އަދީބު އަތުގައި އަދިވެސް އެމަނިކްފާނަށް ލިބެންޖެހޭ 4 މިލިއަން ޑޮލަރު އެބަހުރި ކަމަށާއި، އަދީބު އަތުގައި ހުރި އެމަނިކްފާނުގެ 5 މިލިއަން ޑޮލަރުގެ ތެރެއިން ލިބިފައިވަނީ 1 މިލިއަން ޑޮލަރު ކަމުގައި ރައީސް ޔާމިން ވިދާޅުވެއްޖެއެވެ.

މިރޭ ނޫސްވެރިންނާ ބައްދަލުކުރައްވާ ވާހަކަ ދައްކަވަމުން ރައީސް ޔާމިން ވިދާޅުވީ، ސިޔާސީ މީހުންގެ ތެރެއިން ސިޔާސީ ހަރަކާތްތަކަށް ފައިސާ ދޭކަމަށާއި، ކޯޓުގައި ހިގަމުންދާ މައްސަލަތަކުގައި ހެކިބަސް ދޭ މީހުންވެސް، ސިޔާސީ ހަރަކާތްތަކަށް ވިޔަފާރިވެރިން ފައިސާ ދޭކަމަށް ބުނަމުންދާ ކަމުގައެވެ. އަދި އެފައިސާ ބަލަހައްޓަމުން ދިޔައީ އަދީބުކަމަށް އެމީހުން ޝަރިއަތުގައިވެސް ބުނަމުންދާ ކަމުގައި ޔާމީން ވިދާޅުވިއެވެ.

އިތުރަށް ރައީސް ޔާމިން ވިދާޅުވީ ޕާލަމެންޓްރީ ގުރޫޕުގެ ބައްދަލުވުންތަކުގައިވެސް، އެމަނިކްފާނުގެ 5 މިލިއަން ޑޮލަރު އަދީބު އަތުގައި ހުރިކަމަށް އަދީބު ވިދާޅުވި ކަމަށާއި، މަސައްކަތް ކުރެއްވީ އެފައިސާ ހޯއްދެވުމަށް ކަމަށެވެ. އެއީ އެމަނިކްފާނަށް ލިބެންޖެހޭ ފައިސާކަމުގައި ރައީސް ޔާމިން ތަކުރާރު ކުރެއްވިއެވެ.

ރައީސް ޔާމިން ވިދާޅުވީ، އެ 5 މިލިއަން ޑޮލަރު ބޭންކަށް ޖަމާ ކުރުމަށް މަސައްކަތް ކުރުމުން، ނަގުދު ފައިސާ ބޭންކަށް ޖަމާ ނުކުރެވިގެން އުޅޭ ކަމަށާއި، ޗެކަކުން ފައިސާ ޖަމާ ކުރަންތޯ އަދީބު ސުވާލު ކުރެއްވި ކަމަށެވެ. އަދި ޗެކުން އެ ފައިސާ ޖަމާކުރިޔަށް އެންމެ ރަގަޅު ކަމަށް ވިދާޅުވި ކަމަށާއި، އެފައި ޖަމާކުރެއްވީ އެސްއޯއެފްގެ ޗެކަކުންކަން އެގިވަޑައި ނުގަންނަވާ ކަމުގައެވެ.

އަދި ފަހުން ފައިސާ ސިންގަޕޯރގެ ބޭންކެއްގަ ހުރިހަކަމަށް އަދީބު ވިދާޅުވިކަމަށް، އޭސީސީގެ ކުރީގެ ރައީސް ލުތުފީ އެމަނިކްފާނުގެ އަރިހުގައި ފަހުން ދެންނެވި ކަމަށް ރައީސް ޔާމިން ވިދާޅުވިއެވެ. އަދި އެ ފައިސާ ނެގެން އޮތީ އަދީ އަދީބުގެ ލޮލުގެ ސްކޭން ދިމާކޮށްގެން ކަމަށާއި، ސިންގަޕޯއަށް ދިއުމުގެ ފުރުސަތު ދެއްވައިފިނަމަ އެފައިސާ ލިބިދާނެކަމަށް އަދީބު ވިދާޅުވިކަމަށް ލުތުފީ ވިދާޅުވި ކަމަށާއި، އެހެންނަމަވެސް "ކުރިމިނަލަކު" ރާއްޖޭއިން ބޭރަށްދާން ފުރުސަތު ނުދެއްވާނެކަމަށް އޭރު ލުތުފީއަށް ދެންނެވިކަމަށްވެސް ރައީސް ޔާމިން ވިދާޅުވިއެވެ.

ޔާމީން ވިދާޅުވި ގޮތުގައި، ބޭންކަށް ވަދެފައިވާކަމަށް ބުނާ ދައުލަތުގެ ފައިސާ ބޭންކަށް ވަތް ގޮތްތަކާއި ގުޅޭގޮތުން ބޭންކުގެ އޮފިޝަލުންނާއި އަދި އެމްއެމްއޭގެ އޮފިޝަލުންނާވެސް ސުވާލުކުރަން ޖެހޭ ކަމުގައެވެ.