2008 ވަނަ އަހަރު، ޖަޕާންގެ ވެރި ރަށް ޓޯކިޔޯގެ އަކިހަބަރާ އަވަށުގައި ވަޅިން ހަމަލާދީ ގިނަބަޔަކު މަރާލާފައިވާ، އުމުރުން 38 އަހަރުގެ ޖަޕާނުގެ ރައްޔިތަކަށް މިއަދު އެގައުމުގައި މަރުގެ އަދަބު ދީފިއެވެ.
ޓޮމޮހިރޯ ކަޓޯ ނަމަކަށް ކިޔާ މިމީހާއަކީ ޖަޕާނުގެ ފަހުގެ ތާރީޚުގައި ގިނަބަޔަކަށް ހައިރާންކަން ގެނުވި އެންމެ ބޮޑު ގަތުލުއާންމު އެގައުމުގައި ހިންގާފައިވާ މީހާއެވެ.
އޭނޭ ދުއްވަމުން ދިޔަ އެއްގަމު އުޅަނދު، ދުވާލުގެ މެންދުރު ގަޑީގެ މީހުން ގިނަ ވަގުތެއްގައި، އަކިހަބަރާސިޓީގެ ފިހާރަތައް ގިނަ ސަރަހައްދެއްގައި ޕޭވްމަންޓް މަތިން ހިގާފައި ދިޔަ މީހުންނާ ދިމާލަށް ގަސްތުގައި ދުއްވާފައި ދިއުމުގެ ސަބަބުން 3 މީހަކު މަރުވެފައި ވެއެވެ. އެއަށްފަހު އޭނާ ވަނީ އޭނާގެ އަތުގައި އޮތް ބޮޑު ވަޅިއަކުން އިތުރު ހަތަރު މީހަކަށް ހަމަލާދީ އެމީހުން މަރާލުމަށްފަހު އިތުރު އެކަކު ޒަޚަމް ކޮށްލާފައެވެ.
އޭނާ ހުއްޓުވާފައިވަނީ ފުލުހުންނެވެ. އޭގެ ފަހުން ކުރިޔަށްދިޔަ ޝަރީއަތުގައި ޓޮމޮހިރޯ ކަޓޯ ވަނީ ގަސްތުގައި މީހުންނަށް ހަމަލާދީ އެމީހުން މަރާލާފައިވާކަމަށް އެއްބަސް ވެފައެވެ. ޝަރީއަތުގައި އޭނާ ބުނެފައިވަނީ، އޭނާ ރުޅިވެރިކަމަކީ އޮންލިންކޮށް އޭނާއަށް ހަނގާ ކުރުމުގެ ސަބަބުން އައިސްފައިވާ ރުޅިއެއް ކަމުގައެވެ.
ޓޮމޮހިރޯ ކަޓޯގެ މި ޖަރީމައަށްފަހު ޖަޕާނުގައިވަނީ މީހުން މެރުމުގެ ހާދިސާތަކާއި ގުޅޭގޮތުން ގިނަ ބަހުސްތަކެއް ހިގާފައެވެ. މީގެ ތެރޭގައި އިންޓަރނެޓްގެ ނުފޫޒާއި، ޒުވާން ފުރައިގެ ކުދިންނަށް ނަފްސާނީ ސިއްހަތާއި ގުޅުންހުރި މައްސަލަތަކަށް ދޭންޖެހޭ އެހީތެރިކަން ފޯރުކޮށް ދިނުމުގައި ވެފައިވާ އިހުމާލުތަކާއި ގުޅޭގޮތުންވެސް ހިނގާފައިވާ ބަހުސްތައް ހިމެނެއެވެ.
އަދި މިހާދިސާއަށްފަހު ތޫނު ހަތިޔާރު ގެންގުޅުމާއި ގުޅޭގޮތުން ހަދާފައިވާ ގާނޫނުތައްވެސް ޖަޕާނުގައި ވަނީ ހަރުކަށި ކޮށްފައެވެ.
