިނިސްޓަރ ވިދާޅުވީ، މިގޮތަށް ނެގޭ ކޮންމެ ފައިސާއެއް ހޭދަކުރެވެނީ ސީދާ ރައްޔިތު މީހާއަށް އޭގެ މަންފާ ކުރާނެ ބޭނުންތަކަށްކަމަށެވެ.
