އިނގިރޭސި ޕްރިމިއާ ލީގުގައި ޗެލްސީއާ ދެކޮޅަށް ކުޅޭ މެޗަށް މެންޗެސްޓާ ޔުނައިޓެޑް އިން ނެގި ސްކޮޑުން އެ ޓީމުގެ ތަރި ކްރިސްޓިއާނޯ ރޮނާލްޑޯ ބާކީކޮށްފިއެވެ.
އިނގިރޭސި ޕްރިމިއާ ލީގުގައި ޗެލްސީއާ ދެކޮޅަށް ކުޅޭ މެޗަށް ޔުނައިޓެޑް އިން ނެގި ސްކޮޑުން ރޮނަލްޑޯ ބާކީ ކުރީ، މިދިޔަ ބުދަ ދުވަހުގެރޭ ޓޮޓެންހަމް ހޮޓްސްޕާ އަތުން ޔުނައިޓަޑް މޮޅުވި މެޗު ނުނިމެނީސް ބެންޗު ދޫކޮށް އޭނާ ޗޭންޖިން ރޫމަށް ދިއުމުންނެެވެ.
އެ މެޗުގައި ރޮނާލްޑޯ އަށް ޔުނައިޓަޑްގެ ފުރަތަމަ 11 އިން ޖާގައެއް ނުލިބެވެ. ރޮނާލްޑޯ މެޗުގެ 89 ވަނަ މިނިޓުގައި ބެންޗު ދޫކޮށްދިޔައިރު، ޔުނައިޓަޑަށް އޮތް ފަސް ބަދަލުގެ ތެރެއިން އޭރު ކޮށްފައިވަނީ ތިން ބަދަލެވެ. ރޮނާލްޑޯ މެޗު ނުނިމެނީސް ބެންޗު ދޫކޮށްދިޔަ މައްސަލަ ބަލާނެ ކަމަށް، ރޭގެ މެޗަށް ފަހު އެ ޓީމުގެ ކޯޗު އެރިކް ޓެން ހާގް ވަނީ ބުނެފައެވެ.
ރިޕޯޓްތަކުން ބުނާގޮތުގައި ރޮނާލްޑޯ ބެންޗު ދޫކޮށްދިޔައިރު، މެޗުގެ ފަހުކޮޅު ބަދަލު ކުޅުންތެރިއެއްގެ ކުޅެން އެރުމަށް ވެސް އޭނާ ދެކޮޅު ހެދިއެވެ. މެޗު ނިމުމަށްފަހު ޓެންހާގު މީޑިއާއަށް ދިން އިންޓަވިއުގައި ބުނީ ރޮނާލްޑޯ ބެންޗުން ދިއުމުގެ ހުއްދަ އޭނާ ނުދޭ ކަމަށެވެ. އަދި އެކަމާ މެދު މިވަގުތު ވިސްނަން ބޭނުން ނުވާ ކަމަށާއި، ރޮނާލްޑޯ ދަނޑުން ދިޔަ ސަބަބު ބަލާނެ ކަމަށް ޓެން ހާގު ބުންޏެވެ.
މިކަމާ ގުޅިގެން ރޮނާލްޑޯ ސޯޝަލް މީޑިއާ މެދުވެރިކޮށް ނެރުނު ބަޔާނުގައި ބުނެފައިވަނީ މިދިޔަ 20 ވަރަކަށް އަހަރު އެންމެ މަތީ ލެވަލްގައި ފުޓްބޯޅަ ކުޅުނުއިރު، އޭނާ އަބަދުވެސް ވިސްނާފައިވާނީ ޓީމުގެ މަސްލަހަތު އިސްކޮށްފައި ކަމަށާއި، ޔުނައިޓެޑަށް ނުރަނގަޅު ޕްރެޝަރެއް ދިނުމަކީ އެއްވެސް އިރެއްގައި އޭނާ ވިސްނި ގޮތެއް ނޫން ކަމަށެވެ. އަދި މިހާރު އޭނާގެ ވިސްނުމަކީ ޓްރެއިނިން އަށް ފޯކަސްކޮށް މެޗުތަކުގައި ފުރުސަތު ލިބުނު ވަރަކަށް ކުޅެގެން، ވެސް ޓީމަށް އެހީތެރިވުން ކަމަށް ރޮނާލްޑޯ ބުންޏެވެ.
ރިޕޯޓްތަކުން ބުނާގޮތުގައި ރޮނާލްޑޯ ސްކޮޑުން ބާކީކުރުމަށް ޓެން ހާގް ނިންމީ ކްލަބުގެ މެނޭޖްމަންޓްގެ ސަޕޯޓާ ވެސް އެކުގައެވެ. އަދި، ކުރިއަށް އޮތް ޖެނުއަރީގެ ޓްރާންސްފާގައި ރޮނާލްޑޯ ދޫކޮށްލުމަށް، މެނޭޖްމަންޓް އިން މިހާރު ވަރަށް ފުންކޮށް ވިސްނަމުންދާ ކަމަށް ރިޕޯޓްތަކުން ބުނެއެވެ.
