އިންގްލިޝް ޕްރިމިއަރ ލީގުގެ އެންމެފަހުގެ ޗެމްޕިއަން މެންޗެސްޓަރ ސިޓީއަށް ކުޅޭ ނޯވޭގެ ފޯވަޑް އަރލިންގ ހާލަންޑަށް ލިއޮނެލް މެސީ އާއި ކްރިސްޓިއާނޯ ރޮނާލްޑޯ އެކޭ އެއްވަރަށް ލަނޑު ޖެހުމުގެ ފުރުސަތު އެބައޮތް ކަމަށް ގަބޫލް ކުރާ ކަމުގައި ކެވިން ޑި ބްރުއިނަރ ހާމަކޮށްފިއެވެ.
މިހާތަނަށް ކުޅުނު ހުރިހާ ކްލަބެއްގައިވެސް ލަނޑު ޖެހުމުގައި ފާހަގަކޮށްލެވޭ ކާމިޔާބީތަކެއް ހާސިލްކޮށްފައިވާ ހާލަންޑް މިސީޒަންގައި ސިޓީ އާއި ގުޅުމަށްފަހު މިހާތަނަށް ސީޒަންގެ ކުރީބައި ގޮސްފައިވަނީވެސް ވަރަށް ކާމިޔާބުކޮށެވެ. މިގޮތުން މިހާތަނަށް ސިޓީއަށް ކޫލެދިން 19 މެޗްގައި އޭނާވަނީ 24 ލަނޑު ކާމިޔާބުކޮށްދީފައެވެ.
ޑި ބްރުއިނަރ ހާމަކުރިގޮތުގައި ހާލަންޑްގެ ކިބައިގާ ފުޓްބޯޅަ ދުއް މޮޅެތި ކުޅުންތެރިންގެ ލިސްޓަން އެރުމުގެ ފުރުސަތު އެބައޮތް ކަމަށެވެ. ޑި ބްރުއިނަރ ހާމަކުރިގޮތުގައި ހާލަންޑް މިހާރުވެސް ވަނީ ދުއިސައްތައެއްހާ ލަނޑު ކާމިޔާބުކޮށްފައިކަމަށާއި އޭނާ މިހާރު އެކުޅޭގޮތަށް ގިނަ އަހަރު ތަކެއްވަންދެން ކުޅުން ދެމެހެއްޓިއްޖެނަމަ ހަ ސަތޭކަ، ހަތްސަތޭކަ ނުވަތަ އަށް ސަތޭކަ ލަނޑު ޖެހުމަކީވެސް ވެދާނެކަމެއް ކަމަށެވެ. ޑި ބްރުއިނަރ ގަބޫލް ކުރާގޮތުގައި ހާލަންޑަކީ ފާހަގަ ކޮށްލެވޭ މޮޅު ފޯވަޑެކެވެ. އަދި މިވަގުތު އެންމެ މަތީ ފެންވަރުގައި ހާލަންޑްގެ ނަން ގުނާލެވޭނެއެވެ.
އަދި މި ސީޒަންގައި ސިޓީއިން ހޯދާ ކާމިޔާބީތަކެއްގައި ހާލަންޑްގެ ދައުުރު ވަރަށް ބޮޑު ވެގެންދާނެކަމަށާއި ނަމަވެސް އެކަމަށް އޭނާ ރަނގަޅަށް ފިޓްކޮށް ހުރުން ވަރަށް މުހިންމުކަމަށްވެސް ގިނަ ފަރާތްތަކުން ގަބޫލް ކުރެއެވެ. އަދި މިފަހަރުގެ ވާރލްޑް ކަޕް ތަށި އުފުލާލި އާޖެންޓީނާގެ ފޯވަޑް ހޫލިއަން އަލްވަރޭޒް އެނބުރި އައުމާއެކު މިދެކުޅުންތެރިން އެކުގައި ކުޅޭތަން ފެނިގެންދިއުން ވަރަށް ގާތްކަމަށްވެސް ގިނަ ބަޔަކު ގަބޫލް ކުރެއެވެ.
ޑި ބްރުއިނަރ ހާމަކުރިގޮތުގައި އަލްވަރޭޒް ސިޓީއަށް ބަދަލުވުމާއެކު އޭނާގެ ހުނަރުވެރިކަން ވަރަށް ރަނގަޅަށް އެނގިގެންދިޔަ ކަމަށެވެ. އަދި ސީޒަންގެ ފަހު ބައިގާ މިދެކުޅުންތެރިންގެ ތިބުމުގެ ފައިދާ ވަރަށް ބޮޑަށް ކުރާނެކަމަށްވެސް ޑި ބްރުއިނަރ ހާމަކުރިއެވެ.
