އިންޑިއާގެ ތާރީޚުގައި އެގައުމުގައި އެންމެ ފުރަތަމަ ވޯޓު ލީމީހާ އުމުރުން 105 އަހަރުގައި މަރު ވެއްޖެއެވެ. އޭނާގެ ވަނަމެއްގެ ގޮތުގައި އޭނާއާއި މުޚާތަބް ކުރަނީވެސް "އިނޑިއާރސް ފަރސްޓް ވޯޓަރ" (އިންޑިއާގެ އެންމެ ފުރަތަމަ ވޯޓު ލީމީހާ) ނަމުންނެވެ.
ޝިޔާމް ސަރަން ނެގިއަށް، އިންޑިއާގައި އެންމެ ފުރަތަމަ ވޯލީ މީހާގެ ލަގަބު ލިބިގެން ދިޔައީ، އިނގިރޭސިންގެ އިސްތިއުމާރުން އިންޑިއާއަށް މިނިވަންކަން ލިބުމަށްފަހު އެންމެ ފުރަތަމަ ބޭއްވުނު އާންމު އިންތިޚާބުގައި ވޯޓު ފޮއްޓަށް ވޯޓު ކަރުދާސްކޮޅު އެންމެ ފުރަތައް ވައްޓާލި މީހާއަކީ އޭނާ ކަމުގައި ވާތީއެވެ.
ނެގި ވަނީ އޭގެ ފަހުން އައި ހުރިހާ އިންތިޚާބެއްގައިވެސް ވޯޓު ލާފައެވެ.
ގަރުނަކަށްވުރެ ގިނަ ދުވަހު ދުނިޔޭގައި އުޅެފައިވާ ނެގި އޭނާގެ އެންމެ ފަހުގެ ވޯޓު ލާފައިވަނީ އޭނާ މަރުވުމުގެ 3 ދުވަސް ކުރިންނެވެ. އެއީ އޭނާގެ ސްޓޭޓް ކަމުގައިވާ ހިމަޗަލް ޕްރަދެޝްގައި އޮތް އެސެމްބްލީ އިލެކްޝަންގައެވެ.
ފަހުން ރިޓަޔަރ ކޮށްފައިވާ، ކުރިން ޓީޗަރެއްގެ ގޮތުގައި މަސައްކަތްކުރި ނެގި އިންޑިއާއަށް މިނިވަންކަން ލިބުމަށްފަހު އެންމެ ފުރަތަމަ ވޯޓު ލީ މީހާކަމުގައި ބެލެވިފައިވަނީ، 1952 ވަނަ އަހަރު ބޭއްވުމަށް ހަމަޖެހުނު އިންތިޚާބު، އާދަޔާ ޚިލާފަށް ބޯކޮށް ސްނޯ ވެހިދާނެތީ، އިންތިޚާބު ބޭއްވުމަށް ހަމަޖެހުނު ތާރީޚުގެ 5 މަސްދުވަސް ކުރިން، 1951 ވަނަ އަަހަރު އޭނާގެ ސްޓޭޓްގައި އެންމެ ފުރަތަމަ ވޯޓު ލުމާއި ގުޅިގެންނެވެ.
މި އިންތިޚާބު ވަރަށް ތަނަވަސް އައުލަބިއްޔަތަކުން ކާމިޔާބު ކުރީ އިންޑިއަން ނޭޝަނަލް ކޮންގްރެސްއިންނެވެ. އަދި މި ކާމިޔާބީއާއެކު، 1848 އިން 1947 އަށް، 100 އަހަރަށް ދެމިގެންދިޔަ އިނގިރޭސި އިސްތިއުމާރު ނިމުމަކަށް އައިސް، ޖަވާހިރުލާލް ނެހުރޫ ވެގެންދިޔައީ އިންޑިއާގައި ޑިމޮކްރަޓިކް އުސޫލުތަކާއި އެއްގޮތަށް އެންމެ ފުރަތަމަ އިންތިޚާބު ކުރެވުނު ބޮޑުވަޒީރު ކަމުގައެވެ.
ފައިތުވެދިޔަ ހަފްތާގައި އިންޑިއާގެ އިލެކްޓޯަލް ކޮމިޝަނުންވަނީ، ނޮވެމްބަރު 12ވަނަ ދުވަހު ބޭއްވުމަށް ހަމަޖެހިފައިވާ އިންތިޚާބުގައި ނެގި އޭނާގެ ވޯޓު ޕޯސްޓުން ލުން ރަތް ކާޕެޓްގައި ބާއްވާފައެވެ.
އިންޑިއާގައި ވޯޓު ލުމަށް ހިތްވަރު ދިނުމުގެ ގޮތުން އެގައުމުގެ އިލެކްޓޯރަލް ކޮމިޝަނުން 2014ވަނަ އަހަރު އޭނާވަނީ ބްރޭންޑް އެމްބެސެޑަރއަކަށް ހަމަޖައްސާފައެވެ. އަދި އެއަހަރުގެ އާންމު އިންތިޚާބުގައި އާންމުންނަށް ވޯޓު ލާން ހިތްވަރު ދިނުމުގެ ގޮތުން އޭނާވަނީ ގޫގުލް ވީޑިއޯއެއްގައިވެސް ފެނިލާފައެވެ.
"ވޯޓު ލުމަކީ ހައްގަކަށް ވުމުގެ އިތުރުން، އިންތިޚާބުތަކުގައި ވޯޓު ލުމަކީ ޒިންމާއެއް ކަމުގައި ދެކި، ކުރިޔަށް ނިކުމެ ޑިމޮކްރަޓިކް ޕްރޮސެސްގައި ޒުވާނުން ބައިވެރިވާންޖެހޭ،" އޭނާ ބުނެފައި ވެއެވެ.
މި ހަފްތާގެ ހޮނިހިރު ދުވަހު އޮތް އިލެކްޝަން އެއްވުމެއްގައި އިންޑިއާގެ ބޮޑުވަޒީ ނަރެންދުރަ މޯޑީވަނީ ނެގިއަށް އިހުތިރާމް އަދާކޮށްފައެވެ. އިންޑިއާ ސަރުކާރުން ބުނެފައިވަނީ އޭނާ ހަށިގަޑު އަންދާލެވޭނީ އެނާގެ އުފަން ވިލެޖްގައި، ރަސްމީ އިއްޒަތުގައި ކަމުގައެވެ.
