ބަންގްލަދޭޝްގެ ފިރިހެނެއް ކަމަށްވާ އަލަމްގީރްއާ އެކުގައި އެއް ޖިންސުން ގުޅުން ހިންގި ކަމަށް ތުހުމަތު ކުރެވޭ ގުރުއާނާ ބެހޭ މަރުކަޒުގެ ސީނިއާ އެގްޒެކެޓިވް ޑިރެކްޓަރުގެ މަގާމުގައި ކުރިން ހުރި އިބްރާހިމް ރާފިއު (ރާއްޕެ) ހޯދަން ފުލުހުން އިއުލާން ކޮށްފިއެވެ.
ފުލުހުން އޭނާ ހޯދަން އިއުލާން ކޮށްފައިވާއިރު، އޭނާ ވަނީ މިމަހުގެ ކުރީކޮޅު ރާއްޖެއިން ފުރާފައިކަން ގިނަ މީޑިޔާތަކެއްގައި ވަނީ ޚަބަރުވެސް ގެނެސް ދީފައެވެ. ފުލުހުން މިއަދު ކުރި އިއުލާނެއްގައި ބުނީ ރާފިއުއާ ގުޅޭ ގޮތުން ފުލުހުންގެ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓުން ތަހުގީގު ކުރަމުންދާ މައްސަލައިގެ ތަހުގީގަށް ހާޒިރުކުރުމަށް ބޭނުންވެ، އުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައިނުވާ ކަމަށެވެ.
އެހެންވެ ރާފިއުއާ ގުޅޭ އެއްވެސް މައުލޫމާތު ލިބިފައިވާނަމަ ސީރިއަސް އެންޑް އޮގަނައިޒްޑް ކްރައިމް ޑިޕާޓްމަންޓަށް އެންގުމަށް ފުލުހުން އެދިފައިވެއެވެ.
ފުލުހުން ބުނާ ގޮތުގައި ތަހުގީގީ އިޖުރާއަތްތައް ހިންގަމުން ދަނީ މިހާތަނަށް ފޮރެންސިކް ތަހްލީލުތަކުން ކަށަވަރުކުރެވިފައިވާ ވީޑިއޯ އެވިޑެންސްތަކުގައި ހިމެނޭ މީހުންގެ މައްޗަށެވެ.
އެއް ޖިންސުން ގުޅުން ހިންގިިކަމުގެ ތުހުމަތުގައި ދައުވާއުފުލި، ބަންގްލަދޭޝްގެ ރައްޔިތެއްކަމަށްވާ އެމްޑީ އަލަމްގިރު ޝަރީއަތުގެ މަޖިލީހުގައި އިއުތިރާފުވުމުން, އޭނާގެ މައްޗަށް ކުށް ސާބިތުވާކަމަށް ކްރިމިނަލް ކޯޓުން އިއްޔެ ވަނީ ކަނޑައަޅާފައެވެ. އެއްޖިންސުން ގުޅުން ހިންގި މައްސަލައިގައި މިހާތަނަށް 4 މީހެއްގެ މައްޗަށް ދައުވާ އުފުލިއެވެ. އެއީ އާލަމްގީރުގެ އިތުރުން ޤާނޫނީ ވަކީލް ނާޒިމް ސައްޠާރާއި، ނޮޅިވަރަމް ދާއިރާގެ ކުރީގެ މެންބަރު މުޙައްމަދު ނަޝީދާއި، ފުލުހެއްކަމަށްވާ ޢަބްދުއްރަހީމް ރާފިއުގެ މައްޗަށެވެ. އެމީހުންގެ މައްޗަށްވެސް ދައުވާ އުފުލީ ގާނޫނޫލްއުގޫބާތުގެ ދަށުންނެވެ.
ގާނޫނުލްއުގޫބާތުން ދައުވާ އުފުލުމުން މިމައްސަލައިގައި ހިމެނޭ މީހުންނަށް އެންމެ ބޮޑު އަދަބަކަށްވެސް އަންނާނީ ނުވަ މަހާއި 18 ދުވަހުގެ ޖަލު ޙުކުމެކެވެ.
