2023ގައި ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ޕީޕީއެމް/ޕީއެންސީގެ ފަރާތުން ވާދަ ކުރައްވާ ކެނޑިޑޭޓެއްގެ ގޮތުގައި ކުރީގެ ރައީސް އަބްދުﷲ ޔާމީނަށް ހަމަޖައްސައިފިއެވެ.
މައުލޫމާތު ލިބިފައިވާ ގޮތުގައި ޕީޕީއެމް/ޕީއެންސީގެ ރިޔާސީ ކެނޑިޑޭޓަކަށް ރައީސް ޔާމިން ހަމަޖައްސާފައިވަނީ ޕީޕީއެމް/ޕީއެންސީގެ ޖޮއިންޓް ކައުންސިލްގެ އިއްތިފާގުންނެވެ.
ޖޮއިންޓް ކައުންސިލްގެ މި ބައްދަލުވުމުގައި ކުރީގެ ރައީސް ޑރ. ވަހީދުވެސް ބައިވެރިވެ ވަޑައިގެންނެވިއެވެ.
ރޭގެ ޕީޕީއެމް ސެނެޓްގެ ނިންމުމަށްފަހު ޕީއެންސީގެ ރައީސް އަބްދުއްރަހީމް އަބްދުﷲ ކުރެއްވި ޓުވީޓެއްގައި ވިދާޅުވެފައިވަނީ 2023 ވަނަ އަހަރު ބާއްވާ ރިޔާސީ އިންތިޚާބުގެ ޕީ.ޕީ.އެމް/ޕީއެން.ސީގެ ރިޔާސީ ޓިކެޓް ރައީސް ޔާމީނަށް ދިނުމަށް ޕީ.ޕީ.އެމް/ޕީ.އެން.ސީ އިން ނިންމައިފި ކަމަށާއި އަދި ރައީސް ޔާމީން އެކަން ގަބޫލުކުރައްވާފައި ވާކަމަށެވެ.
އަދި އަބުދުއްރަހީމް ވިދާޅުވެފައި ވަނީ ރައީސް ޔާމިން ރިޔާސީ އިންތިޚާބު ކާމިޔާބު ކުރައްވާނީ އެއް ބުރުން ކަމަށާ ޔާމިންގެ ޒަޢާމަތުގައި ދިވެހިން ދެކޭނީ މިނިވަން މުސްތަގިއްލު ސައްތައިންސައްތަ އިސްލާމީ ދައުލަތެއް ކަމަށާއި ފުދުންތެރި އުފާ ފާގަތި އަމިއްލަ ވަންތަ ގައުމެއް ކަމުގައެވެ.
ޕީޕީއެމް/ޕީއެންސީގެ ޓިކެޓް ޔާމިނަށް ދިނުމަށް ނިންމާފައި ވާއިރު، އެމްއެމްޕީއާރުސީގެ ހިޔާނާތާ ގުޅިގެން ޔާމިންގެ މައްޗށް ކުރާ ތިން ދައުވާއެއް މިހާރު ވެސް ކޯޓުގައި އެބައޮތެވެ. އަދި މިމައްސަލަތައް ސާބިތު ވެއްޖެނަމަ 2023ގެ ރިޔާސީ އިންތިޚާބުގައި ވާދަކުރުމުގެ ފުރުސަތު ޔާމިނަށް ގެއްލިގެން ދާނެއެވެ.
