ޔުއެފާ ނޭޝަންސް ލީގުގެ ގްރޫޕް އޭ ދޭއްގައި ސްވިޓްޒަލަންޑުން ސްޕެއިން ބަލިކޮށްފިއެވެ.
ސްޕެއިންގައި ކުޅުނު މި މެޗް ސްވިޒަލަންޑް ކާމިޔާބުކުރީ 2-1 ގެ ނަތީޖާއަކުންނެވެ. މިއީ ވޭތުވެދިޔަ ހަތަރު ވަރަކަށް އަހަރުގެ ތެރޭގައި އަމިއްލަ ޤައުމުގައި ކުޅެ ސްޕެއިން ބަލިވި ފުރަތަމަ ފަހަރެވެ.
ދެ ޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗްގައި ސްޕެއިނުން ގިނައިރު ބޯޅަ ގެންގުޅުނު އިރު ހަމަލާ އުފެއްދިފައިވަނީ ދެޓީމަށް ހަމަހަމަކޮށެވެ. މި މެޗްގެ ފުރަތަމަ ލަނޑު މެޗްގެ 21 ވަނަ މިނެޓްގައި ޖަހާ ލީޑު ނެގީ ސްވިޒަލަންޑުންނެވެ. މި ލަނޑު އެޓީމަށް ޖަހާދިނީ ޑިފެންޑަރ މެނުއަލް އަކާންޖީއެވެ. މެޗްގައި ސްޕެއިން ޖެހި ހަމައެކަނި ލަނޑު މެޗްގެ 55 ވަނަ މިނެޓްގައި ޖަހާދީ ނަތީޖާ ހަމަހަމަކޮށްދިނީ ޖޯޑީ އަލްބާއެވެ. ނަމަވެސް މި ލަނޑު ޖެހިތާ ތިން މިނެޓްފަހުން ސްވިޒަލަންޑުން ވަނީ އަނެއްކާވެސް މެޗްގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ބްރީލް އެމްބޯލޯއެވެ.
މި ކާމިޔާބީއާއެކު ސްވިޒަލަންޑް މިވަނީ ގްރޫޕް އޭ ޓޫ ގެ ތިންވަނައަށް ކުރިއަށް ޖެހިލައިފިއެވެ. އެއީ ފަސް މެޗުން ލިބިފައިވާ 6 ޕޮއިންޓާއެކުއެެވެ. މެޗުން ބަލިވުމާއެކު ސްޕެއިން މިހާރު މިވަނީ ގްރޫޕްގެ އެއްވަނައިން ދެވަނައަށް ފަހަތަށް ޖެހިފައެވެ. އަދި ޕޯޗުގަލް ރޭ އެޓީމް ކުޅުނު މެޗް ކާމިޔާބު ކުރުމާއެކު އެޓީމް މިވަނީ ގްރޫޕްގެ އެއްވަނައަށް އަރާފައެވެ.
އެހެންކަމުން މި ގްރޫޕުން ނޭޝަންސް ލީގުގެ ފައިނަލަށް ދަތުރުކުރާ ޓީމެއް އެނގިގެންދާނީ އަންނަ އަންގާރަ ދުވަހު ސްޕެއިން އާއި ޕޯޗުގަލް ބައްދަލުކުރާ މެޗަށްފަހު އެވެ. ސްޕެއިންއަށް ފުރުސަތު އޮތީ މޮޅުވެގެން ކަމުގައިވީ ނަމަވެސް ޕޯޗުގަލްއަށް މެޗް އެއްވަރު ކޮށްލައިގެންވެސް ފަރުޖައްސާލެވޭނެ އެވެ.
