ވަރަށް ކުރިއްސުރެވެސް ތާއީދު ކުރަނީ ބަރުލަމާނީ ނިޒާމަކަށް ކަމަށާއި، އެހެންނަމަވެސް ރާއްޖެ ފަދަ ތަނެއްގަ، މެމްބަރުން ޕާޓީ ބަދަލުކުރުން ރެގިއުލޭޓް ކުރެވޭނެ ގޮތެއް ނެތް ތަނެއްގައި، ބަރުލަމާނީ ނިޒާމުން ހަމަޖެހުމެއް ނާންނާނެ ކަމުގައި ރައީސް ޔާމިން ވިދާޅުވެއްޖެއެވެ.
އަދި، ރައީސް ޔާމިނު ވިދާޅުވީ، މެމްބަރުން ޕާޓީ ބަދަލު ކުރުން ހުއްޓުވުމަށް ގާނޫނުތަކަށް ބަދަލު ގެނެވިދާނެ ކަމަށާއި އެހެންނަމަވެސް ރާއްޖޭގެ ޝަރުއީ ނިޒާމު އޮތް ގޮތުން އެއީ އަވަސް މުއްދަތެއްގައި ކުރެވޭނެ ކަމެއް ނޫންކަމެއް ކަމުގައެވެ. އެފަދަ ބަދަލެއް ނިމިގެން ދާއިރު، ދައުރު އޮންނާނީ ނިމިގެން ގޮސްފައި ކަމުގައެވެ.
ގިނަ ދުވަސްތަކަކަށްފަހ މިރޭ ކުރިޔަށް ދާ ނޫސްވެރިންގެ ބައްދަލުވުމުގައި ރައީސް ޔާމިން ވިދާޅުވީ، އެހެންނަމަވެސް ހުރިހާ ސިފަތަކެއް ފުރިހަމަ ވެގެން އެ ނިޒާމު އަތުވެއްޖެނަމަ އަދިވެސް ތާއީދު ކުރައްވާނީ ބަރުލަމާނީ ނިޒާމަކަށް ކަމުގައެވެ.
ރައީސް ޔާމިން ވިދާޅުވި ގޮތުގައި، ބަރުލަމާނީ ނިޒާމެއް ފުރިހަމަ ގޮތުގައި މަސައްކަތް ކުރާނީ މެމްބަރުން ޕާޓީ ބަދަލުކުރުންވެސް ހުއްޓުވޭނެ އުސޫލުތަކެއް އެކަށައެޅި، އަދި ސަރުކާރު ފަސޭހަކޮށް ނުރޫޅޭނެ ފުރިހަމަ އުސޫލުތަކެއްވެސް އެކަށައެޅިގެން ކަމުގައެވެ. އެހެންނޫން ނަމަ، އިސްރާއީލު، ނުވަތަ އިޓަލީ ފަދަ ބައެއް ގައުމުތައް ފަދައިން އެ ނިޒާމުގެ ތެރެއިން ދާނީ އަބަދުވެސް ސަރުކާރުތައް ބަދަލުވަމުން ކަމުގައެވެ.
ރައީސް ޔާމިން ވިދާޅުވީ ބަރުލަމާނީ ނިޒާމުތަކާއި ޚިލާފަށް ރިޔާސީ ނިޒާމުތަކަކީ، ސަރުކާރުގައި ހަމަޖެހުން އޮންނަ "ސްޓޭބަލް" ނިޒާމެއް ކަމަށާއި، އަދިވެސް ހުރިހާ ސިފަތަކެއް ފުރިހަމަވެގެން އަތުވެއްޖެ ނަމަ ބަރުލަމާނީ ނިޒާމަށް ތާއީދު ކުރައްވާނޭ ކަމުގައެވެ.
