ދުނިޔޭގެ ފުޓުބޯޅައިގެ ގަދަބާރު ޕޯޗުގަލް ބަލިކޮށް މޮރޮކޯއިން ވޯލްޑްކަޕްގެ ސެމީ ފައިނަލަށް ދަތުރުކޮށްފިއެވެ.
މިއީ ބައިނަލް އަގުވާމީ ފުޓުބޯޅާގައި އެޤައުމަށް ލިބިގެންދިޔަ އެންމެބޮޑު ކާމިޔާބީއެވެ. މިރޭގެ މެޗްގައި މޮރޮކޯއިން ވަނީ މެޗު ފެށުނީއްސުގެ ވަރުގަދައަށް ޑިފެންސްކޮށް، ދޭތެރެ ދޭތެރެއިން ދިޔައީ ޕޯޗުގަލް ގޯލަށް ނުރައްކާ ކުރަމުންނެވެ.
މިރޭގެ މެޗުގައި މޮރޮކޯގެ ހަމައެކަނި ގޯލް ކާމިޔާބުކުރީ ފުރަތަމަ ހާފުގެ 42 ވަނަ މިޓުގައި ޔޫސުލް އަލް ނަސީރީ ކާމިޔާބުކުރި ގޯލުންނެވެ. އޭނާގެ މިގޯލަކީ އެެރިއާތެރެއަށް ނެގި ހުރަހަކުން ބޮލުން ޖެހި ހިތްގައުމު ގޯލެކެވެ. ނަސީރީއަކީ ސްޕެއިންގެ ސެވިއްޔާއަށް ކުޅެމުންދާ އިތުރުބާރު ފޯވާޑެެކެވެ.
ޕޯޗުގަލްގެ ތަރި ރޮނާލްޑޯ މިރޭގެ މެޗުވެސް ފެށީ ބެންޗުންނެވެ. ނަމަވެސް ފަހުހާފު ފެށުމާއިއެކު އޭނާ ވަނީ ކުޅެންނެރެފައެވެ. ނަމަވެސް ރޮނާލްޑޯގެ ފަރާތުން ނުރައްކާތެރި އެއްވެސް ހަމަލާއެއް މިރޭގެ މެޗުގައި ފެނިފައި ނުވެއެވެ. މެޗުގެ އެންމެ ރަނގަޅު ފުރުސަތެއް މެޗު ނިމެން މިނިޓެކަށް ވެފައި ވަނިކޮށް ލުބުނީ ޕޯޗުގަލެ ޑިފެންޑަރު ޕެޕޭއަށެވެ. ނަމަވެސް އޭނާ ބޮލުން ފޮނުވާލި ބޯޅަ ދިޔައީ ގޯލް ގަނޑިކައިރިން ބޭރަށެވެ.
މިރޭގެ މެޗު ނިމުމާއިއެކު ރޮނާލްޑޯ ވޯލްޑްކަޕްގެ ތައްޓަށް ކުރަމުންދިޔަ އުންމީދު ވަނީ ނިމުމަކަށް އައިސްފައެވެ. ކެރިއަރުގައި ހޯދަން އެންމެ ބޭނުންވި ކާމިޔާބީ ނުލިބި މުބާރާތާއި ވަކިވާން ޖެހުމުން ރޮނާލްޑޯ ވަނީ ވަރަށް ބޮޑަށް މާޔޫސްވެފައެވެ. އޭނާ ވަނީ މެޗު ނިމުމާއިއެކު ރޮމުން ޗޭންޖިން ރޫމަށް ގޮސްފައެެވެ.
ފީފާ ވޯލްޑް ކަޕްގެ ގަދަ 16ގެ ބުރުގައި ސްޕެއިން އަތުން ޕެނަލްޓީ ޖަހައިގެން މޮޅުވެ މޮރޮކޯ މުބާރާތުގެ ކުއާޓާ ފައިނަލުން ޖާގަ ހޯދިއިރު، މިރޭގެ ޕޯޗުގަލް ބަލިކޮށް ސެމީ ފައިނަލަށް ދިއުމަކީ އެ ގައުމަށް ތާރީހީ ކާމިޔާބެކެވެ. ވަކިން ހާއްސަކޮށް މި ކާމިޔާބާއެކު، މޮރޮކޯގެ ކޯޗު ވާލިދު ރެގްރާގީ އަށް ވެސް ވަނީ ވަރަށް ހާއްސަ ފަހުރެއް ލިބިފައެވެ. ރެގްރާގީ އަކީ ވޯލްޑް ކަޕްގެ ކުއާޓާ ފައިނަލަށް ޓީމެއް ގެންގޮސްދިން އެފްރިކާގެ ފުރަތަމަ ކޯޗެވެ.
މިރޭގެ މެޗުން މޮޅުވި މޮރޮކޯ ސެމީގައި ވާދަކުރާނީ މިރޭ 12:00 ހާއިރު ކުޅޭ ފްރާސް، އިންގްލެންޑް މެޗުން މޮޅުވާ ޓީމަކާއެވެ.
