ކުރިމިނަލް ކޯޓުގައި މިހާރު ކުރިޔަށްދާ ވ. އާރަށުގެ މައްސަލާގައި ކުރީގެ ރައީސް ޔާމިންއާއި ދެކޮޅަށް ހެކިބަސް ދެމުން، ކުރީގެ ނާއިބުރައީސް އަހުމަދު އަދީބު ވިދާޅުވެގެން ރައީސް ޔާމީނާއި 1 މިލިއަން ރުފިޔާ ހަވާލުކުރިކަމަށް އަދީބުގެ ކުރީގެ ޑްރައިވަރު، އަދި ގައުމީ ފުޓުބޯޅަ ޓީމުގެ ކުރީގެ ކުޅުންތެރިޔާ އޮއިޓޭ ބުނެފިއެވެ.
ކުރިމިނަލް ކޯޓުގައި މިއަދު އޮތް ޝަރީއަތުގައި އޮއިޓޭ ކިޔައިދިން ގޮތުގައި މި އެއް މިލިއަން ރުފިޔާގެ ތެރެއިން އަދީބި ވިދާޅުވެގެން އެންމެ ފުރަތަމަ ހަވާލު ކޮށްފައިވަނީ އެއް ލައްލަ ރުފިޔާކަމުގައެވެ. އެހެންނަމަވެސް އެފައިސާ ހަވާލު ކުރުމަށްފަހު ރައީސް ޔާމިންގެ ފަރާތުން ނުތަވަސްކަން ފެނުނު ކަމަށާއި، އެކަން އަދީބުއާއި ހިއްސާ ކުރުމުން އިތުރު ނުވަ ލައްކަ ރުފިޔާ އަދީބުގެ އެންގުމުގެ މަތިން ރައީސް ޔާމިނާއި ހަވާލު ކޮށްފައި ވާނެ ކަމަށެވެ.
އޮއިޓޭ ކިޔައިދިން ގޮތުގައި މި ފައިސާ ރައީސް ޔާމިންއާއި ހަވާލު ކޮށްފައިވާނީ 2013ވަނަ އަހަރުގައި ކަމަށާއި، ފައިސާ ރައީސް ޔާމިންއާއި ހަވާލު ކުރީ ރައީސް ޔާމިން ދިރިއުޅުއްވާ ގެއަށް ގޮސް، 500ގެ ނޫޓްތައް ކޮތަޅަކަށް އަޅައިގެން ކަމުގައެވެ.
ވ. އާރަށުގެ މައްސަލާގައި ހެކިބަސް ދެމުން އޮއިޓޭ ބުނެފައިވަނީ އަދީބު ވިދާޅުވެގެން އެކިއެކި ވިޔަފާރި ވެރިންގެ ގާތަށްވެސް ފައިސާ ބަލާ އޭނާ ގޮސްފައި ވާކަމުގައެވެ. އަދި އޭގެ އިތުރުން އަދީބުގެ އެދުމަށް އެކިއެކި މީހުންނާވެސް ފައިސާ ހަވާލުކުރުމަށް އޭނާ ދިޔަ ކަމަށްބުނެ، އަދީބުއާ އޮއިއްޓޭއާއި އޮތް އެހެން ގުޅުންތަކުގެ ވާހަކަތައްވެސް ކިޔައިދޭން ފެށުމުން ޔާމީންގެ ގާނޫނީ ވަކީލުންވަނީ އޮއިޓޭގެ ވާހަކައަކީ މައްސަލައާއި ގުޅުން ނެތް ވާހަކަތަކެއް ކަމަށް ވިދާޅުވެ ގާޒީގެ ސަމާލުކަމަށް މައްސަލަ ގެނެސްފައެވެ.
