އިނގިރޭސި ޕްރިމިއާ ލީގުގައި ބްރައިޓަންއާ ދެކޮޅަށް ކުޅުނު މެޗު ކާމިޔާބުކޮށް ތާވަލުގެ އަށްވަނައަށް ބްރެންޓްފަޑް ޖެހިލައިފިއެވެ.
ބްރެންޓްފަޑްގެ ދަނޑުގައި ކުޅުނު މި މެޗް އެޓީމް ކާމިޔާބުކުރީ 2-0 ގެ ނަތީޖާއަކުންނެވެ. ދެ ޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބްރައިޓަން އެވެ. ނަމަވެސް އެޓީމަށް މިމެޗްގައި ބްރެންޓްފަޑްގެ ޑިފެންސް ފޫއަޅުވާލެވޭ ގޮތެއް ނުވިއެވެ.
މި މެޗްގައި ބްރެންޓްފަޑްގެ ފުރަތަމަ ލަނޑު މެޗްގެ 27 ވަނަ މިނެޓްގައި ޖަހާދީ އެޓީމަށް ލީޑު ނަގާދިނީ އިވާން ޓޯނީއެވެ. މިއީ އޭނާ ބްރެންޓްފަޑްއަށް ކުޅުނު 100 ވަނަ މެޗްގައި އެޓީމަށް ކާމިޔާބުކޮށްދިން 50 ވަނަ ލަނޑެވެ. މި މެޗްގައި އެޓީމްގެ ދެވަނަ ލަނޑު މެޗްގެ 64 ވަނަ މިނެޓްގައި ލިބުނު ޕެނަލްޓީއަކުން ކާމިޔާބުކޮށްދިނީވެސް ޓޯނީއެވެ.
މި ދެ ލަނޑާއެކު ކުރިއަށް އޮތް ވާރލްޑް ކަޕަށް އޭނާއަށް އިންގްލަންޑްގެ ޓީމުން ޖާގައެއް ލިބުން ހައްގުކަމަށް ބުނާ ފަރާތްތަކުގެ އަޑު އަނެއްކާވެސް ވަނީ ގަދަވެފައެވެ. ޓޯނީ މިހާރުވަނީ ލީގުގައި އަށް ލަނޑު ޖަހާފައެވެ. އޭނާއަށް ވުރެ ގިނައިން މިފަހަރު ލީގުގައި ދެން ލަނޑު ޖަހާފައިވާ ކުޅުންތެރިޔަކީ މެންޗެސްޓަރ ސިޓީގެ އަރލިންގ ހާލަންޑް އެކަންޏެވެ.
މި ކާމިޔާބީއާއެކު ބްރެންޓްފަޑް މިހާރުވަނީ 10 މެޗުން ލިބިފައިވާ 13 ޕޮއިންޓާއެކު ތާވަލްގެ އަށްވަނައަށް ކުރިއަށް ޖެހިލާފައެވެ. އަދި ބްރައިޓަން އުޅެނީ 14 ޕޮއިންޓާއެކު ހަތްވަނައިގައެވެ.
