ޓޫރިޒަމާ ބެހޭ ގާނޫނަށް އެންމެ ފަހުން ގެނައި އިސްލާހެއްގައި ތާރީހު ޖަހާފައި އޮތް ގޮތުން، ގްރީން ޓެކްސް ނެގޭނެ މަގު މީރާ އަށް ބަންދުވެއްޖެއެވެ.
މިދިޔަ ޖޫން މަހުގެ 30 ގައި ރައްޔިތުންގެ މަޖިލީހުން ފާސްކޮށް، މިދިޔަ މަހުގެ ތިން ވަނަ ދުވަހު ރައީސް އިބްރާހިމް މުހައްމަދު ސޯލިހު ތަސްދީގުކުރެއްވި، ޓޫރިޒަމާބެހޭ ގާނޫނަށް ގެނައި 11 ވަނަ އިސްލާހުގައި ބުނެފައި ވަނީ ގްރީން ޓެކްސް ނަގަން ފަށާނީ އަންނަ އަހަރުގެ ޖެނުއަރީ އެއް ވަނަ ދުވަހުން ފެށިގެން ކަމަށެވެ. އެހެންކަމުން މިހާރު އެ ގާނޫނުގައި އޮތް ގޮތުން މިއަހަރުގެ ބާކީ އޮތް މުއްދަތުގައި ގްރީން ޓެކްސްއެއް ނުނެގޭނެއެވެ.
އެނގިފައިވާ ގޮތުގައި އަންނަ އަހަރު ގްރީން ޓެކްސް ނަގާ ގޮތަށް ޖެހިފައި ވަނީ، ޑްރާފްޓުގައި އޮތް އިދާރީ އޮޅުމެއްގެ ސަބަބުންނެވެ. އަދި އެކަން ހައްލުކުރުމަށް ޓޫރިޒަމާބެހޭ ގާނޫނަށް އިސްލާހު ގެނައުމަށް އާބިލެއް ހުށަހެޅުމުގެ މަސައްކަތްތައް ކުރަމުން އަންނަކަންވެސް އެނގިފައިވެއެވެ.
ގްރީން ޓެކުހުގެ ގޮތުގައި ކޮންމެ އަހަރަކުވެސް ދައުލަތަށް ބޮޑު އާމްދަނީއެއް ލިބެއެވެ. އެގޮތުން މި އަހަރުގެ ޖޫން މަހާ ހަމައަށް ދައުލަތަށް ލިބުނު އާމްދަނީގެ 4.8 ޕަސަންޓަކީ ގްރީން ޓެކުހެވެ. އެ މުއްދަތުގައި ގްރީން ޓެކުހުން ދައުލަތަށް ވަނީ 547 މިލިއަން ރުފިޔާ ލިބިފައެވެ. އެހެންކަމުން، ގްރީން ޓެކްސްއިން ދައުލަތަށް މިއަހަރު ލިބޭނެ ކަމަށް ލަފާކުރެވޭ އާމްދަނީން 300-400 މިލިއަން ރުފިޔާ މަދުވާނެ ކަމަށް ބެލެވެއެވެ.
ޓޫރިޒަމާ ބެހޭ ގާނޫނަށް ގެނައި އިސްލާހުގެ މައިގަނޑު ބޭނުމަކީ، ގެސްޓް ހައުސްތައް ވެސް ގްރީން ޓެކްސްގެ ތެރެއަށް ވެއްދުމަށެވެ. ގާނޫނު މިހާރު އޮތް ގޮތުން ރިޒޯޓުތަކާއި، ހޮޓާތަކާއި، ޓޫރިސްޓް އުޅަނދުތަކާއި، މީހުން ދިރިއުޅޭ ރަށްތަކުގައި ހިންގާ 50 ކޮޓަރިއަށް ވުރެ ގިނަ ކޮޓަރި ރަޖިސްޓަރީކޮށްފައިވާ ހޮޓާތަކާއި ގެސްޓްހައުސްތަކުން ވެސް ގްރީން ޓެކްސް ދައްކަން ޖެހެއެވެ.
ގްރީން ޓެކްސްގެ ގޮތުގައި ދައްކަން ޖެހެނީ ޓޫރިސްޓުން ރާއްޖޭގައި ހޭދަކުރާ ކޮންމެ ދުވަހަކަށް 6 ޑޮލަރެވެ. މީރާ އިން ބުނީ މި މައްސަލަ ސަމާލު ކަމަށް އައިސްފައިވާ ކަމަށާއި އެކަން އިސްލާހުކޮށްދިނުމަށް ޓޫރިޒަމް މިނިސްޓްރީ އަށް ހުށަހަޅާފައިވާ ކަމަށެވެ. އަދި، މީރާގެ އިސް އޮފިޝަލަކު ވިދާޅުވި ގޮތުގައި އެތަނުން އަމަލު ކުރާނީ ގާނޫނުގައި ބުނެފައިވާ ގޮތަށެވެ.
ޓޫރިޒަމާ ބެހޭ ގާނޫނަށް ގެނެސްފައިވާ އިސްލާހު އެ ގޮތުގައި ދެމިއޮވެއްޖެ ނަމަ ދައުލަތުގެ އާމްދަނީ އަށް ގާތްގަނޑަކަށް 600 މިލިއަން ރުފިޔާގެ މަދުވުމެއް އަންނާނެ ކަމަށް ލަފާކުރެވެއެވެ.
