ކުރީގެ ރައީސް ޔާމީނަށް ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމް އެއް މިލިއަން ޑޮލަރު ދިނީ ޑޮލަރު މާރުކުރުމުގެ މުއާމަލާތެއްގެ ތެރެއިން ކަމަށާއި އެއަށްވާ ދިވެހި ރުފިޔާ ގެންގޮސް ހަވާލުކޮށްދިން ކަމަށް މާލެ ސިޓީގެ ޑެޕިއުޓީ މޭޔަރު އަހުމަދު ނަރީޝް މިއަދު ވިދާޅުވެއްޖެއެވެ.

މި މައްސަލައިގައި މިހާރު ކުރިއަށްދަނީ ދިފާއީ ހެކިންގެ ހެކިބަސް ނެގުމުގެ މަރުޙަލާއެވެ. މި އަޑުއެހުމުގައި ހެއްކެއްގެ ގޮތުގައި ހާޒިރުކޮށްފައިވަނީ ޕީޕީއެމްގެ ކައުންސިލް މެމްބަރު އަދި މިހާރުގެ މާލެ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝްއެވެ.

ހެކިބަސް ދެއްވަމުން ނަރީޝް ވިދާޅުވީ 2015 ވަނަ އަހަރުގެ ތެރެއިން ދުވަހެއްގައި ޔާމީން އަންގަވައިގެން އެމަނިކުފާނު އޭރު ދިރިއުޅުއްވަމުން ގެންދެވި ގ. ދޫވެއްސަށް ދިޔަ ކަމަށެވެ. އެ ދުވަހު ޑޮލަރު ބައްލަވައިގަތް ކަމުގެ ލިޔުމެއްގައި ސޮއިކުރައްވާފައި ޔާމީން ދެއްވި ކަމަށް ނަރީޝް ވިދާޅުވިއެވެ. އަދި އޭގައި ޑޮލަރެއް 15.42 ރުފިޔާގެ ރޭޓުން ޔޫސުފް ނައީމަށް 15 މިލިއަން ހަތަރު ލައްކަ ރުފިޔާ ހަވާލުކުރަން އެ ލިޔުމުގައި އޮތް ކަމަށް އޭނާ ވިދާޅުވިއެވެ.

ޔޫސުފް ނައީމާއި އަޅުގަނޑާއި ދިމާވީ އެއްދުވަހު ރައީސް ޔާމީން އަޅުގަނޑަށް ގުޅުއްވަފައި ދެންނެވި ނަރީޝްއޭ ވަރަށް ބޮޑު ކަމެއް ކޮށްދޭން އެބަޖެހެއޭ، ގަލޮޅު ދޫވެއްސަށް ޖައްސާލަ ދެވިދާނެހޭ. އަޅުގަނޑު ދިޔައިން ގަލޮޅު ދޫވެއްސަށް، އަޅުގަނޑު ދެންނެވިން ކޮންކަމާތޯ ބޮޑު ކަމެއް ޖެހިގެން ތިއުޅެނީ. ދެންނެވި ޔޫސުފް ނައީމް އަތުން ޑޮލަރުތަކެއް ބައްލަވައި ގެންފައޭ ވަނީ އެޔަށްވާ ދިވެހި ފައިސާ އެބަޖެހޭ ޔޫސުފް ނައީމާއި ހަވާލު ކުރަން. މިކަން އެބަޖެހެއޭ ތިމަންނާއަށް ކޮށްދެއްވަން. އެކަމުގައި ޔޫސުފް ނައީމާއި އަޅުގަނޑު ބައްދަލުވާން ޖެހުނީ.

– ނަރީޝް ވިދާޅުވިއެވެ.

ނަރީޝް ވިދާޅުވި ގޮތުގައި އެއަށް ފަހު ކަޅު ދެ ދަބަހެއްގައި އެ އަދަދަށްވާ ދިވެހި ރުފިޔާ ޔޫސުފް ނައީމަށް ގެންގޮސްދީފައިވެއެވެ. ޔޫސުފް ނައީމް ދިރިއުޅޭ ގެއަށް ކާރެއްގައި ވަޑައިގެން، އެ ފައިސާ ދީފައިވާނެ ކަމަށް އޭނާ ވިދާޅުވިއެވެ.

އެ ފައިސާހުރީ 2 ދަބަހެއްގައި ކަމަށްވެސް ނަރީޝް ވިދާޅުވިއެވެ. ނަރީޝް ވިދާޅުވީ އެ ފައިސާ ޙަވާލުކުރީ ޔޫސުފް ނައީމްގެ ގެއަށް ގޮސް ކަމަށެވެ. ފައިސާ ޙަވާލު ކުރުމަށްފަހު އޭނާގެ ކުރިމަތީގައި އެ ފައިސާ ޔޫސުފް ނައީމް ގުނި ކަމަށާއި، އެއަށްފަހު ސްލިޕްގައި ސޮއިކުރެއްވި ކަމަށް ނަރީޝް ވިދާޅުވިއެވެ.

ދައުލަތުގެ ވަކީލުންނަށް ސުވާލު ކުރަން ދިން ފުރުސަތުގައި އަމާޒުކުރި ގިނަ ސުވާލުތަކަކީ ހެކި ހުށަހެޅި ދާއިރާއާ ބޭރުން ކުރި ސުވާލުތަކަކަށް ވާތީ ގިނަ ސުވާލުތަކަށް ފުރުސަތު ނުލިބުނެވެ. އޭގެ ތެރޭގައި، ޑޮލަރު ގަތުމަށް އެމްއެމްއޭ އިން ހުއްދަ ނެގިތޯއާއި ފުލުހުން ތަހުގީގު ގެންދަނިކޮށް، ޑޮލަރުގެ މުއާމަލާތެއް ކަން ބުނެދީ ބަޔާން ނުދިނީ ކީއްވެތޯ ފަދަ ސުވާލުތައް ހިމެނެއެވެ.

ދައުލަތުން ދެން ކުރި ބައެއް ސުވާލުތަކުގެ ޖަވާބުގައި ނަރީޝް ވިދާޅުވީ އެ ކަމެއް ހަނދާނުގައި ނެތް ކަމަށެވެ. މި ގޮތުން 15 މިލިއަން ރުފިޔާ ގުނަން ހޭދަވި ވަގުތާއި، ކާރު ނަންބަރު ފަދަ ކަންކަން މިހާރު ހަނދާނުގައި ނެތް ކަމަށް ނަރީޝް ވިދާޅުވިއެވެ.