ދައުލަތުގެ ދަރަނި ބޮޑު، މިސަރުކާރުން ޤައުމުގެ ހަރުމުދަލެއް ނުވިއްކާނަން: ރައީސް

ދައުލަތުގެ ދަރަނި ބޮޑުކަމަށާއި ނަމަވެސް މިސަރުކާރުން ޤައުމުގެ އެއްވެސް ހަރުމުދަލެއް ނުވިއްކާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ހޯރަފުށީ އެއަރޕޯޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

އަންނަ އަހަރަށް ލަފާކޮށް މަޖިލީހަށް ހުށައަޅާފައި 34.7 ބިލިއަން ރުފިޔާގެ ބަޖެތަށް އިޝާރާތްކުރައްވާ ރައީސް ވިދާޅުވީ އަންނަ އަހަރުގެ ބަޖެޓަކީ މިހާރުގެ ހާލަތަށް ބަލާ ހުށައެޅެނެ އެންމެ ރަނގަޅު ބަޖެޓްކަމަށެވެ.

ދުނިޔެއަށް ދިމާވެފައިވާ ހާލަތާއި ރާއްޖޭގެ އިިޤްތިޞާދު، ސަރުކާރުން ކުރަންޖެހޭނެ އެންމެ މުހިންމުކަމަކީ ރައްޔިތުންނަށް އެހީތެރިަކން ފޯރުކޮށްދިނުން. މިވޭތުވެ ދިޔަތަނުން މިއައީ ވަރަށް ރނގަޅަށް އެކަންކުރަމުން. ދައުލަތުގެ ސަރުކާރުގެ އެއްވެސްމުވައްޒަފެއް ވަކިނުކުރަން، މުސާރަ ކުޑަނުކުރަން. މަސްނިމެންވާއިރަށް ދޭންޖެހޭ މުސާރަ ވާނި ދީފަ. މިއީ ދަތިވަގުތެއް، ޤަބޫލުކުރެވޭގޮތުަގއި މިއީ ފައިސާ ހޯދައިގެން މަސައްކަތްކުރަންޖެހޭ ވަގުތު.

-ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް

އަންނަ އަހަރުގެ ބަޖެޓުގައި ސިއްހީ ދާއިރާ 4 ބިލިއަން، ތަޢުލީމީ ދާއިރާއަށް 3.9 ބިލިއަން ރުފިޔާ، އިޖްތިމާއި ދާއިރާއަށް 3.7 ބިލިއަން ރުފިޔާ، ގެދޮރުވެރިކުރުމަށް 2.3 ބިލިއަން ރުފިޔާ، ތިމާވެށި ހިމާޔަތްކުރުމުގެ ދާއިރައަށް 1.6 ހިމެނިފައިވާކަން ފާހަގަކުރައްވާ ރައީސް ވިދާޅުވީ، ރިކަރަންޓް ހަރަދުގެގޮތުން މުސާރާއިގެ ހަރަދާއި އާސަންދައާއި ދުވަސްވީމިހުންނަށް ދޭ އިނާޔަތްތަކާއި ޚައްޞަ އެހީއަށް ބޭނުންވާ މީހުންނަށް ދޭ އިނާޔަތްތައް ހިމަނާފައިވާކަމަށެވެ.

ކެޕިޓަލް ޚަރަދުގެ ގޮތުން ބޮޑެތި މަޝްރޫޢުތައްވެސް އަންނަ އަހަރު ފެށިގެންދާނެކަމަށާއި، އެގޮތުން ހަނިމާދޫއާއި އައްޑޫ އެއަރޕޯޓް އިންޓަރނޭޝަންލް ފެންވަރަށް ރަނގަޅަށް ތަރައްޤީކުރުމާއި، ތިލަމާލެ ބްރިޖާއި ވިޔަފާރި ބަނދަރާއި، ހުރިހާ ރަށެއގައި ފެނާއި ނަރުދަމާ ޤާއިމްކުރުމާއި، 5 ޓާޗަރީ ހޮސްޕިޓަލް ޤާއިމްކުރުމަށް ބޭނުންވާ ފައިސާ ހުރީ ހަމަޖެހިފައިވާކަމަށް ރައީސް ވިދާޅުވިއެވެ.

