ގައުމުން ފިއްލަވައިގެން މިއަދު މިހާރު ސިންގަޕޯރއަށް ވަޑައިގެންފައިވާ ސްރީ ލަންކާގެ ރައީސް ގޮޓަބަޔަ ރާޖަޕަކްސަ ރައީސްކަމުގެ މަގާމުން އިސްތިއުފާ ދެއްވައިފިއެވެ.
ގޮޓަބަޔަ ސްރީ ލަންކާގެ ރައީސްކަމުގެ މަގާމުން އިސްތިއުފާ ދެއްވާފައި މިވަނީ، އޭނާގެ އިސްތިއުފާއަށް ޑިމާންޑްކޮށް މުޒާހިތާ ކުރަމުންދާތާ އެތައް މަހެއް ފާއިތުވެގެން ދިޔަ ފަހުންނެވެ. އަދި މި ހަފްތާގައި އެގައުމުގެ އެތައްހާސް ރައްޔިތުން ރައީސްގެ ގެކޮޅާއި ރަސްމީ އޮފީސް ހިސާރުކޮށް، ގޮޓަބަޔަ އެގައުމުގެ އެއަރޕޯޓުން ފުރައިގެން ދިއުންވެސް މިހަފްތާގައިވަނީ މަނާ ކޮށްފައެވެ.
އެހެންނަމަވެސް ގޮޓަބަޔަ ގައުމު ދޫކޮށް އެންމެ ފަހުން ވަޑައިގެންފައިވަނީ އަސްކަރީ މަތިންދާ ބޯޓެއްގައި ރޭގެ ވަގުތެއްގައި ރާއްޖެއަށެވެ. އެއަށްފަހު ސައުދީ އެއްލައިންގެ ޕްރައިވެޓް ޖެޓެއްގައި ގޮޓަބަޔަ ވަޑައިގެންފައިވަނީ އިންގަޕޯއަށެވެ. ގޮޓަބަޔަ ސިންގަޕޯރއަށް ވަޑައިގެންފައިވަނީ މިރޭގެ އިރާކޮޅުގެ ވަގުތެއްގައެވެ.
ސިންގަޕޯރގެ ފޮރިންގ މިނިސްޓްރީން ބުނެފައިވަނީ ގޮޓަބަޔަރ ރާޖަޕަކްސަ "ޕްރައިވެޓް ޖެޓެއްގައި" ސިންގަޕޯރއަށް އެތެރެވުމުގެ ހުއްދަ ދޫކޮށްފައި ވާކަމަށާއި، އެހެންނަަމަވެސް ސިޔާސީ ހިމާޔަތް ދީފައި ނުވާނެކަމަށެވެ.
ފޮރިން މިނިސްޓްރީން ބުނެފައިވާ ގޮތުގައި، ސިޔާސީ ހިމާޔަތަށް ގޮޓަބަޔަވެސް އެދިވެޑައިގެންފައި ނުވާކަމަށާއި އަދި ސިޔާސީ ހިމާޔަތް ދީފައިވެސް ނުވާނެ ކަމުގައެވެ.
މީޑިއާތަކުން ކުރަމުންއައި ސުވާލުތަކަށް ޖަވާބު ދިނުމުގެ ގޮތުން، ސިންގަޕޯރގެ ފޮރިންގ މިނިސްޓްރީން ނެރެފައިވާ ބަޔާނެއްގައި ބުނެފައިވަނީ، ޕްރައިވެޓް ޖެޓެއްގައި ގޮޓަބަޔަ އެގައުމަށް އެތެރެވުމުގެ ހުއްދަ ދީފައި ވާކަމުގައެވެ.
"އޭނާވެސް ސިޔާސީ ހިމާޔަތަށް އެދިފައެއް ނުވޭ، އަދި ސިޔާސީ ހިމާޔަތް ދީފަައެއްވެސް ނުވާނެ. ސިންގަޕޯރއަކީ އާންމު ގޮތެއްގައި ސިޔާސީ ހިމާޔަތް ފޯރުކޮށްދޭ ގައުމެއް ނޫން،" ސިންގަޕޯރގެ ފޮރިންގ މިނިސްޓްރީން ނެރުނު ބަޔާނަށް ހަވާލާދީ މީޑިއާތަކުން ރިޕޯޓު ކޮށްފައި ވެއެވެ.
ސިންގަޕޯރގެ ފުލުހުން ފަހުންވަނީ "އަމިއްލަފުޅު ދަތުރެއްގައި" ގޮޓަބަޔަ ސިންގަޕޯރގައި ހުންނެވިކަން ޔަގީން ކޮށްދެއްވާފައެވެ. "އޭނާ ސިންގަޕޯރގައި ހުންނެވީ ސޯޝަލް ވިޒިޓް ފާހެއްގައި،" ފުލުހުން ވިދާޅުވެފައި ވެއެވެ.
ސިންގަޕޯރއަކީ ސްރީ ލަންކާގެ ރައްޔިތުންނަށް 30 ދުވަހުގެ އޮން އެރައިވަލް ވިސާ ލިބޭ ގައުމެކެވެ.
ފިއްލަވައިގެން އަސްކަރީ ބޯޓެއްގައި ރާޢްޖެ ވަޑައިގަތުމަށްފަހު ރިސޯޓެއްގައި އެއްދުވަސް ހޭދަ ކުރެއްވުމަށްފަހު ގޮޓާބަޔަ ފުރާފައިވަނީ މިއަދު ހެނދުނު 11:30ގައި ސައުދީއެއާލައިންގެ ފްލައިޓަކުންނެވެ. އެއާޕޯޓުުން ގޮޓާބަޔައަށް އަލްވަދާޢު ވިދާޅުވީ އެމަނިކުފާނު ރާއްޖެ ގެނައުމަށްވެސް އެންމެ ބޮޑު އެއްބާރުލުމެއް ދެއްވި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، އެމަނިކުފާނަށް ތާއީދު ކުރައްވާ މަޖިލީހުގެ ބައެއް މެމްބަރުންނެވެ.
