ވެރިކަން ކުރާ މައި ޕާޓީ އެމްޑީޕީގެ ބޯހިޔާވަހިކަމުގެ އެއް ސިޔާސަތަކީ، ސަރުކާރުންނާއި ވިޔަފާރިތަކުން ވެސް ދޫކުރާ ފްލެޓްތަކުގެ ކުލި ދެއްކުމުގައި ދަށް ފަންތީގެ އާމްދަނީ ލިބޭ މީހުނަށް އިނާޔަތެއް ފޯރުކޮށްދިނުން ކަމަށް، އެ ޕާޓީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ހުޅުމާލޭ ހިޔާ ފްލެޓު ސަރަހައްދުގައި އެ ޕާޓީގެ މެމްބަރުންނާއެކު ބޭއްވެވި ބައްދަލުވުމެއްގައި ވިދާޅުވީ، ބޯހިޔާވަހިކަމުގެ މައްސަލަ ހައްލު ކުރުމަށްޓަކައި ސަރުކާރުން ބޮޑެތި ދަރަނި ނަގައިގެން އިމާރާތް ކޮށްފައި ހުންނަ ފްލެޓުތަކުގެ ކުލި ވިޔަފަރި އުސޫލުން ނެއްޓޭ މިންވަރަށް ތިރި ކުރުމަކީ އެންމެ އެކަށީގެންވާ ގޮތެއް ނޫން ކަމަށެވެ.
އޭގެ ބަދަލުގައި ސަރުކާރުން ބޯހިޔާވަހިކަމަށް ހާއްސަ އިނާޔަތެއް ދިނުން ރަނގަޅު ކަމަށާއި އެއީ އެމްޑީޕީގެ ސަރުކާރެއްގައި ގެންގުޅެން ޖެހޭ ސިޔާސަތެއް ކަމަށް ވިދާޅުވިއެވެ.
ސަރުކާރުގެ އިނާޔަތްތައް އަމާޒު ކުރަންޖެހޭ އެންމެ ނިކަމެތިންނަށް އިނާޔަތް ދެވޭނެ ގޮތަށް. މީހަކަށް ތަނެއް ދިނުމުން އޭނާ އެ ތަނުގައި ނޫޅެ އަދި މާ ބޮޑު އަގެއްގައި އެހެން މީހަކަށް އެތަން ކުއްޔަށް ދިނުމަކީ ރަނގަޅު ގޮތެއްގެ ނޫން.
– ނަޝީދު ވިދާޅުވިއެވެ.
މާލެއާ ކައިރި ފަޅުތައް ހިއްކައިގެން ބޯހިޔާވަހިކަން ދިނުމަށް ވުރެ ފުޅާ ދާއިރާއެއްގައި މާލެ ސަރަހައްދުގެ ބޯހިޔާވަހިކަމުގެ މަޝްރޫއު ހިންގަން ޖެހޭ ކަމަށް ނަޝީދު ވިދާޅުވި އެވެ. އެ ގޮތުން، މާލެ އަތޮޅުގެ މީހުން ދިރިއުޅޭ ރަށްރަށުގައި ފްލެޓްތައް އަޅައި، އެ ރަށްރަށުގެ އާބާދީ ބޮޑުކުރަން ޖެހޭ ކަމަށް ވިދާޅުވިއެވެ. ނަޝީދު ވިދާޅުވިގޮތުގައި، ހިޔާ ފްލެޓް ސަރަހައްދަށް މިއަދު ވަޑައިގަތުމުން އެ މަނިކުފާނަށް ހިތްހަމަޖެހުން ލިބިވަޑައިގަތެވެ. ރައްޔިތުންނަށް ދިރިއުޅެވޭ ގޮތް ހޯދައި ދެވޭނެ ކަމަށާއި ދައުލަތުގެ މާލިއްޔަތަށް ބުރަ ނުވެ، ދައުލަތް ނުދަރާ ކުރެވެން އޮންނަ އުސޫލަކުން ބޯހިޔާވެހިކަން ފޯރުކޮށްދެވޭނެ ކަމަށް ނަޝީދު ވިދާޅުވިއެވެ.
ކުރީގެ ރައީސް ޔާމީންގެ ސަރުކާރުގައި ހުޅުމާލޭގެ ފްލެޓްތަކާއި ބިނާތައް ގާއިމްކުރަން ނެގި ލޯނުގެ ސަބަބުން މި ސަރުކާރުން ޓެކްސް ބޮޑުކުރަން ޖެހުމަކީ އާންމު ރައްޔިތުންނަށް ލިބުނު ވަރަށް ބޮޑު ތަކުލީފެއް ކަމަށް ވިދާޅުވެ ދެ ސަރުކާރަށް ވެސް ނަޝީދު ފާޑުވިދާޅުވިއެވެ.
އެމްޑީޕީގެ ރިޔާސީ ޕްރައިމަރީ އޮތީ މި މަހުގެ 28 ވަނަ ދުވަހުގައެވެ. އެ ޕްރައިމަރީގައި ނަޝީދުގެ އިތުރަށް ދެން ވާދަކުރައްވަނީ ރައީސް ސޯލިހެވެ. ރައީސްގެ ސިޔާސަތުތަކަށާއި ސަރުކާރަށް ނަޝީދު އަންނަނީ ވަރަށް ބޮޑަށް ފާޑުވިދާޅުވަމުންނެވެ.
One Response
ޢުޑުގައި ހުރި ތަރިތައް ގެނޭ