ދުނިޔޭގެ އެންމެ ބާރުގަދަ ޓަރަވަލް ޑޮކިއުމަންޓް ނުވަތަ ޕާސްޕޯޓަކީ، ދުބާއީވެސް އެގައުމަކަށް ނިސްބަތްވާ ޔޫއޭއީކަމުގައި ވެއްޖެއެވެ.
ޔޫއޭއީގެ ޕާސްޕޯޓަކީ ދުނިޔޭގެ އެންމެ ބާރުގަދަ ޕާސްޕޯޓުކަން އިއުލާން ކޮށްފައިވަނީ އާރޓަން ކެޕިޓަލްއިން އާންމުކުރި ދުނިޔޭގެ ޕާސްޕޮޓު އިންޑެކްސްއިން އެއްވަނަ ހާސިލް ކޮށްގެންނެވެ. އާރޓަން ކެޕިޓަލްއިންވަނީ އެންމެ ވަރުގަދަ ޕާސްޕޯޓު ނިސްބަތްވާ ޔޫރަޕްގެ 10 ގައުމެއް ފީޗަރ ކޮށްފައެވެ.
އާރޓަން ކެޕިޓަލްއިން އާންމު ކޮށްފައިވާ ޕާސްޕޯޓު އިންޑެކްސްގައި ވާގޮތުން ޔޫއޭއީގެ ޕާސްޕޯޓާއެކު އެއްވެސް ދައްޗަކާއި ނުލާ ދުނިޔޭގެ 180 ގައުމަކަށް ދަތުރު ކުރުމުގެ ފުރުސަތު އޮންނައިރު، މިއީ ޔޫރަޕްގެ ގައުމުތައް ކަމުގައިވާ ޖާމަނީއާއި ސުވިޑްންއަށްވުރެ 7 ގައުމު އިތުރު އަދަދެކެވެ. އަދި މިއީ، މިއަހަރު ކުރީކޮޅު ހެންލޭ އެންޑް ޕާޓްނާސްއިން އާންމުކުރި ލިސްޓުގައި ދުނިޔޭގެ އެންމެ ބާރުގަދަ ޕާސްޕޯޓު އޮތް ގައުމު ކަމުގައިވާ ޖަޕާނަށް ވުރެ 9 ގައުމު އިތުރު އަދަދެއްވެސް މެއެވެ.
އާރޓޮންސް އިންޑެކްސްގައި ވާގޮތުން ޖަޕާން 24 ވަނާގައި ރޭންކު ކޮށްފައިވާއިރު، އެގައުމުގެ ޕާސްޕޯޓު ބޭނުން ކޮށްގެން އެއްވެސް ދަތިކަމަކާ ނުލާ ދަތުރު ކުރެވެނީ 171 ގައުމަކަށެވެ.
ފާއިތުވެދިޔަ ކޯވިޑް ކާރިސާގައި، ދުނިޔޭގެ ގިނަ ގައުމުތަކެއްގެ ބޯޑަރުތައް ބަންދުކޮށް ލޮކްޑައުންއަކަށް ދިޔައިރުވެސް މުޅި ޔޫއޭއީ ލޮކްޑައުންއަކަށް ގޮސްފައެއް ނުވެއެވެ. އޭގެ ބަދަލުގައި އެގައުމުން އިސްކަން ދީފައިވަނީ މާސްކު އަޅައިގެން އުޅުމަށް މަޖުބޫރު ކުރުވުމާއި ފުޅާ ދާއިރާއެއްގައި ވެކްސިން ޖެހުމަށެވެ.
މިގޮތުން ޔޫއޭއިން ކޯވޮޑް ކާރިސާ މެނޭޖް ކުރުމުގައި ގެންގުޅުން ސިޔާސަތުގެ ނަތީޖާއެއްގެ ގޮތުން ޔޫއޭއީ ވެގެންދިޔައީ އަމިއްލަ ގައުމުގައި ބަންދުވުފައި ތިބެން ބޭނުންނުވި ގިނަބަޔަކު ދަތުރުކުރި އެއް މަންޒިލް ކަމުގައެވެ.
ދުނިޔޭގެ އެންމެ ބާރުގަދަ ޕާސްޕޯޓު އޮތް ގައުމުގެ މަގާމް ޔޫއޭއީއަށް ލިބިފައިވާއިރު، އެގައުމަކީ މިވަގުތު ދުނިޔޭގެ އެންމެ އުސް އިމާރާތްތުގެ އިތުރުން ދުނިޔޭގެ އެންމެ ފުން ސުވިމިންގ ޕޫލްއާއި އަދި އެންމެ އުސް ހޮޓާވެސް ހުރި ގައުމެވެ.
އާރޓޮންއިން ބުނެފައިވަނީ ދުނިޔޭ ގިނަ ގައުމުތަކުގެ ޕާސްޕޯޓު މިއަހަރު އިތުރަށް ބާރުވެރި ވެގެން ގޮސްފައިވާ ކަމަށެވެ. ސަބަބެއް ކަމުގައި ބުނެފައިވަނީ، ދަތުރުފަތުރު ކުރުން ފަސޭހަކޮށް އެމަގުން ލިބެން އޮތް އިގްތިސާދީ މަންފާއެއް ލިބިގަތުމަށް ގައުމުތަކުން އިސްކަން ދޭން ފަށާފައި ވުމެވެ.
އާރޓަންއިން ހާމަ ކޮށްފައިވާ ގޮތުގައި، ފަސޭހަކަމާއެކު ދަތުރު ކުރުމުގެ ސްކޯ ދަށަށް ގޮސްފައިވާ ހަމައެކަނި ގައުމަކީ ވަނުއާޓޫއެވެ. އޭގެ ސަބަބެއް ކަމުގައި ބުނެފައިވަނީ އެގައުމުގެ ވިސާ މާފް ކޮށްދިނުމުގެ ސްކީމް ޔޫރަޕިއަން ޔޫނިއަން ހުއްޓުމަކަށް ގެނެސްފައި ވުމެވެ. އެންމެ ފުލުގައި އޮތް ޕާސްޕޯޓަކީ އަފްއާނިސްތާންގެ ޕާސްޕޯޓެވެ.
