ބޮޑު އީދު ފާހަގަކުރުމަށް ތ. ކިނބިދޫގައި ބޭއްވި ހަރަކާތެއްގައި ރާއްޖޭގެ ސްކައުޓް އެސޯސިއޭޝަންގެ ރަސްމީ ޔުނިފޯމު ބޭނުންކޮށް، އެ ޔުނިފޯމާއި ސްކައުޓް ހަރަކާތަށް ގަދަރުކުޑަވާނެ ގޮތަށް އަމަލު ކޮށްފައިވާތީ އެކަން އެ އެސޯސިއޭޝަނުން ކުށްވެރިކޮށްފިއެވެ.

ސްކައުޓް އެސޯސިއޭޝަނުން ނެރުނު ބަޔާނެއްގައި ބުނީ އަޟްހާ އީދު ފާހަގަކުރުމަށް ތ.ކިނބިދޫގައި ބޭއްވި މާލި ހަރަކާތެއްގައި ރާއްޖޭގެ ސްކައުޓް އެސޯސިއޭޝަންގެ ރަސްމީ ޔުނިފޯމު ބޭނުންކޮށް، އެ ޔުނިފޯމާއި ސްކައުޓް ހަރަކާތަށް ގަދަރުކުޑަވާގޮތަށް އަމަލު ކޮށްފައިވާކަމަށެވެ.

އެ އެސޯސިއޭޝަނުން ބުނީ ސްކައުޓް ޔުނިފޯމާއި ސްކައުޓް ހަރަކާތުގެ އެކިއެކި ރަމްޒުތަކަކީ ސްކައުޓް ހަރަކާތުގައި ބައިވެރިވާ މީހުން އެކަނި ބޭނުންކުރުމަށް އެ އެސޯސިއޭޝަނުގެ ހިންގާ ގަވާއިދާއި ދުނިޔޭގެ ސްކައުޓް ޖަމިއްޔާ އިން ހުއްދަކުރާ އެއްޗެހި ކަމަށެވެ. އަދި އެސޯސިއޭޝަނުގެ ހުއްދަ ނެތި އެ ތަކެތި ބޭނުންކުރުމަކީ މަނާ ކަމެއްކަމަށް ސްކައުޓް އެސޯސިއޭޝަނުން ބުނެއެވެ.

ސްކައުޓް އެސޯސިއޭޝަނުގެ ހުއްދަ ނެތި އެހެން އެއްވެސް ފަރާތަކުން ޔުނިފޯމާއި އެފަދަ ރަމްޒުތައް ބޭނުންކުރުމަކީ މަނާ ކަމެކެވެ. އަދި ސްކައުޓް ޔުނިފޯމަށް ދެވޭ ގަދަރުކުދަވާ ގޮތަށް އެެއްވެސް ފަރާތަކުން ޔުނިފޯމު ބޭނުންކުރުމަކީ މި އެސޯސިއޭޝަނުން ބަލައިގަންނާނެ ކަމެއް ނޫނެވެ.

– ސްކައުންޓް އެސޯސިއޭޝަނުން ބުންޏެވެ.

ސްކައުޓް އެސޯސިއޭޝަނުން ބުނީ، ސްކައުޓް ހަރަކާތަކީ ހުނަރުވެރި ޒިންމާދާރު ރައްޔިތެއް ބިނާކުރުމަށް މަސައްކަތްކުރާ ދުނިޔޭގައި އޮތް ނުރަސްމީ ތައުލީމު ފޯރުކޮށްދޭ އެންމެ ބޮޑު ޖަމިއްޔާ ކަމަށެވެ. އަދި ކުޑަކުދިންނާއި ޒުވާނުންގެ ކުރިއެރުމަށް މަސައްކަތްކުރާ ހަރަކާތެއްގެ ހައިސިއްޔަތަށް އުނިކަން އަތުވެދާނެ ފަދަ ގޮތަކަށް އެއްވެސް ފަރާތަކުން އަމަލުނުކުރުމަށް އެ އެސޯސިއޭޝަނުގެ ބަޔާނުގައި ގޮވާލިއެވެ. އަދި މި އެންގުމާއި ހިލާފަށް އަމަލުކުރާ މީހުންނާ މެދު އަޅަންޖެހޭ ފިޔަވަޅު އަޅާނެކަމަށްވެސް ސްކައުޓް އެސޯސިއޭޝަނުން ނެރުނު ބަޔާނުގައިވެއެވެ.

އަޟްހާ އީދު ފާހަގަކުރުމަށް ރާއްޖޭގެ އެކި ކަންކޮޅުތަކުގައި ތަފާތު ހަރަކާތްތައް ހިންގާފައިވާއިރު، މީގެތެރެއިން ބައެއް ހަރަކާތްތަކަށް ބައެއް މީހުންގެ ފާޑު ކިޔުންވެސް ވަނީ އަމާޒުވެފައެވެ.