ޔާމީންގެ ވަކީލުން ފާހަގަ ކުރެއްވި ގޮތުގައި، ވ. އާރަށުގެ މައްސަލައަކީ ޗެކަކުން ކޮށްފައިވާ މުއާމަލާތަކާއި ގުޅުންހުރި މައްސަލައަކަށް ވާއިރު، ރައީސް ޔާމިނަށް ލިބިވަޑައިގެންފައިވާ ކަމަށް ބުނާ ނަގުދު ފައިސާގެ ވާހަކަތަކަކީ މައްސަލައާއި ގުޅުން ނެތް ވާހަކަތަކެއް ކަމުގައެވެ.
އެހެންނަމަވެސް ރައްދުގައި ދައުލަތުން ބުނެފައިވަނީ، ޔާމިންއާއި ހަވާލުކުރި އެއް މިލިއަން ރުފިޔާގެ ވާހަކަތަކަކީ މައްސަލައާއި ގުޅުންހުރި ވާހަކަތައް ކަމަށާއި، ސަބަބަކީ މިވާހަކަތައް ދައްކަންޖެހެނީ އެމްއެމްޕީއާރުސީގެ ޚިޔާނާތުގެ މައްސަލައެއް ސާބިތުކުރަން ކަމަށް ވާތީކަމުގައެވެ.
މިއަދު ޝަރީއަތުގެ މަޖިލިހުގައި އޮއިޓޭގެ ހެކިބަސް އޮންލައިކޮށް ނުނެގޭނެކަމަށް ބުނެވެސް ޔާމިންގެ ވަކީލުން ޝަކުވާ ހުށަހަޅުއްވާފައި ވެއެވެ. މިގޮތުން ޔާމިންގެ ވަކީލު، ކުރީގެ ނާއިބު ރައީސް ޑރ. ޖަމީލް ވިދާޅުވެފައިވަނީ ރާއްޖެ ގެނެވެން އޮތް މީހެއްގެ ހެކިބަސް އޮންލައިކޮށް ނުނެގޭނެ ކަމަށާއި، އަދި އޭނާ ރާއްޖެ ގެނައުމަށް ދައުލަތުން ކޮށްފައިވާ މަސައްކަތަކީ ކޮބައިތޯވެސް ސުވާލު ކުރައްވާފައި ވެއެވެ.
ޖަވާބުގައި ދައުލަތުން ބުނެފައިވަނީ، ރާއްޖޭގައި ނެތް ފަރާތެއްގެ ހެކިބަސް އޮންލައިންކޮށް ނެގުމުގައި އެއްވެސް މައްސަލައެއް ނެތްކަމަށާއި މީގެ ކުރިންވެސް މިގޮތަށް ޝަރީއަތުގެ މަޖިލިސްތަކުގައި ހެކިބަސް ނަގާފައިވާ ކަމުގައެވެ.
މައްސަލަ ބައްލަވާ އިސްގާޒީ ޝަކީލް ވިދާޅުވެފައިވަނީ ކޯޓަށް ހާޒިރު ކޮށްގެން ހެކިބަސް ނެގުމުގެ ފުރުސަތު ނެތްނަމަ ވީޑިއޯ މެދުވެރިކޮށް ހެކިބަސް ނެގިދާނެ ކަމަށާއި، އެކަން ދުރާލާ ހުރިހާ ފަރާތަތަކަށް އަންގާފައިވެސް ވާނެ ކަމުގައެވެ.
2 Responses
ފާސިގަކު ހަވާލު ކުރިވާހަކަ ބުންޏަސް ގަބޫލު ނުކުރެވޭނެ
އެކައުންޓްގައި އެތައް ސަތޭކަ މިލިޔަން އެހެރީ މުސާރައިން ލިބުނު ފައިސާއެއް ނޫނެވެ. އެއީ ދައުލަތުގެ ފަޅުތަކާއި ރަށްތައް ވިއްކައިގެން ލިބިފަހުރި ދިވެހިންގެ ފައިސާއެވެ. ގަޑުވަރު އެ އަޅަނީވެސް އެފައިސާއިންނެވެ. ތިޔަ ގަޑުވަރު ކިތަންމެ އުސްކުރިޔަށް އަދި ދިވެހި ރައްޔިތުން ތިޔަތަން އަބުރާ އަތުލާނެއެވެ.