ޕެނަލްޓީ ޖަހައިގެން އެންމެ ފަހުގެ ޗެމްޕިއަން ފްރާންސް ބަލިކޮށް އާޖެންޓީނާއިން ތިންވަނަ ފަހަރަށް އުފުލާލި ފީފާ ވޯލްޑް ކަޕުގެ ތައްޓާއެކު އެނބުރި ގައުމަށް ދިއުމުން އެ ޤައުމުގެ ރައްޔިތުން ހޫނު މަރުހަބާއެއް ކިޔައިފިއެވެ.
ގަތަރުގެ ލުސައިލް ސްޓޭޑިއަމްގައި އާދީއްތަ ދުވަހުގެރޭ ކުޅުނު ފައިނަލް މެޗު އާޖެންޓީނާއިން ކާމިޔާބުކުރީ ޕެނަލްޓީގައި 4-2 ގެ ނަތީޖާއަކުން މޮޅުވެގެންނެވެ.
މި މެޗުގެ ފުރިހަމަ ވަގުތު ހަމަވީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ. އަދި ނަތީޖާ ނެރުމަށް ކުޅުނު އިތުރު ވަގުތުގެ ދެ ހާފު 3-3 ގެ ނަތީޖާއަކުން އެއްވަރުވެފައި އޮތުމުން ވަނީ ޕެނަލްޓީ ޖަހާފައެވެ.
ތައްޓާއެކު އާޖެންޓީނާއަށް ދިއުމުން އެ ގައުމުގެ ގިނަ އަދަދެއްގެ ރައްޔިތުން ވަނީ އެއާޕޯޓަށް ޖަމާވެފައެވެ. އަދި ތައްޓާއެކު އާޖެންޓީނާ ކުޅުންތެރިން ވަނީ އެ ގައުމުގެ ވެރިރަށުގައި ބުރެއް ޖަހާފައެވެ. އުފާފާޅުކުރުމުގެ ގިނަ ހަރަކާތްތަކެއް އެ ގައުމުގައި މިއަދާ މާދަމާވެސް ކުރިޔަށްދާނެ ކަމަށް އެ ގައުމުގެ ސަރުކާރުން މައުލޫމާތުދެއެވެ.
Los campeones del mundo ya están en casa 🇦🇷🏆
¡Gracias por tanto cariño! ❤️ pic.twitter.com/usGKj4l7ql
— 🇦🇷 Selección Argentina ⭐⭐⭐ (@Argentina) December 20, 2022
އަދި އުފާފާޅުކުރުމަށް ވަގުތު ދިނުމުގެ ގޮތުން މިއަދަކީ އާޖެންޓީނާ ސަރުކާރު ބަންދު ދުވަހެއްގެ ގޮތުގައި އެ ގައުމުގެ ސަރުކާރުން ވަނީ އިއުލާނުކޮށްފައެވެ. މި ތައްޓާއެކު މެސީގެ އުފަން ސަރަހައްދަށް ދިއުމަށްވެސް ވަނީ ހަމަޖެހިފައެވެ. އަދި ޗެމްޕިއަންކަން ހޯދި ޓީމުގެ ކޮންމެ ކުޅުންތެރިއަކަށް އަގުހުރި ގިނަ އިނާމުތަކެއް ދިނުމަށް އެ ގައުމުގެ ސަރުކާރުން ނިންމާފައިވާ ކަމަށްވެސް މީޑިއާ ރިޕޯޓުތައް ބުނެއެވެ.
📸 Postales de una noche inolvidable 🥹 pic.twitter.com/Zmd78w2Xqc
— 🇦🇷 Selección Argentina ⭐⭐⭐ (@Argentina) December 20, 2022
މިއީ އާޖެންޓީނާއިން ވޯލްޑް ކަޕް ޗެމްޕިއަންކަން ހޯދި ތިންވަނަ ފަހަރެވެ. މީގެ ކުރިން 1986 ވަނަ އަހަރާއި 1978 ވަނަ އަހަރު އާޖެންޓީނާއިން ވަނީ މި މުބާރާތް ކާމިޔާބު ކޮށްފައެވެ. އަނެއްކޮޅުން 2014 ވަނަ އަހަރުގެ ފައިނަލަށްފަހު އާޖެންޓީނާއިން މި މުބާރާތުގެ ފައިނަލުގައި ކުޅުނު މިއީ ފުރަތަމަ ފަހަރެވެ.
