ހުޅުމާލެ ހޮސްޕިޓަލާއި އެޗް.ޑީ.ސީން ގުޅިގެން ހިޔާގެ 16ވަނަ ޓަވަރުގައި ޤާއިމްކުރި، ޖެނެރަލް ޕްރެކްޓިސް ކްލިނިކް ރައީސުލްޖުމްހޫރިއްޔާގެ ނައިބު ރަސްމީކޮށް ހުޅުއްވައިދެއްވައިފިއެވެ.
މި ކުލިނިކް ހުޅުވުމަށް މިއަދު ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން ރައީސުލް ޖުމްހޫރިއްޔާގެ ނައިބު ވަނީ ސިއްޙީ ޙިދުމަތްތައް ރައްޔިތުންނާއި ވީހާވެސް ގާތުން ދިނުމަކީ ސަރުކާރުގެ އެއްމެ ބޮޑު އެއް އަމާޒުކަމުގައި ފާހަގަކުރައްވާފައެވެ.
މި ރަސްމިއްޔާތުގައި ވާހަކަ ދައްކަވަމުން އެޗް.ޑީ.ސީގެ މެނޭޖިންގ ޑިރެކްޓަރ ވަނީ އެޗް.ޑީ.ސީން ސަރުކާރާއި ގުޅިގެން ހުޅުމާލޭގެ ރައްޔިތުންނަށް ވަކިން ޙާއްސަކޮށް ހިޔާ ސަރަހައްދުގައި ދިރިއުޅުއްވާ ފަރާތްތަކަށް ބޭނުންވާނެ ޙިދުމަތްތައް ޤާއިމު ކުރުމަށް ގިނަ މަސައްކަތްތަކެއް ކުރެވިފައިވާކަން ފާހަގަ ކުރައްވާފައެވެ.
އެޗްޑީސީން ހާމަ ކޮށްފައިވާ ގޮތުގައި ހުޅުމާލެ ދެވަނަ ފިޔަވަހީގައި ހުޅުވާފައިވާ މި ކްލިނިކުން އާންމު ބަލިތަކަށް ފަރުވާ ލިބެން ހުންނާނެއެވެ. އޭގެ އިތުރުން މި ކްލިނިކުން ލެބޯޓްރީ ޓެސްޓްތައް ހެދޭނެ އިންތިޒާމާއި، ޕަބްލިކް ހެލްތު ޔުނިޓަކާއި، އެސްޓީއޯގެ ފާމަސީއެއްގެ އިތުރުން އެހެނިހެން ބައެއް ޚިދުމަތްތައްވެސް ވަނީ ގާއިމްކުރެވިފައެވެ. މި ކްލިނިކުން ހުކުރު ދުވަހާއި ސަރުކާރު ބަންދު ދުވަސްތައް ފިޔަވާ ކޮންމެ ދުވަހެއްގެވެސް ހެނދުނު 10:00 އިން ހަވީރު 5:00 އަށް ހިދުމަތް ލިބިގެންދާނެއެވެ.
ހުޅުމާލެ ދެވަނަ ފިޔަވަހީގެ ހިޔާ ސަރަހައްދަކީ ވަރަށް ބޮޑު އާބާދީއެއް އޮންނަ ސަރަހައްދެއްކަމުން މި ހުޅުވިގެންދާ ކްލިނިކްގެ ސަބަބުން އެ ސަރަހައްދުގައި ދިރިއުޅޭ ފަރާތްތަކަށް ވަރަށް ބޮޑު ފަސޭހައެއް ލިބިގެންދާނެކަން އެޗްޑީސީން ފާހަގަ ކޮށްފައި ވެއެވެ. އެޗްޑީސީން ބުނެފައިވަނީ އެކޯޕަރޭޝަނުން އަބަދުވެސް މަސައްކަތް ކުރަމުންދަނީ ހިޔާ ސަރަހައްދުގައި ދިރިއުޅޭ ފަރާތްތަކަށް ބޭނުންވާނެ ކަންކަން އެންމެ ފުރިހަމަ ގޮތުގައި ފޯރުކޮށްދިނުމަށް ކަމުގައެވެ
ހިޔާ ސަރަހައްދުގައި މީހުން އާބާދުވުމާއިއެކު މި ސަރަހައްދުގައި އާންމުން ބޭނުންވާނެ ޒަރޫރީ ހިދުމަތްތަކާއި އަދި އެހެނިހެން ހިދުމަތްތައްވެސް ފޯރުކޮށްދިނުމަށް ސަރުކާރާއި އެޗްޑީސީ ގުޅިގެން ދަނީ ގިނަ މަސައްކަތްތަކެއް ކުރެވެމުންނެވެ.
