ފޮރިން މިނިސްޓަރ އަބްދުﷲ ޝާހިދު ޔޫއޭއީ ކުރައްވާ ރަސްމީ ދަތުރުފުޅުގައި އަބޫދާބީ ފަންޑް ފޯ ޑިވެލޮޕްމެންޓް (އޭޑީ.އެފް.ޑީ)ގެ ޑިރެކްޓަރ ޖެނެރަލް މުހައްމަދު ސާއިފް އަލް ސުވައިދީ އާއި ބައްދަލު ކުރައްވައިފިއެވެ. މި ބައްދަލު ކުރެއްވުމުގައި އޭޑީއެފްޑީގެ އެހީގައި ރާއްޖޭގައި ކުރިއަށްދާ މަޝްރޫޢުތަކާއި ގުޅޭގޮތުން ދެފަރާތުން މަޝްވަރާ ކުރެއްވިއެވެ. މިގޮތުން މާފަރުގެ އެއަރޕޯޓްގެ ދެވަނަ ފިޔަވަހީގެ މަސައްކަތްތަކާއި ބެހޭ ގޮތުން ހާއްސަކޮށް މަޝްވަރާ ކުރެވިއެވެ.
މި ބައްދަލު ކުރެއްވުމުގައި، މާފަރުގެ އެއަރޕޯޓްގެ ދެވަނަ ފިޔަވަހީގެ އަމަލީ މަސައްކަތް ލަހެއްނުވެ ފަށައިގަނެވޭނޭ ކަމުގެ ޔަގީންކަން އެޑީއެފްޑީއިން ދެއްވިއެވެ. މާފަރު އެއަރޕޯޓުގެ ދެވަނަ ފިޔަވަހީގެ މަސައްކަތްތައް ނިމުމުން އެއަރޕޯޓް ވެގެންދާނީ ރާއްޖެއާއި ބޭރު ޤައުމުތަކާއި، ގުޅުވައިދޭ ދޮރާއްޓަކަށެވެ.
މިނިސްޓަރ ޝާހިދުވަނީ އޭޑީއެފްޑީއިން ރާއްޖެއަށް މިހާތަނަށް ވެދެއްވާފައިވާ އެހީއަށް ޝުކުރު ދަންނަވާފައެވެ. އަދި ރާއްޖޭގެ ތަރައްޤީއަށް ޔޫއޭއީގެ ސަރުކާރުން ވެދެއްވާ އެހީތަކަށްވެސް މިނިސްޓަރ ޝުކުރު އަދާކުރެއްވިއެވެ.
މިނިސްޓަރ ޝާހިދު ޔޫއޭއީއަށް ކުރައްވާ ރަސްމީ ދަތުރުފުޅު ނިންމަވާލެއްވުމަށްފަހު ވަޑައިގެންނެވުމަށް ހަމަޖެހިފައިވަނީ ރައީސުލްޖުމްހޫރިއްޔާގެ ހާއްސަ މަންދޫބެއްގެ ގޮތުގައި އޮމާންއަށެވެ.