ރައީސް ވިދާލުވި ބަޖެޓާއި ގުޅޭގޮތުން މަޖިލީހުގައި ކުރިއަށްދިޔަ ބަޖެޓް ބަހުސް އަޑުއެއްސެވިކަމަށާއި، ބަޖެޓް ކުޑަކުރުމަށް ބައެއް މެންބަރުން ގޮވާލެއްވިއިރު، މިއިީ ޕްރޮޖެކްޓުތައް ހުއްޓަލަންވި ވަގުތެއްނޫންކަމަށް ރައީސް ވިދާޅުވިއެވެ. މިހާރު ސަރުކާރުންކުރަންޖެހޭ ކަމަކީ އިޤްތިޞާދު ފަށަންވީވަގުތުކަމަށާއި، މެދުނުކެނޑި ހުއްޓުމެއްނެތި ކުރިއަށްދާނެކަމަށް ރައީސް ވިދާޅުވިއެވެ.

ރައީސް ވިދާޅުވީ ރާއްޖޭގެ ދަރަނި ބޮޑުކަމަށާއި، އެގޮތުން ރައީސް ޔާމީން ވެރިކަމާ ހަވާލުވިއިރު 26 ބިލިއަން ރުފިޔާގެ ދަރަނި އޮތްކަމަށާއި ނަމަވެސް އެމަނިކުފާނު ފައިބާ ވަޑައިގެންނެވިއިރު އެދަރަނި 60 ބިލިއަން ރުފިޔާއަށް އިތުރުވެފައިވާކަމަށެވެ. ރައީސް ވިދާލުވި މިސަރުކާރުގެ މިހަތަނަށް ދަރަނި އިތުރުވީ 15 ބިލިއަން ރުފިޔާކަމަށެވެ. އެމަނިކުފާނުގެ ވާހަކަފުޅުގައި ރައީސް ނަޝީދު ވެރިކަމަށް ވަޑައިގެންނެވިއިރު 6 ބިލިއަން ރުފިޔާގެ ދަރަނި އޮތްކަމަށާއި، އެމަނިކުފާނުގެ ވެރިކަން ނިމުނުިއރު 26 ބިލިއަން ރުފިޔާއަށް އިތުވިކަމަށެވެ.

ރައީސް ވިދާޅުވީ، އެމަނިކުފާނު ވެރިކަމަށް ވަޑައިގެންނެވިއިރު ދައުލަތުގެ ރިޒާވްގައި އެއްވެސް ފައިސާއެއް ނެތްކަމަށެވެ. ރައިސް ވިދާޅުވި މިހާރުވެސް މިދަތިހާލަތުގައިވެސް ދައުލަތުގެ ރިޒާވްގައި 50 ބިލިއަން ރުފިޔާ އެބަހުރިކަމަށާއި، އެމަނިކުފާނުގެ މާލީ ޓީމަށް އިތުބާރު އެބައޮތްކަމަށެވެ. އެމަނިކުފާނު ވަނީ މިވެރިކަމުގައި ހަރުމުދާ ނުވިއްކާނެކަމަށާއި، ޤައުމު އަމާން އައްސޭރިއަކަށް ގެންދާނެކަމަށެވެ.

ރައީސް މިހެން ވިދާޅުވިއިރު، މިސަރުކާރުން ވަނީ ސުކޫކް ވިއްކުމަށް ކުރީގެ ރައީސް އަބްދުﷲ ޔާމީން އިމާރާތްކުރި ދަރުމަވަންތަ ހޮސްޕިޓަލް ރަހުނުކުރުމަށް ނިންމާފައެވެ. އެކަމާއި ގުޅިގެން ސަރުކާރަށް ވަނީ ވަރށް ބޮޑަށް ފާޑުކިއުން އަމާޒުވެފައެވެ. ރައީސް ވިދާޅުވީ، ކުރީގެ ސަރުކާރުން 85 ރަށެއް ވިއްކައި، އެ އާމްދަނީވެސް ދައުލަތަށް ލިބިފައިނުވާކަމަށެވެ. މިސަރުކާރުން މިހާތަނަށް އެއްވެސް ރިސޯޓެއް ހެދުމަށް ފަޅުރަށެއް ދޫނުކުރާކމަށާއި، ރައީސް ޔާމީން ސަރުކާރުން ރިސޯޓް ހެދުމަށްރަށްތައް ނުއަގުގައި ދޫކުރިއިރު، ވެރިކަމުންވަޑައިގަތީ ރަށްދޫކޮށްގެން ލިބުނު ފައިސާވެސް ހިތްޕަވައިގެންކަމަށެވެ. އެފައިސާ ލިބުނުނަމަ މިހާރު ހަރަދުކުރަން ހުރީސްކަމަށް ރައީސް ވިދާޅުވިއެވެ.