އަންނަ ރިޔާސީ އިންތިޚާބުގައި ޕީޕީއެމްގެ ޓިކެޓްގައި ވާދަކުރައްވާ ޕީޕީއެމްގެ ރައީސް ޔާމީނުގެ ޝަރީއަތަށް އިންތިހާއަށް ދަނީ ނުފޫޒު ފޯރުވަމުން ކަމުގައި ޕީޕީއެމްގެ ނައިބް ރައީސް އަހުމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ އާރަށް ކުއްޔަށް ދިން މައްސަލާގައި ޔާމީންގެ މައްޗަށް އުފުލާފައިވަނީ މަނީ ލޯންޑަރިން ކުށުގެ ދައުވާއާއި ރިޝްވަތު ޤަބޫލުކުރުމުގެ ދައުވާގެ ޝަރީއަތް ކުރިއަށްދާއިރު ސިޔާސީ މަސްރަހުގައި ހިނގަމުންދާ ކަންކަމަށް ރިޢާޔަތް ކުރައްވައި ކުރެއްވި ޓުވީޓެއްގައެވެ.

ޝިޔާމް ވިދާޅުވީ ރައީސް ޔާމީން ޖަލަށް ލުމަށްޓަކައި އެންމެ ބޮޑަށް ނުފޫޒު ފޯރުވަމުންދަނީ އިންޑިއާއިން ކަމަށެވެ. އެގޮތުން ޝަރުއީ ދާއިރާގެ ބޭފުޅުންނަށް ތަމްރީން ދަތުރުތައް އިންޑިއާއިން ހަމަޖެއްސުމާއި، ވެރިކަން ކުރާ މައި ޕާޓީ އެމްޑީޕީގެ އިސްބޭފުޅުން އިންޑިއާއަށް ހާޒިރުކޮށް ރައީސް ޔާމީން ޖަލަށް ލުމަށް އަމުރުތައް ކުރުމާއި، ފަނޑިޔާރުންނަށް ނުފޫޒު ފޯރުވުމަށް ފްލެޓާއި، ގޯތި ދެވޭނެ އިންތިޒާމުވެސް ކުއްލިއަކަށް ހަމަޖައްސަމުންދާކަމަށް ޝިޔާމް ވިދާޅުވިއެވެ.

ރައީސް ޔާމީންގެ ޝަރީއަތަށް ނުފޫޒު ފޯރުވުމަށް ފަނޑިޔާރުންނަށް ފުލެޓާއި ގޯތި. ޖުޑީޝަރީގެ ތަމްރީނުތައް އިންޑިޔާއިން. ވެރިކަންކުރާ ޕާޓީގެ އިސްވެރިން އިންޑިޔާއަށް ހާޒިރުކޮށް ރައީސް ޔާމީން ޖަލަށް ލުމަށް އަމުރު. އަޅުދާސްތު ވާނީ މިހާކައްވަރަށް!!! ފަނޑިޔާރުގޭގެ އިންސާފުވެރިކަން.

– ޝިޔާމް ކުރެއްވި ޓުވީޓުގައި ވިދާޅުވިއެވެ.

ފަނޑިޔާރުންނަށް ލިބިދޭ އިނާޔަތްތަކުގެ އޮނިގަނޑު އިސްލާޙް ކުރުމަށާއި އެނޫންވެސް ބައެއް މުހިންމު އިސްލާހުތައް ގެނައުމަށްޓަކައި، ދިވެހިރާއްޖޭގެ ފަނޑިޔާރުންގެ ގާނޫނަށް އިސްލާހު ގެނައުމުގެ ބިލެއް އެކުލަވާލައި، ރައްޔިތުންގެ މަޖިލީހަށް ހުށަހެޅުމަށްޓަކައި ސަރުކާރުގެ ފަރާތުން ވަނީ ފޮނުވާފައެވެ.