ވެރިކަން ކުރާ މައި ޕާޓީ އެމްޑީޕީއާއި ކޯލިޝަން ހެދީ ލިބިދާނެ މަންފާއަކަށް ބަލައިގެން ނޫންކަމަށާއި، ޤައުމާއި ރައްޔިތުންގެ ހައްގުގައި ކަމަށް އެމްޑީއޭގެ ނައިބް ރައީސް އަލީ މައުރޫފް ވިދާޅުވެއްޖެއެވެ.

ކުރިއަށް އޮތް ރިޔާސާ އިންތިހާބަށް އެ ޕާޓީން އެހެން ޕާޓީއަކާ އެކު ކޯލިޝަން ހެެދުމާ ގުޅޭ ގޮތުން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މައުރޫފް ވިދާޅުވީ ރައީސް ޞާލިޙަށް ތާއީދުކުރަން ނިންމި އެންމެ މުހިންމެ އެއް ސަބަބަކީ ކޮވިޑްގެ ބަލިމަޑުކަމުގައި ގައުމުގެ ކަންކަން ހަމައަކަށް އަޅުވައި ބެލެހެއްޓުމުގައި އެމަނިކުފާނު ގެންގުޅުއްވި ސިޔާސަތު ކަމަށެވެ.

އަދި ފާއިތުވި ފަސް އަހަރު ދުވަހު ގައުމަށް އިގްތިސާދީ ހަމަޖެހުން ގެނައުމަށް ރައީސް ޞާލިޙް ކުރެއްވި މަސައްކަތް މައުރޫފް ވަނީ ފާހަގަކުރައްވާފައެވެ. އޭނާ ވަނީ ނިމިގެން ދިޔަ ދައުރުގައި ވެރިކަން ކުރި ޕީޕީއެމްއާ އެކު އެމްޑީއޭއިން ކޯލިޝަން ހަދައިގެން އުޅުނުއިރު ކުރިމަތިވި މައްސަލަތައް ވެސް ހާމަ ކުރައްވާފައެވެ.

އެގޮތުން އޭރު ކޯލިޝަން ހެދީ 20 ޕަސެންޓް ލިބޭ ގޮތަށް ކަމަށާއި ނަމަވެސް 10 ޕަސެންޓް ވެސް ނުލިބުނު ކަމަށެވެ. ނަމަވެސް ސިޔާމް އަކީ ވަރަށް ކެތްތެރި ބޭފުޅެއް ކަމަށް އޭނާ ވިދާޅުވިއެވެ. ނަމަވެސް މިއަދު އެމްޑީޕީއާއި ކޯލިޝަން މިހަދަނީ ލިބިދާނެ މަންފާއަކަށް ބެލުމެއްނެތި ރައްޔިތުންގެ ހައްގުގައިކަމަށް އޭނާ ވިދާޅުވިއެވެ.

އެމަނިކުފާނުގެ ފަސް އަހަރަކީ ވަރަށް ހަމަހިމޭން ފަސް އަހަރު. ރައީސް ޞާލިޙަކީ ވަރަށް ހިކުމަތްތެރި ބޭފުޅެއް. އަޅުގަނޑުމެންގެ ޕާޓީގެ ރައީސް ކޯލިޝަނެއް މި ހަދަނީ ސަރުކާރުން ލިބިދާނެ މަންފާތަކަކަށް ނޫން، ފައިދާތަކަކަށް ނޫން. މިނިސްޓަރު ކަމަކަށް ނޫން، ލިބިދާނެ މަގާމުތަކަކަށް ނޫން. ގައުމާއި ރައްޔިތުންނަށްޓަކާ ހެދޭ ކޯލިޝަނެއް މިއީ.

– އަލީ މައުރޫފް ވިދާޅުވިއެވެ.

ރައީސް ސާލިޙަށް ތައުރީފުކުރައްވައި ވާހަކަދައްކަވަމުން މައުރޫފް ވިދާޅުވީ، އެމްޑީއޭއިން ކުރިއަށް އޮތް ތަނުގައި މަސައްކަތް ކުރާނީ ރައީސްގެ ސިޔާސަތުތައް ތަންފީޒްކޮށް ރިޔާސީ އިންތިޚާބު ކާމިޔާބު ކޮށްދެއްވުމަށް ކަމަށެވެ.

އެމްޑީއޭއިން، ރިޔާސީ އިންތިޚާބުގައި ރައީސް ޞާލިހާއެކު ކުރިއަށްދާން ނިންމާފައިވާއިރު، އަދާލަތު ޕާޓީންވެސް ވަނީ ރިޔާސީ އިންތިޚާބުގައި އެމްޑީޕީއާއެކު ކޯލިޝަން ހެދުމަށް ނިންމާފައެވެ.

ރިޔާސީ އިންތިޚާބުގައި ވާދަ ނުކުރެއްވުމަށް ސިޔާމް ނިންމެވިއިރު، ދާދިފަހުން ސިޔާމް ވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި ބައްދަލުކުރައްވާފައެވެ. ނަމަވެސް އެ ބައްދަލުވުމުގެ ތަފްސީލެއް ހާމަކުރައްވާފައެއް ނުވެއެވެ. އެމްޑީޕީގެ ރިޔާސީ ޕްރައިމަރީއަށްފަހު އެޕާޓީން ވަނީ، ކޯލިޝަން ހެދުމުގެ ބާރު ރައީސް އިބްރާހީމް މުޙައްމަދު ޞާލިޙަށް ދެއްވާފައެވެ. އަދި ރައީސް ވަނީ ކޯލިޝަން ހެދުމުގެ ދަޢުވަތު ބައެއް ސިޔާސީ ޕާޓީތަކަށް ދެއްވާފައެވެ.