ކުރިޔަށްދާ އެމްޑީޕީގެ ރިޔާސީ ޕްރަައީގައި ވާދަކުރައްވާ އެޕާޓީގެ ރައީސް މުހައްމަދު ނަޝީދު ކެމްޕޭން ކުރެއްވުމަށް ހިޔާ ޕްލެޓް ސަރަހައްދަށް ވަޑައިގަތުމުން ހިޔާ ފްލެޓްގައި ދިރިއުޅޭ ފަރާތްތަކުން ނަޝީދުއާއި ދެކޮޅަށް މުޒާހިރާކޮށް އަޑު އުފުލައިފިއެވެ.
ނަޝީދު މިއަދު ހިޔާ ފްލެޓް ސަރަހައްދަށް ކެމްޕޭން ކުރުމަށް ވަޑައިގަތީ، މިއަދު ހަވީރު 4:00 ގައި އެ ސަރަހައްދުގައި ހަވީރު ސައެއް އޮންނާނެ ކަމަށް އާންމުކޮށް އިއުލާން ކުރުމަށްފަހުއެވެ. ނަޝީދު މި ސަރަހައްދަށް ވަޑައިގަތުމަށް އެމްޑީޕީގެ މެމްބަރުންނަށް ދައުވަތު ދިނުމާއެކު، މި ސަރަހައްދުގައި މުޒާހިރާ ކުރާނެކަން، ކޮމޮނަރސް ފްރެންޑްޝިޕް އެސޯސިއޭޝަންގެ ނަމުގައި އުފައްދާފައިވާ ހިޔާފްލެޓްގައި ދިރިއުޅޭ ފަރާތްތައް ތަމްސީލުކުރާ ޖަމިއްޔާއިން އިއުލާން ކޮށްފައި ވެއެވެ.
މިގޮތުން މި ޖަމިއްޔާއިން ކުރި ޓުވީޓެއްގައި ބުނެފައިވަނީ އެއްކަލަ ކޮތަރު ކޮށި މިއަދު ގަނޑުވަރަކަށް ވެއްޖެ ކަމަށާއި، އެއްކަލަ އަލިފާން ފޮށި މިއަދު ފެންނަނީ ވޯޓު ފޮށީގެ ގޮތުގައި ކަމަށެވެ.
އެއްކަލަ އަގެއްނެތް ނިކަމެތިން މިއަދު އަގުހުރި ރައްޔިތުންނަށް ވެއްޖެއެވެ. މަޖިލިސް ރައީސްގެ ހައިސިއްޔަތުން ކުލި ފަސްކުރަން އެއްވެސް ކަމެއް ނުކުރިތާ އެކަމާ ބެހޭ ގޮތުން އެދުވަހު އެއްޗެއް ބުނެލާކަށްވެސް ނަޝީދު ބޭނުންފުޅު ނުވިއެވެ.
ހިޔާ ފްލެޓްގައި ދިރިއުޅޭ މީހުން ތަމްސީލުކުރާ ޖަމިއްޔާއިން ކުރި ޓުވީޓުގައި ބުނެފައިވެއެވެ.
އެއަށްފަހު ނަޝީދު ހަވީރު މިސަރަހައްދަށް ވަޑައިގަތުމާއެކު، މެގަ ފޯނުގެ ބޭނުން ކޮށްގެން ހިޔާ ފްލެޓްގައި ދިރިއުޅޭ ބައެއް ފަރާތްތަކުން ނަޝީދާއި ދެކޮޅަށް އަޑު އުފުލާފައިވެއެވެ. އެފަރާތްތަކުން ގޮވަމުން ދިޔައީ އިއްޔެ ނަޝީދު ވިދާޅުވެފައިވަނީ ތިމަންނާއަކީ ސަރުކާރު ނޫންކަމަށާއި، ކުރެވޭނެ ކަމެއް ނެތްކަމަށް އޭރު ވިދާޅުވިއަސްވެސް މިއަދު މި ފްލެޓްތަކުގައި ދިރިއުޅޭ ރައްޔިތުން ފެނިއްޖެ ކަމުގައެވެ.
މިއީ ކޮތަރު ކޮށި. އިއްޔެ މިތަން ކޮތަރު ކޮއްޓަކަށް ވީ. މިއަދު މިތަން ގަނޑުވަރަކަށް ވެއްޖެ. ރައްޔިތުން ފެނިއްޖެ މިއަދު. މިއަދު މިތިބީ ރައްޔިތުން. މިއަދު ރައްޔިތުން ފެނިއްޖެ. އިއްޔެ ބުނީ ތިމަންނައަށް ކުރެވޭނެ ކަމެއް ނެތޭ. ތިމަންނަ މީ ސަރުކާރެއް ނޫނޭ. އެކަމަކު މިއަދު ރައްޔިތުން ފެނިއްޖެ.
ނަޝީދުއާއި ދެކޮޅަށް، މެގަފޯނުގެ ބޭނުންކޮށްގެ ޝުއޫރު ފާޅުކުރަމުން އަޑު އުފުލާފައި ވެއެވެ.
މިއަދު ހިޔާ ފްލެޓްތަކުގައި ދިރިއުޅޭ ފަރާތްތަކާއި ބައްދަލުކޮށް ވާހަކަ ދައްކަވަމުން ނަޝީދު ވިދާޅުވީ އެމްޑީޕީގެ ދެން އަންނަ ވެރިކަމެއްގައި، ކުލި ދެއްކުމަށް ދަތިވެފައިވާ ރައްޔިތުންނަށް ސަރުކާރުން އިނާޔަތް ފޯރުކޮށްދޭނެ ކަމުގައެވެ.
ކުލި ދެއްކުމަށް ޓަކައި، އިތުރު އެހީއެއް ދިނުމަކީ ސަރުކާރަށް ކުރެވެން އޮތް ކަމެއް، އެމްޑީޕީގެ ދެން އަންނަ ސަރުކާރެއްގައި ކޮންމެހެން ކުރަން ޖެހޭ ކަމެއް.
ހިޔާ ފްލެޓްގައި ދިރިއުޅޭ އެމްޑީޕީގެ މެމްބަރުންނާއި މުޚާތަބްކޮށް ވާހަކަ ދައްކަވަމުން ނަޝީދު ވިދާޅުވެފައި ވެއެވެ.