ޖަޕާނުގެ ސަރުކާރުން މިއަދުވަނީ، ކަޓޯގެ މައްޗަށް މަރުގެ ހުކުމް އިއްވިތާ 8 އަހަރުފަހުން މިހުކުމް ތަންފީޒު ކޮށްފައިވާކަން ހާމަ ކޮށްފައެވެ.
"މި ކޭސްއަކީ ކޯޓުގެ ހުރިހާ މަރުހަލާއެއް ނިންމާ، ކޯޓުގެ އެންމެ ފަހު މަރުހަލާއިން މެރުމަށް ހުކުމް ކޮށްފައިވާ ކޭސްއެއް… މި ކޭސްއާއި ގުޅޭގޮތުން ކަން ނިންމުމުގައި ބަލަންޖެހޭ ހުރިހާ ކަމަކަށް އަހަރެން ވާނީ ބަލާފަ،" ޖަޕާނުގެ ޖަސްޓިސް މިނިސްޓަރ ޔޮޝިހިސާ ފުރުކާވާ، މިއަދު ބޭއްވި ޕްރެސް ކޮންފަރެންސްގައި ވިދާޅުވެފައި ވެއެވެ.
ކަޓޯ ދަން ޖައްސާ މިއަދު މަރާލާފައިވަނީ ވެރިރަށް ޓޯކިޔޯގެ ޑިޓެންޝަން ސެންޓަރުގައެވެ. އޭނާގެ މައްސަލާގައި އިސްތިއުނާފް މަރުހަލާ އޭނާއަށް ނާކާމިޔާބު ވެފައިވަނީ 2015ވަނަ އަަހަރުއެވެ.
ކަޓޯ 2008 ވަނަ އަހަރު ހައްޔަރު ކުރެވުނު އިރު އޭނާ ބުނެފައިވަނީ "އަހަރެން އަކިހަބަރާއަށް އައިސްފައިވަނީ މީހުން މެރުމަށް. އަހަރެން ނުބަލަން މަރުވަނީ ކޮން ބައެއްތޯ،" މިހެންނެވެ.
ކަޓޯ އުފަންވެފައިވަނީ ޖަޕާންގެ މުއްސަދި އާއިލާއަކަށެވެ. އަދި އޭނާ ހައި ސްކޫލް ނިންމާފައިވަނީ ޖަޕާންގެ އެންމެ މަޝްހޫރު އެއް ހައި ސްކޫލުންނެވެ. އެހެންނަމަވެސް ޔުނިވަސިޓީއަށް ވަނުމަށް ހެދި ޓެސްޓުން އޭނާވަނީ ފެއިލް ވެފައެވެ. އެއަށްފަހު އެއް ވަޒީފާއެއްގައި އޭނާއަށް ދެމިހުރެވިފައެއް ނުވެއެވެ.
ޕްރޮސެކިއުޓަރުން ބުނެފައިވަނީ، ކަޓޯ މާޔޫސްވާން މެދުވެރިވީ ސަބަބަކީ އޭނާ އޮންލައިންކޮށް ޗެޓް ކުރަމުންދިޔަ އަންހެން ކުއްޖަކު އޭނާއަށް އީމެއިލްކުރުން ހުއްޓާލުމާއި ގުޅިގެން ކަމުގައެވެ. ޖަޕާނުގެ އަކިހަބަރާގެ ޝޮޕިންގ ޑިސްޓްރިކްޓަަށް މީހުންނަށް ހަމަލާދޭން އޭނާ ގޮސްގައިވަނީ، އޭނާ ދަނީ ގިނަބަޔަކު މެރުމަށް ކަން އާންމުކޮށް އިއުލާން ކުރުމަށްފަހުއެވެ.
ޖަޕާނުގައި މިހާރުވެސް މަރަށް ހުކުމް ކޮށްފައިވާ 100އަށްވުރެ ގިނަ ގައިދީން އެބަތިއްބެވެ.
