ޕޯޗުގަލްގެ ކްރިސްޓިއާނޯ ރޮނާލްޑޯ، އުމުރުން 37 އަހަރުގައި ޔޫރަޕުގެ ފުޓްބޯޅަ ދޫކޮށް، ސައޫދީ އަރަބިއްޔާގެ އައް ނަސްރު އަށް ދެ އަހަރު ދުވަހުގެ ކޮންޓްރެކްޓެއްގެ ދަށުން ބަދަލުވެއްޖެއެވެ.
ދެ އަހަރުގެ ކޮންޓްރެކްޓެއްގައި ރޮނާލްޑޯ، އަލް ނަސްރަށް ބަދަލުވިއިރު، އެ ކްލަބުން އޭނާ އަށް ސީޒަނެއްގެ މައްޗަށް ޖެހޭ މުސާރަ އަކީ މިހާތަނަށް ފުޓްބޯޅަ ކުޅުންތެރިއަކަށް ލިބޭނެ އެންމެ ބޮޑު މުސާރައެވެ. ސައުދީ އަރަބިއްޔާގެ މީޑިއާ ރިޕޯޓްތައް ބުނާގޮތުން، ނަސްރުން ރޮނާލްޑޯއާ އެކު ސޮއިކުރި ދެ އަހަރުގެ ކޮންޓްރެކްޓްގެ ޖުމްލަ އަގު، 200 މިލިއަން ޑޮލަރަށް ވުރެ ބޮޑުވާނެއެވެ.
މިއީ ރޮނާލްޑޯގެ ފުޓްބޯޅަ ކެރިއަރުގައި ޔޫރަޕް ނޫން ގައުމެއްގެ ކްލަބަކަށް ކުޅޭ ފުރަތަމަ ފަހަރެވެ. އޭނާ ވަނީ ކުރިން ޔޫރަޕްގެ ހަަތަރު ގައުމުގައި ކުޅެފައެވެ. އެއީ ޕޯޗުގަލް، އިންގްލެންޑް، ސްޕެއިން އަދި އިޓަލީގައެވެ.
އަހަރެން މި ހުރީ ވަރަށް އުފަލުން، މި ޓީމުގައި ތިބި ކުޅުންތެރިންނާ އެކު އެކުގައި ގިނަ ކާމިޔާބީތަކެއް ހޯދަން ބޭނުން.
– ރޮނާލްޑޯ ބުންޏެވެ.
ބެލެވޭ ގޮތުގައި، މި 200 މިލިއަން ޔޫރޯގެ ތެރޭގައި ސައޫދީން 2030 ވަނަ އަހަރުގެ ވޯލްޑް ކަޕުގެ ހޯސްޓިން ރައިޓްސް ހޯދުމަށް ކުރާ މަސައްކަތުގައި ރޮނާލްޑޯގެ އެހީތެރިކަން ހޯދައިގެން ދޭ ފީ ވެސް ހިމެނޭނެއެވެ. އެހެންވެއްޖެ ނަމަ އޭނާ މަސައްކަތްކުރާނީ ސައުދީގެ ކެމްޕެއިނުގެ އެމްބެސެޑަރެއްގެ ގޮތުގައެވެ.
ރޮނާލްޑޯ އައް ނަސްރުގެ ކޮންޓްރެކްޓުގައި ސޮއިކުރީ ރޭގެ ވަގުތެއްގައި ސްޕެއިނުގެ މެޑްރިޑުގަ އެވެ. އޭނާ ސައޫދީ އަށް ގޮސް ކްލަބާ ގުޅޭނީ ފެށޭ ހަފުތާގައެވެ. އިންގްލެންޑުގެ މެންޗެސްޓާ ޔުނައިޓެޑަށް މިދިޔަ ދޮޅު އަހަރު ކުޅުނު ރޮނާލްޑޯ ކްލަބެއް ނެތި ފްރީ އޭޖެންޓަކަށް ބަދަލުވީ، އެ ކްލަބުގެ ކޯޗާއި މެނޭޖްމަންޓަށް ފާޑުކިޔައި، އިނގިރޭސި ނޫސްވެރިޔާ ޕިއާސް މޯގަން އަށް އިންޓަވިއު ދިނުމުން، ކްލަބުން ކޮންޓްރެކްޓް އުވާލުމުންނެވެ.
އަލް ނަސްރަށް ސޮއިކުރުމަށްފަހު 37 އަހަރުގެ ރޮނަލްޑޯ ބުނީ އާ ގައުމެއްގެ އާލީގެއްގައި ތަޖުރިބާކުރަން ތައްޔާރަށް ހުރިކަމަށެވެ. އަދި ޔޫރަޕްގައި ހުރިހާ ކާމިޔާބީއެއް ލިބިއްޖެ ކަމަށާއި, މިއީ އޭޝިޔާގައި ތަޖުރިބާކުރަން އެންމެ ރަނގަޅު ވަގުތުކަމަށް ދެކޭކަމަށް ރޮނަލްޑޯ ބުނެފައިވެއެވެ.
Here’s Cristiano Ronaldo with Al Nassr shirt after contract signed until June 2025 🚨🇵🇹🇸🇦 #Ronaldo
▫️ Agreement valid for two years and half;
▫️ Total salary will be close to €200m per year, but this includes commercial deal.
It’s the biggest salary ever in football. pic.twitter.com/ZnOg8lY6Wb
— Fabrizio Romano (@FabrizioRomano) December 30, 2022
ނުވަ ފަހަރު ސައުދީ ޕްރޯ ލީގު ކާމިޔާބުކޮށްފައިވާ އަލް ނަސްރުން ދެކެނީ ރޮނަލްޑޯ އެކްލަބަށް ސޮއިކުރުމަކީ ތާރީޚު ބަދަލުކޮށްލުން ކަމަށެވެ. އަދި މިއީ އެކްލަބާއި, އެގައުމާއި, އެގައުމުގެ ކުރިމަގަށް ނިކުންނަން ތިބި ކުޅުންތެރިންނަށްވެސް ހިތްވަރެއް ކަމަށް ބުނެފައިވެއެވެ. މީގެކުރިން މިސީޒަންގައި ރޮނަލްޑޯ ވަނީ ސައުދީގެ އަލްހިލާލްގެ ހުށަހެޅުމަށް ނޫނެކޭ ބުނެފައެވެ. އޭރު އެކްލަބަށް ނޫނެކޭ ބުނީ މެންޗެސްޓަރ ޔުނައިޓެޑްގައި މަޑުކުރުމަށެވެ. އެކަމަކު ޔުނައިޓެޑާ މައްސަލަޖެހި ވަރލްޑްކަޕް ފެށެން ވެފައިވަނިކޮށް, އެކްލަބްގެ އެއްބަސްވުން ނިމުމަކަށް ގެނައުމުން ރޮނަލްޑޯ ހުރީ ދާނެ ކްލަބެއް ނެތިފައެވެ.
