ރައީސް ނަޝީދުއާއި އެއްބަސްވެވޭ ކަމަކަށް އޮތީ ރާއްޖޭގައި އޮންނަން ޖެހޭނީ ބަރުލަމާނީ ނިޒާމެއް ކަމުގައި ގަބޫލުކުރުން އެކަނި ކަމަށާއި، އެހެންނަމަވެސް ދެބޭފުޅުންގެ މެދުގައި ހުރި ވިސްނުމާއި ފިކުރުގެ ތަފާތުތަކަށް ބަލާއިރު، ނަޝީދާއި އެކީ މަސައްކަތް ކުރުމުގެ ފުރުސަތު އޮތްކަމަށް ގަބޫލު ނުކުރެއްވޭކަމަށް ރައީސް ޔާމިން ވިދާޅު ވެއްޖެއެވެ.
މިރޭ ކުރިޔަށްދާ ނޫސްވެރިންގެ ބައްދަލުވުމުގައި، ނަޝީދުއާއެކީ މަސައްކަތް ކުރުމުގެ ޖާގަ އޮތްތޯ ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ޔާމިން ވިދާޅުވީ، ނަޝީދު ގަބޫލުކުރާ ޑިމޮކްރަސީގެ ސިފަތަކާއި، ރާއްޖޭގައި އޮންނަން ޖެހޭނަކަމަށް ނަޝީދު ދެކޭ ލިބަރަލް ސިފަތަކަށް ބަލާއިރު، ނަޝީދުއާއެކީ މަސައްކަތް ކުރެވިދާނެ ކަމަށް ގަބޫލު ނުކުރެއްވޭ ކަމުގައެވެ.
ރައީސް ޔާމިން ވިދާޅުވީ، ޑިމޮކްރަސީގައި އޮންނަ ޚިޔާލު ފާޅުކުރުމުގެ މިނިވަންކަމާއި، އެއްވެސް އުޅުމުގެ މިނިވަންކަމާއި މިޒާތުގެ ހައްގުތަކާއި ގުޅޭގޮތުން އެއްގަލަކަށް އެރިކަމުގައި ވި ނަމަވެސް، ރައީސް ނަޝީދު ގަބޫލުކުރާ، ޑިމޮކްރަސީގެ ލިބަރަލް ސިފަތަކާއި ގުޅުންހުރި މިނިވަންކަމުގެ ސިފަތަކަކީ އެމަނިކްފާނަށް ގަބޫލު ކުރެވޭ ސިފަތަނެއް ނޫންކަމުގައެވެ.
އިތުރަށް ރައީސް ޔާމިން ވިދާޅުވީ، އެހެންނަމަވެސް، ރައީސް ނަޝީދާއެކި މަސައްކަތް ކުރާނެތޯ ނުވަތަ ނޫންތޯ ނިންމާނީ ޕީޕީއެމްގެ ސެނެޓުންކަމުގައި ކަމަށާއި، ސެނެޓްގެ ގިނަ ބޭފުޅުންވެސް ރައީސް ނަޝީދު ގަބޫލުކުރައްވާ އުސޫލުތައް ގަބޫލު ކުރާނޭކަމުގައި ގަބޫލު ނުކުރެއްވޭ ކަމުގައެވެ.
