މީހުން ފްރޭމްކޮށް ޖަލަށްލުމާއި ވާނުވާ ޖަހާފައި އެތައް ދުވަހަކު ޖަލުބަންދުގައި ބޭތިއްބުން މިސަރުކާރުގައިވެސް ތަކުރާރުވާން ފަށާފައިވާކަމަށް ވިދާޅުވެ، ދީނީ ޢިލްމުވެރިޔާ ޑރ.މުޙައްމަދު އިޔާޟް ޢަބްދުއްލަޠީފް ސަރުކާރަށް ފާޑުވިދާޅުވެއްޖެއެވެ.
މީގެ ކުރިން ރައީސް އިބްރާހީމް މުޙައްމަދު ޞާލިޙަށް ތަޢުރީފްކުރައްވާ ޓްވީޓްކުރެއްވިނަމަވެސް މިއަދު އިޔާޟް ކުރެއްވި ޓްވީޓްގައި ވަނީ ވަރަށް ބޮޑަށް ފާޑުވިދާޅުވެފައެވެ. ޑރ.އިޔާޟް ވިދާޅުވީ ކުރީގެ ރައީސް ޔާމީންގެ ސަރުކާރަށް ނޫނެކޭބުނެ ރައީސް ޞާލިޙްގެ ސަރުކާރު ގެންނަން ވޯޓުދިން އެއްސަބަބަކީ މީހުން ފްރޭމްކޮށް ޖަލަށްލުމާއި ވާނުވާ ޖަހާފައި އެތައް ދުވަހަކު ޖަލުބަންދުގައި ބޭތިއްބުން ހުއްޓުވުންކަމަށެވެ. ނަމަވެސް ރައީސް ޞާލިޙްގެ ސަރުކާރުގައިވެސް އެކަންކަން ތަކުރާރުކުރަން ފަށާފައިކަމަށް އިޔާޟް ވިދާޅުވިއެވެ.
ދިވެހި ރަޢްޔިތުން @prz_ymn ގެ ސަރުކާރަށް ނޫނެކޭ ބުނެ @ibusolih ގެސަރުކާރު ގެންނަން ވޯޓުދިން އެއްސަބަބަކީ މީހުން ފްރޭމްކޮށް ޖަލަށްލުމާއި ވާނުވާ ޖަހާފައި އެތައް ދުވަހަކު ޖަލުބަންދުގައި ބޭތިއްބުން ހުއްޓުވުން. ނަމަވެސް, މިއަދު @ibusolihގެ ސަރުކާރުން އެކަންތައް ތަކްރާރު ކުރަންފަށައިފި
— Dr.Mohamed Iyaz (@dr_iyaz) July 25, 2022
އިޔާޟް ވިދާޅުވީ ދީނީ ޢިލްމުވެރިޔާ ޝައިޚް ފަޟްލޫންއާއި، ޝައިޚް ނިޝާންގެ ބޮލުގައި ހަމަނުޖެހުން އުފެއްދި އަދި ޓެރަރިޒަމަށް އެހީތެރިވާ ބަޔެއްކަމަށް ފްރޭމްކޮށްގެން ޖަލުގައި ބަންދުކޮށް އެކަކު މިނިވަންވީމާ އަނެއްކާ ހައްޔަރުކުރަން މަސައްކަތް ފަށާފައިވާކަމަށެވެ. މުޖްތަމަޢުގައި ފެތުރިފައިވާ ފާޙިޝް ޢަމަލުތައް ހުއްޓުވުމަށްވުރެ ބޮޑަށް ނުފެންނަކަމަށް ހެދިގެން އުޅޭކަހަލަ ގޮތަކަށް ޢަމަލުތައް ފެންނަމުންދާކަމަށް އިޔާޟް ވިދާޅުވިއެވެ.
މިކަންތައްތައް ރަގަޅުނުކޮށް ދެވަނަ ދައުރެއްގެ ވާހަކަ ދެއްކެވުން ރަގަޅު ނޫންކަން ވަރަށް އަދަބުވެރިކަމާއި އެކު ރައީސްއަށް ދަންނަވަން.
– އިޔާޟް ވިދާޅުވިއެވެ.
އިޔާޟް މިހެން ވިދާޅުވެފައިމިވަނީ، ދުނިޔޭގެ ޔޯގާ ދުވަސް ފާހަގަކުރުމަށް ބޭއްވި ހަރަކާތަށް ހުރަސް އެޅިކަމުގެ ތުހުމަތުގައި ދީނީ ބައެއް ޢިލްމުވެރިން ހައްޔަރުކޮށް ބަންދުކޮށްފައި ތިބުމާއި ގުޅިގެންނެވެ.
ނަމަވެސް އެއްޖިންސުން ގުޅުން ހިންގިކަމަށް ތުހުމަތުކުރެވޭ ވީޑިއޯއާއި ފޮޓޯތައް އާންމުވަމުން ދިޔަނަމަވެސް އެމީހުންނަށް ފިޔަވަޅެއް އަޅާފައިނުވާތީ ގިނަ ބަޔަކު އަންނަނީ ސަރުކާރަށް ފާޑުކިޔަމުންނެވެ.
ކޮމެންޓު ފޮނުވާ