ޔުއެފާ ނޭޝަންސް ލީގުގައި އޮސްޓްރިއާ އަތުން ހޯދި މޮޅާއެކު މުބާރާތުގެ ފައިނަލް ބުރަށް ކްރޮއޭޝިއާ ދަތުރުކޮށްފި އެވެ.
މުބާރާތުގެ ފައިނަލް ބުރުން ކްރޮއޭޝިއާ ޖާގަހޯދީ ގްރޫޕް އޭ ވަންގެ އެއްވަނަ ޓީމްގެ މަގާމް ހޯދައިގެންނެވެ. މި ގްރޫޕުގައި އޮސްޓްރިއާ އާއި ވާދަކޮށް ކްރޮއޭޝިއާ ކުޅުނު ގްރޫޕުގެ ފަހު މެޗު ކާމިޔާބުކުރީ 3-1 ގެ ނަތީޖާއަކުންނެވެ. އެއާއެކު ކްރޮއޭޝިއާ އަށް ގްރޫޕްގެ އެއްވަނަ ލިބިފައިވަނީ ހަ މެޗުން 13 ޕޮއިންޓް ހޯދައިގެންނެވެ.
އޮސްޓްރިއާގައި ކުޅުނު މެޗުގައި ކްރޮއޭޝިއާއިން ގިނައިރު ބޯޅަ ގެންގުޅުނު އިރު ގިނަ ހަމަލާ އުފައްދާފައިވަނީ އޮސްޓްރިއާ އިންނެވެ. މި މެޗުގެ ފުރަތަމަ ލަނޑު 6 ވަނަ މިނެޓްގައި ޖަހާ ލީޑު ނެގީ ކްރޮއޭޝިއާއިންނެވެ. މި ލަނޑު އެޓީމަށް ކާމިޔާބުކޮށްދިނީ ތަޖްރިބާކާރު ކެޕްޓަން ލޫކާ މޮޑްރިޗެވެ.
ނަމަވެސް މި ލަނޑު ޖެހިތާ ތިން މިނެޓްފަހުން ކްރިސްޓޮފަރ ބޮއުމްގާޓްނަރ ޖެހި ލަނޑާއެކު އޮސްޓްރިއާއިން މެޗްގެ ނަތީޖާ ހަމަހަމަ ކުރިއެވެ. މި މެޗްގައި ކްރޮއޭޝިއާއިން ދެވަނަ ފަހަރަށް ލީޑު ނެގީ މެޗްގެ 69 ވަނަ މިނެޓްގައި މާކޯ ލިވާޔާ ޖަހާދިން ލަނޑުންނެވެ. އަދި އެޓީމްގެ ލީޑު ފުޅާކޮށްދިނީ ޑެޔާން ލޮވްރެންއެވެ.
މި ކާމިޔާބީއާއެކު ކްރޮއޭޝިއާ ނޭޝަންސް ލީގުގެ ފައިނަލް ބުރުން ޖާގަ ހޯދިއިރު އޮސްޓްރިއާ މި ވަނީ ހަ މެޗުން ލިބުނު ހަތަރު ޕޮއިންޓާއެކު ގްރޫޕްގެ ފުލަށް ގޮސް ލީގް ބީއަށް ރެލިގޭޓްވެފައެވެ.
