ހުޅުމާލެ ހޮސްޕިޓަލާއި އެޗް.ޑީ.ސީން ގުޅިގެން ހިޔާގެ 16ވަނަ ޓަވަރުގައި ޤާއިމްކުރި، ޖެނެރަލް ޕްރެކްޓިސް ކްލިނިކް، ރައީސުލްޖުމްހޫރިއްޔާގެ ނައިބު ބައިވެރިވެ ވަޑައިގެން މިއަދު ރަސްމީކޮށް ހުޅުވުމަށް ބޭއްވުނު ރަސްމިއްޔާތު ކުރިޔަށް ދަނިކޮށް، އެސަރަަހައްދުގައި ތިބި ހަފްލާގެ ބައިވެރިންނަށް އަމާޒުކޮށް ހިޔާގެ 15 ވަނަ ޓަވަރުގެ އެޕާޓްމަންޓްތަކުން ތިރިއަށް އެއްލި ފެންކޮތަޅުތަކެއް ތެރެއިން ކޮތަޅަކުން، އެޗްޑީސީގެ މާބަނޑު މުވައްޒަފެއްގެ ގައިގައި ޖެހި އަނިޔާވެޖެކަމަށް އެޗްޑީސީން ބުނެފިއެވެ.
އެޗްޑީސީން ނެރުނު ބަޔާނެއްގައި ބުނެފައިވަނީ ސިޔާސީ ބޭނުމަށް މަދުބަޔަކު އިސް ނަގައިގެން ރާވާ ހިންގާ، މުޖުތަމަޢުގެ މިންގަޑުތަކާއި ޚިލާފު މިފަދަ އަމަލުތައް ތަކުރާރުކޮށް ކުރަމުން ގެންދާތީ އެކަމާ ނިހާޔަތަށް ހިތާމަކުރާ ކަމަށެވެ. އަދި މި އަމަލު ހަރުކަށި އިބާރާތުން ކުށްވެރިކޮށް، ކަމާބެހޭ އިދާރާތަކައި ގުޅިގެން މިމައްސަލަ ބަލާނެކަމަށްވެސް އެޗްޑީސީން ބުނެފައި ވެއެވެ.
އެޗްޑީސީން ބުނެފައިވަނީ މި ހާދިސާއާއި ގުޅިގެން އަޅާންޖެހޭ އެއްވެސް ފިޔަވަޅެއް އެޅުމަށް އެކުންފުނިން ފަސް ނުޖެހޭނެ ކަމުގައެވެ.
އެޗްޑީސީގެ ބަޔާނުގައި އިތުރަށް ބުނެފައިވަނީ އެކުންފުނިން އަބަދުވެސް މަސައްކަތް ކުރަމުން ގެންދަނީ ހިޔާ ސަރަހައްދުގައި ދިރިއުޅޭ ފަރާތްތަކަށް ބޭނުންވާނެ ޚިދުމަތްތައް ފުރިހަމަޔަށް ފޯރުކޮށް ދިނުމަަށް ކަމުގައެވެ. މިގޮތުން މިއަދު ހުޅުވިގެންދިޔަ ޖީޕީ ކުލިނިކަކީ އެސަރަހައްދުގައި ދިރިއުޅޭ ފަރާތްތަަކަށް ފަސޭހަކަމާއެކު ސިއްޙީ ޚިދުމަތް ހޯދުމަށް މަގުފަހުވެގެން ދާނެ ކުލިނިކެއް ކަމުގައިވެސް އެޗްޑީސީން ބުނެފައި ވެއެވެ.
